ភ្នំពេញ ៖ លោក គង់ វិមាន អនុរដ្ឋលេខាធិការនិងជានាយខុទ្ទកាល័យក្រសួងសាធារណការ នៅថ្ងៃទី៣០ ខែកក្កដា នេះ ចេញមុខមកបញ្ជាក់ថា ផ្លូវគោកចែកចេញជា២ប្រភេទនិងបានស្នើឲ្យអ្នកបកស្រាយខុសសូមកែតម្រូវផង ។
ការចេញមុខមកបកស្រាយនេះគឺក្រោយពីបេក្ខជន កៅ សីហា ឆ្លើយបានត្រឹមត្រូវហើយក្នុងកម្មវិធី Heaven or Hell Cambodia តែបែជាមេប្រយោគនាងកែវនិមលថាខុសទៅវិញ ។
កម្មវិធីល្បងប្រាជ្ញា Heaven or Hell Cambodia បានដាក់សំណួរថា “យោងតាមសៀវភៅវិញ្ញាសារជ្រើសរើសសម្រាប់ថ្នាក់ទី៩ តើនៅប្រទេសកម្ពុជា គេចែកផ្លូវគោកជាប៉ុន្មានប្រភេទ?” ។ លោកកៅ សីហា បេក្ខជនដែលចូលរួមលេង បានជ្រើសរើសចម្លើយ២ប្រភេទគឺមានផ្លូវថ្នល់និងផ្លូវដែក ។ ប៉ុន្តែចម្លើយនោះបែរជាថាមិនត្រឹមត្រូវនោះទេ ដោយចម្លើយដែលត្រឹមត្រូវគឺមាន ៣ប្រភេទ គឺ ផ្លូវជាតិ ផ្លូវខេត្ត និង ផ្លូវរុក្ខបាល។
ដើម្បីកាត់បន្ថយការជជែកវែកញែកខុសលោក គង់ វិមានបានចេញមុខមក សរសេរតាមបណ្តាញសង្គមហ្វេសប៊ុកថា ៖ ចូរឈ្វេងយល់ពីផ្លូវដើម្បីជៀសវាងការខុសឆ្គង ។
ផ្លូវគោកចែកចេញជា ២ ប្រភេទគឺ ៖១). ផ្លូវថ្នល់ និង២). ផ្លូវដែក
ផ្លូវថ្នល់ចែកចេញជា ៤ ប្រភេទទៀត គឺ ៖១). ផ្លូវជាតិ។២). ផ្លូវខេត្ត។៣). ផ្លូវលំ(ផ្លូវជនបទ) និង។៤). ផ្លូវរុក្ខបាល
ចំណែកឯគមនាគមន៍គឺមាន៣ប្រភេទ គឺ ៖១). ផ្លូវគោក។២). ផ្លូវទឹក និង។៣). ផ្លូវអាកាស ។
អ្នកបកស្រាយខុស សូមកែតម្រូវផង ដើម្បីកុំអោយមានការយល់ច្រឡំដល់មហាជន ដោយរាប់អាន ៕
