ភ្នំពេញ ៖ ព្រះករុណា ជាអម្ចាស់ជីវិតលើត្បូង និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុតព្រឹកថ្ងៃទី១ ខែសីហា ឆ្នាំ២០១៩ បានព្រះរាជទាន ជាព្រះរាជទ្រព្យដ៏វិសេស វិសាលចំនួន ១លានដុល្លារសហរដ្ឋអាមេរិកចូលរួមសាងសង់អគារវះកាត់បេះដូងសីហមុនី មុនីនាថជា ដំបូងនៅមន្ទីរពេទ្យគន្ធបុប្ផាភ្នំពេញដែលមានតម្លៃចំណាយថវិកា អស់ប្រមាណ ៨លានដុល្លារអាមេរិក។នេះបើយោងតាមបណ្ដាញ ទំនាក់ទំនងសង្គមហ្វេសប៊ុក Royal du Cambodge បានឲ្យដឹង។
ក្នុងពិធីនោះព្រះមហាក្សត្រ បានមានព្រះរាជបន្ទូលថា វិស័យសុខាភិបាល ជាបញ្ហាគន្លឹះក្នុងចំណោមបញ្ហាសំខាន់ៗ ដែលត្រូវយកចិត្តទុកដាក់ខ្ពស់ លើការអភិវឌ្ឍឲ្យកាន់តែល្អប្រសើរបន្ថែមទៀត សំដៅថែរក្សាការពារ និងព្យាបាលសុខភាពប្រជារាស្ត្រទូទាំងប្រទេស។
ទន្ទឹមគ្នានេះ សម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យ ប្រទានព្រះរាជទ្រព្យបន្ថែមទៀតចំនួន ១០ម៉ឺនដុល្លារ ចំពោះមូលនិធិមន្ទីរពេទ្យកុមារគន្ធបុប្ផា។
បន្ទប់វះកាត់បេះដូងលើកដំបូងនៅរាជធានីភ្នំពេញ នៃអគារគន្ធបុប្ផា-សីហមុនី មុនិនាថ ថ្មីៗនេះនឹងចាប់ផ្តើមដំណើរការពីថ្ងៃទី០២ ខែសីហា ឆ្នាំ២០១៩ តទៅ ដែលក្នុងមួយឆ្នាំៗយើងនឹងអាចបង្កើនការវះកាត់បានចំនួនប្រមាណ១០០០នាក់ រួមគ្នាជាមួយមជ្ឈមណ្ឌលវះកាត់បេះដូងទី១ ដែលបានធ្វើប្រតិបត្តិការនៅមន្ទីរពេទ្យជ័យវរ្ម័នទី៧ ក្នុងខេត្តសៀមរាប តាំងពីឆ្នាំ២០១១ កន្លងមក។
ព្រះមហាក្សត្រ ក៏បានសព្វព្រះរាជហឫទ័យ ប្រោសព្រះរាជទានព្រះរាជអំណោយ ដល់កុមារដែលកំពុងសម្រាកព្យាបាល នៅក្នុងមន្ទីរពេទ្យគន្ធបុប្ផាចំនួន ១.៦៣៧នាក់ ដោយក្នុងម្នាក់ៗទទួលបានខោ-អាវយឺត ១សម្រាប់ និងថវិកា ២ម៉ឺនរៀល។ ដោយឡែកសម្រាប់អ្នកកំដរចំនួន ១.៦៣៧នាក់ក្នុងម្នាក់ៗទទួលបាន សារុង១ និងថវិកាចំនួន ២ម៉ឺនរៀល។ ចំណែកសម្រាប់បុគ្គលិកពេទ្យចំនួន ១.១៩៦នាក់ ក្នុងម្នាក់ៗទទួលបាន សារុង១ និងថវិកាចំនួន ២ម៉ឺនរៀល៕