វៀតណាម៖ នាព្រឹកថ្ងៃទី ៣០ ខែកក្កដា នេះ ប៉ូលិសខណ្ឌ៥ ក្រុងហូជីមីង បានឆ្មក់ចូលក្នុងភោជនីដ្ឋានមួយកន្លែងឈ្មោះ Dragon-K ស្ថិតនៅលើផ្លូវត្រឹងហុងដាវ សង្កាត់១៤ ហើយបានឃាត់ខ្លួនបុគ្គលិកនារីៗចំនួន ៧០នាក់សុទ្ធសឹងតែជានារីវ័យក្មេង មានអាយុចាប់ពី ១៣ឆ្នាំឡើងទៅ យកទៅសាកសួរករណីយ៍ស្លៀកពាក់ស៊ិស៊ីពេក ។
យោងតាមសម្ដីរបស់ប៉ូលិសខណ្ឌ៥ ម្នាក់បានឲ្យដឹងថា ភាគច្រើននៃបុគ្គលិកស្រីៗទាំង ៧០នាក់នោះ គឺសុទ្ធតែមានផ្ទុកនូវសាធាតុញៀន ។ លោកបន្តថា កន្លងមកប៉ូលិសក៏ធ្លាប់បានចុះមកឆែកឆេរក្នុង ភោជនីដ្ឋាន Dragon-K នេះដែរតែពុំមានអ្វីជាបញ្ហាចោទឡើយ ហើយសម្រាប់បុគ្គលិកទៀតសោធ ក៏
ស្លៀកពាក់សមរម្យដែរ មិនដូចជាពេលនេះទេ ។
គួរបញ្ជាក់ថា ទីតាំងភោជនីដ្ឋានខាងលើនេះ ត្រូវបានរកឃើញថា លួចលាក់បើកខារ៉ាអូខេ ដោយគ្មានច្បាប់អនុញ្ញាត្តិ ព្រមទាំងជួញដូរផ្លូវភេទអនីតិជនថែមទៀតផង ។មានការកត់សម្គាល់ថាការចុះបង្ក្រាបនេះគឺក្រោយពីប៉ូលីសវៀតណាម បានចាប់ជនជាតិចិនជាង ៣៨០នាក់ ពាក់ព័ន្ធករណីបើកលេងល្បែងស៊ីសងខុសច្បាប់តាមប្រព័ន្ធអ៊ិនធើណែត នៅក្នុងទីក្រុងហៃហ្វុងចម្ងាយ១០០ គីឡូម៉ែត្រ ពីភាគខាងកើតនៃទីក្រុងហាណូយ។នេះបើតាមការចុះផ្សាយដោយ Aljazeera នៅថ្ងៃទី៣០ ខែកក្កដានេះ។
ក្រសួងមហាផ្ទៃវៀតណាមកាលពីថ្ងៃចន្ទម្សិលមិញ បានធ្វើសេចក្តីថ្លែងការណ៍មួយនៅលើគេហទំព័រផ្លូវការរបស់ខ្លួនថា ជនជាតិចិនដែលត្រូវបានចាប់ខ្លួន មានអាយុចន្លោះពី ១៨ ទៅ ២៤ឆ្នាំ។ ប្រតិបត្តិការនេះ ប៉ូលីសវៀតណាមបានរកឃើញ ម៉ាស៊ីននិងឧបករណ៍ដែលត្រូវបានរចនាឡើងសម្រាប់សកម្មភាពលេងល្បែងតាមអ៊ិនធើណែតរួមមានទូរស័ព្ទ ជិត ២,០០០គ្រឿង កុំព្យូទ័រយួរដៃ ៥៣៣គ្រឿង សាច់ប្រាក់ និងអេធីអឹមជាច្រើនផងដែរ។
ករណីនេះជាការបំបែកសំណុំរឿងដ៏ធំ របស់ប៉ូលីសវៀតណាម ដែលបានរកឃើញការភ្នាល់ល្បែង ប្រព្រឹត្តិដោយជនបរទេស ជាមួយទំហំទឹកប្រាក់ដ៏ច្រើន។ កាលពីខែវិច្ឆិកា និងខែតុលាឆ្នាំមុន វៀតណាមបានដាក់គុកមន្ត្រីប៉ូលីសជាន់ខ្ពស់ពីររូបដែលបានរកឃើញថាជាប់ពាក់ព័ន្ធបើកការលេងល្បែងតាមប្រព័ន្ធអ៊ិនធើណែត ដែលកាលនោះបានរៃអង្គាសប្រាក់បានរាប់លានដុល្លារ៕
