ភ្នំពេញ ៖ ការផ្សព្វផ្សាយថា ទឹកមាត់ខ្យងសោកថ្លៃជាងមាសគឺជាចេតនានិងសក្ដានុពលបង្កហានិភ័យដ៏ខ្ពស់ក្នុងការបំផ្លាញសេដ្ឋកិច្ចនៃប្រទេសកម្ពុជា ។នេះបើយោងតាមសំណេររបស់លោករដ្ឋលេខាធិការក្រសួងកសិកម្មរុក្ខាប្រម៉ាញ់ និងនេសាទ បានប្រតិកម្ម នៅលើបណ្តាញ Facebook របស់លោកដែលមានឈ្មោះថា ហ៊ាន វណ្ណហន កាលពីម្សិលមិញ ។
សូមជម្រាបថា ប៉ុន្មានថ្ងៃនេះឃើញមានការផ្សព្វផ្សាយនិងចែករំលែកក្នុងបណ្ដាញសង្គមហ្វេសប៊ុកនូវព័ត៌មានពីក្រៅប្រទេសអំពីតម្លៃទឹកមាត់ខ្យងសោកថ្លៃមិនគួរឱ្យជឿ។ដែលប្រភពទាំនោះអះអាងថាមានតម្លៃថ្លៃជាងមាសក្នុងមួយគីឡូក្រាមទៅទៀត។លោក ហ៊ាន វណ្ណហន បានបញ្ជាក់ថាតាមពិតរឿងនេះដូចគ្នាទៅនឹងរឿងនៃការបំផុសចិញ្ចឹមខ្យងមាសឬខ្យងស៊ីស្រូវ(GoldenAppleSnail)នៅកម្ពុជាកាលពីដើមទសវត្សឆ្នាំ៩០ដែលជាលទ្ធផលមកដល់ថ្ងៃនេះ។ខ្យងមាសដែលមិនដែលមាននៅក្នុងប្រទេសកម្ពុជាសោះ បែរជាមានវត្តមានពេញប្រទេសនិងបំផ្លាញដំណាំស្រូវជារៀង រាល់ ឆ្នាំ (អាចមានឥទ្ធិពល ឧត្បាតបំបាត់ពូជខ្យងក្នុងស្រុក)និងពុំមានសង្ឃឹមថានឹងអាចលប់បំបាត់ ទៅវិញបាន។
លោកបានរំលឹកថាខ្យងសោក(Giant African Snail) មាននៅ កម្ពុជា ស្រាប់ រួចហើយនាពេលនេះ ។ដែលកាលពីជាង១០ឆ្នាំមុនរដ្ឋាភិបាល អូស្ត្រាលីធ្លាប់បានព្រមាន យើង បន្ទាប់ពីទំនិញកម្ពុជា នាំចូលទៅអូស្ត្រាលីត្រូវបានត្រួតពិនិត្យឃើញមានខ្យងសោក១ក្បាលជាប់ពួននៅបាតកុងតឺន័រទំនិញ។ហេតុនេះសូមជួយស៊ែរបន្តនិងចូលរួមទប់ស្កាត់ការចិញ្ចឹមខ្យងសោកដើម្បីយកទឹកមាត់ដែលជាសកម្មភាពដ៏មានហានិភ័យជំរុញដល់ការខូចខាតផលិតកម្មកសិកម្មនិងដល់វិស័យនាំចេញនៃកម្ពុជា។
ប្រភពព័ត៌មានថាទឹកមាត់ខ្យងសោកមានតម្លៃថ្លៃជាងមាសមួយគីឡូគឺ ចេញពីប្រទេសថៃដែលសារព័ត៌មានក្នុងស្រុកថៃផ្សាយថាមានកសិករចិញ្ចឹមខ្យងនេះជាច្រើនសម្រាប់នាំចេញទៅលក់នៅសហរដ្ឋអាមេរិកនិងកូរ៉េជាដើមសម្រាប់បម្រើឱ្យផ្នែកថែរក្សាសម្រស់។
តាមប្រភពបានអះអាងថាមានកសិដ្ឋានចិញ្ចឹមខ្យងសោកប្រមាណ៨៥នៅខេត្តណាក់ខនណាយុគ។ឯតម្លៃទឹកមាត់ខ្យងដែលគេចម្រាញ់ជាផ្សៅស្ងួតដើម្បីលក់ឱ្យទៅក្រុមហ៊ុនគ្រឿងសម្អាងកូរ៉េនិងអាមេរិក១គីឡូ៥៨.២០០ដុល្លារខណៈមាសនៅក្នុងទីផ្សារប្រទេសថៃមានតម្លៃតែ៤៦.៣០០ដុល្លារក្នុង១គីឡូក្រាមប៉ុណ្ណោះ៕