ខេត្តព្រៃវែង ៖ នាថ្ងៃទី០៤ ខែសីហា ឆ្នាំ២០១៦កន្លងទៅនេះ មានការប្រារព្ធពិធីផ្សព្វផ្សាយច្បាប់ជលផលជូនទៅដល់មន្ត្រីជលផល ព្រមទាំងប្រជាពលរដ្ឋមួយ ស្ថិតនៅភូមិបឹងផ្សោត ឃុំពាមមានជ័យ ស្រុកពាមរក៏ ខេត្តព្រៃវែង ក្រោមអធិបតីភាព លោក សេង សំអឿន នាយរងខណ្ឌ័រដ្ឋបាល ជលផលខេត្ត មានការចូលរួមពីសំណាក់ លោក សឿ វិចិត្រ នាយរងផ្នែករដ្ឋបាលជលផលស្ទឹងស្លូត និងលោកហ៊ុនសាវីនាយសង្កាត់រដ្នបាលជលផល ពាមរក៏ លោកប្រាក់ ណាម៉ារុនជំទប់ទី១ក្រុមប្រឹក្សាឃុំនិងប្រជាសហគមន៍ និងប្រជាពលរដ្ឋ ចូលរួមស្តាប់ការផ្សព្វផ្សាយច្បាប់ជលផលចំនួន៧៣នាក់ស្រី២០នាក់។
លោក សេង សំអឿន បានលើកឡើងនៅចំណុចសំខាន់ៗមួយចំនួនពាក់ព័ន្ធនិងវិស័យនេះ ពិសេសលោកបានសង្កត់ធ្ងន់ថា នេះជារដូវបិតនេសាទដូច្នេះ សូមបងប្អូនប្រជាពលរដ្ឋ និងសហគមន៍មេត្តជួយចូលរួម ទប់ស្កាត់ រាល់បទល្មើសទាំងអស់ និងសហការជាមួយសមត្ថកិច្ចនិងមន្ត្រីជលផលបង្ក្រាបបទល្មើសនេសាទឲ្យបានគ្រប់ៗគ្នា ដើម្បីធ្វើយ៉ាងណារក្សាឱ្យបាន នូវសម្បត្តិមច្ឆាជាតិឲ្យបានដល់រដូវបើកនេសាទសំបូរត្រីដល់ប្រជាពលរដ្ឋធ្វើប្រហុកធ្វើផ្អក និងត្រីច្អើ និងទុកធន់ធាននេះបន្តទៅឱ្យកូនចៅយើងជំនាន់ក្រោយទៀត ។ល។
លោកក៏បានផ្តាំផ្ញើដល់ពលរដ្ឋ និងសហគមន៍ថាហាមដាច់ខាតដូចជា លួចដាក់ស្បៃមុងលូម៉ាត់ដាក់យកកូនត្រីល្អិត ឧបករណ៍ឆក់ និងមងជាដើម និងការផ្សព្វផ្សាយច្បាប់ជលផលដល់ប្រពលរដ្ឋឲ្យយល់ដឹងចេះជួយថែរក្សានៅសម្បត្តិមច្ឆាជាតិឲ្យបានគង់វង្សកុំឱ្យបាត់បង់ ទុកឱ្យកូនចៅយើងជំនាន់ក្រោយបានស្គាល់និងបានប្រើប្រាស់ទិន្នផលនេះផង៕
