បាត់ដំបង ៖ បុរសប្រកបមុខរបរកើបអាចម៍ប្រជៀវជួបគ្រោះថ្នាក់ធ្លាក់ជាប់ក្រហែងថ្មភូមិហុងទឹក ស្រុកភ្នំព្រឹក ខេត្តបាត់ដំបងតាំងពីថ្ងៃទី០៤ ខែសីហា ឆ្នាំ២០១៩ត្រូវបានជួយសង្គ្រោះបានហើយនៅព្រលប់ថ្ងៃទី៧សិហាដោយក្រុមយោធាសង្គ្រោះ711 ក្រោមការបញ្ជាពីនាយឧត្តមសេនីយ៍ គន់ គីមអនុប្រធានទី១គណកម្មាធិការគ្រប់គ្រងគ្រោះមហន្តរាយ។
ត្រឹមម៉ោង៦ល្ងាច កងកម្លាំងជួយសង្គ្រោះបានវាយបំបែកថ្មបានហើយ តែមិនទាន់ទាញយកជនរងគ្រោះបាននៅឡើយទេដោយសារជើងជនរងគ្រោះកៀបជាប់ ។ សមត្តកិច្ចថា បានប្រើប្រាស់ប្រេងរំអិលរួចហើយ តែនៅតែមិនអាចទាញចេញបានទៀត ពោល គឺត្រូវប្រើប្រាស់ម៉ាស៊ីន ដើម្បីខួងបំបែកបំណែកផ្លាំងថ្មខ្លះទើបអាចទាញចេញមកបាន។ – កងកម្លាំងជួយសង្គ្រោះបានរំកិលក្បាល និង ដងខ្លនជនរងគ្រោះចេញពីគម្លាតថ្ម ប៉ុន្តែ ជើងជនរងគ្រោះនៅជាប់គៀបថ្មនៅឡើយ។ តាមកងកម្លាំងជួយសង្គ្រោះ គឺជនរងគ្រោះមានស្ថានភាពសុខភាពខ្សោយ ម្តងសន្លប់ ម្តងដឹងខ្លួនក្នុងខណៈពេលកំពុងជួយសង្គ្រោះនាំមកមន្ទីរពេទ្យខេត្តបាត់ដំបង។
ក្រុមគ្រួសារឲ្យដឹងថាបុរសនោះបានបាត់ខ្លួន៣យប់ ៤ថ្ងៃ ដោយគាបជើងជាប់ថ្មក្នុងរូងភ្នំ ក្រោយឡើងកើបអាចម៌ប្រចៀវ ហើយរអិលជើងធ្លាក់ តាំងពីថ្ងៃទី០៤ ខែសីហា ឆ្នាំ២០១៩នេះ ហើយក្រុមគ្រួសារប្រទះឃើញ នៅថ្ងៃទី០៧ ខែសីហានេះ។ លោកវរសេនីយ៍ទោ សារ៉េត វិសេដ្ឋ អធិការនគរបាលស្រុកភ្នំព្រឹក បានឲ្យដឹងថា យោងតាមបណ្តឹងរបស់ម្ដាយជនរងគ្រោះ បានមកប្ដឹងសមត្ថកិច្ចថា គាត់បានបាត់កូនឈ្មោះ បូរ៉ា អាយុ២៧ឆ្នាំ រស់នៅភូមិទឹកថ្លា ឃុំអង្គរបា នស្រុកសំពៅលូន ខេត្តបាត់ដំបង រយៈពេល៤ថ្ងៃមកហើយ។
បើតាមម្តាយជនរងគ្រោះ បានប្រាប់សមត្ថកិច្ចថា នៅថ្ងៃទី០៤ ខែសីហា ឆ្នាំ២០១៩ កូនគាត់បានចេញបាត់ពីផ្ទះ ហើយមិនឃើញវិលត្រលប់មកវិញទេ ហើយឆោឡោដើររក ទើបប្រទះឃើញជាប់ក្នុងរូងភ្នំ នៅចំណុចភ្នំចក្រី ស្ថិតក្នុងភូមិក្បាលហុងទឹក ឃុំបារាំងធ្លាក់ ស្រុកភ្នំព្រឹក។
សូមបញ្ជាក់ដែរថាសម្រាប់ករណីយ៍បុរសជួបសំណាងក្នុងគ្រោះថ្នាក់នេះក៏ទទួលបានការយកចិត្តទុកដាក់ពីសម្តេចតេជោហ៊ុនសែននិងសម្តេចកិត្តិព្រឹត្តបណ្ឌិតប៊ុនរ៉ានីហ៊ុនសែនជួយឧបត្ថម្ភថិវិកា១០លានរៀលផងដែរ៕
