ភ្នំពេញ ៖ លោកជិនម៉ាលីនអ្នកនាំពាក្យក្រសួងយុត្តិធម៌នៅក្នុងសន្និសីទសារព័ត៌មានមួយស្តីពី “សមិទ្ធផល ១ឆ្នាំក្រោយការបោះឆ្នោត” នាថ្ងៃទី១ ខែសីហា នេះ នៅទីស្តីការគណៈរដ្ឋមន្ត្រី បានបញ្ជាក់យ៉ាងច្បាស់ថា “ជាគោលការណ៍ច្បាប់ ស្ថាប័នតុលាការជាស្ថាប័នឯករាជ្យ គ្មានស្ថាប័នណាមួយ រួមទាំងអង្គទូត រដ្ឋបរទេសផងនោះ មិនអាចធ្វើការបង្គាប់បញ្ជាតុលាការចំពោះឲ្យទម្លាក់ការចោទប្រកាន់ ដោះលែង ឬមិនដោះលែងបាននោះទេ ដោយសារតុលាការជាស្ថាប័នឯករាជ្យ ហើយគ្មានអង្គទូតណាមួយមានឥទ្ធិពលទៅលើតុលាការកម្ពុជានោះដែរ”។
លោកជិនម៉ាលីនអះអាងបន្ថែមទៀតថា សំណុំរឿងរបស់តុលាការ ផ្អែកទៅលើមូលដ្ឋានច្បាប់ និងភស្តុតាងគ្រប់បែបយ៉ាង។ដូច្នេះការលើកឡើងរបស់អ្នកទាំងអស់នោះមិនមានឥទ្ធពលអ្វីឡើយក្នុងការសម្រេចរបស់តុលាការ។លោកជិនម៉ាលីនបញ្ជាក់ថា៖ មធ្យោបាយមានតែមួយគត់ ក្នុងការជួយអ្នកទាំងអស់នោះគឺ ការរួមដំណើរការតាមនីតិវិធីច្បាប់របស់តុលាការ បង្ហាញទល្ហីករណ៍រឹងមាំដើម្បីដោះបន្ទុកអ្នកទាំងអស់នោះ។សម្រាប់ការងារកែទម្រង់តុលាការលោកចិនម៉ាលីនបានឲ្យដឹងថានៅឆ្នាំខាងមុខនឹងមានដាក់ឲ្យដំណើការតុលារការសាលឧទ្ធរណ៍នៅតំបន់បីគឺខេត្តបាត់ដំបងខេត្តត្បូងឃ្មុំនិងខេត្តព្រះសីហនុ។ឯខេត្តកែបនឹងបង្កើតឲ្យមានតុលការសាលាដំបូងផងដែរនៅឆ្នាំ២០២០។
សូមបញ្ជាក់ថា កាលពីថ្ងៃទី៣០ ខែកក្កដាមន្ត្រីស្ថានទូត ស្ថានទូតសហរដ្ឋអាមេរិកប្រចាំកម្ពុជា បានសរសេរសារមួយនៅក្នុងបណ្តាញសង្គមហ្វេសប៊ុកផ្លូវការរបស់ខ្លួន ដោយអំពាវនាវឲ្យរដ្ឋាភិបាលកម្ពុជាចាត់វិធានការជាក់ស្តែងនានា ក្នុងការស្តារលទ្ធិប្រជាធិបតេយ្យ រួមទាំងការទម្លាក់បទចោទប្រកាន់ទាំងឡាយប្រឆាំងលោក កឹម សុខា និងអ្នកទោសនយោបាយដទៃទៀត ហើយបញ្ចប់ការអនុវត្តនូវកាចោទប្រកាន់ដោយគ្មានមូលដ្ឋាន និងក្រោមហេតុផលនយោបាយដើម្បីយាយីពលរដ្ឋរបស់ខ្លួន។
លោក ផៃ ស៊ីផាន អ្នកនាំពាក្យរដ្ឋាភិបាល ថ្លែង ថា “យើងមិនចង់ឃើញបរទេសមកជ្រៀតជ្រែក លូកលាន់ចំពោះការប្រឆាំងនូវលទ្ធផលនៃការបោះឆ្នោត ដែលជាសិទ្ធិសម្រេចជោគវាសនារបស់ពលរដ្ឋនោះទេ”។ លោកថា “ចំពោះអ្វីដែលគេមិនទទួលស្គាល់ ឬមិនពេញចិត្តចំពោះការបោះឆ្នោត មានន័យថា គេមិនទទួលស្គាល់រាជរដ្ឋាភិបាល ដូច្នេះគេត្រូវវេចបង្វិចទៅស្រុកគេវិញទៅ យើងមិនស្វាគមន៍ទេ”។
គួររំលឹកថា កាលពីថ្ងៃទី៣១ ខែកក្កដា ម្សិលមិញ ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីថ្លែងការណ៍មួយ ដោយបង្ហាញការខកចិត្តយ៉ាងខ្លាំងចំពោះស្ថានទូតអាមេរិកដែលបានផ្សព្វផ្សាយនូវបទអត្ថាធិប្បាយខុសឆ្គង។ ក្រសួងការបរទេសបាន លើកឡើងថា “យើងនឹកស្មានមិនដល់ទាល់តែសោះ នូវទង្វើវាយប្រហារដ៏គឃ្លើនបែបនេះ ដែលរំលោភបំពានទៅលើបទប្បញ្ញត្តិទាំងឡាយដែលមានចែងក្នុងធម្មនុញ្ញអង្គការសហប្រជាជាតិ និងក្នុងអនុសញ្ញាទីក្រុងវីយែន ស្តីពីទំនាក់ទំនងការទូតឆ្នាំ១៩៩១ ត្រូវបានបង្កឡើងដោយស្ថានបេសកកម្មដែលតំណាងឲ្យប្រទេសដែលអរិយធម៌មួយ”៕