ភ្នំពេញ ៖ សម្តេចនាយករដ្ឋមន្ត្រី ហ៊ុន សែននៅព្រឹកថ្ងៃទី២៩កក្កដា បានថ្លែងជាឧទាហរណ៍ថា៖ ប្រសិនបើច្បាប់ស្តីពី«ដំណើរការប្រជាធិបតេយ្យនៅកម្ពុជា»ត្រូវបានឆ្លងផុតព្រឹទ្ធសភា និងប្រធានាធិបតីអាមេរិកមែន ក៏វាមិនប៉ះពាល់អ្វីដល់ប្រជាជនខ្មែរជិត១៦លាននាក់ឡើយ។
ច្បាប់នេះវា នឹងប៉ះពាល់តែលើមន្ត្រីរាជរដ្ឋាភិបាលយ៉ាងច្រើនណាស់១០០នាក់តែប៉ុណ្ណោះ។ សម្តេចបញ្ជាក់ថា៖សម្តេចមិនជឿថា មន្ត្រីរបស់លោក និងកូនៗរបស់លោក គឺលោកស្រី ហ៊ុន ម៉ាលី និងលោក ហ៊ុន ម៉ានិត មានលុយរាប់រយលានដុល្លាររក្សាទុកនៅក្រៅប្រទេសឡើយ ។តែសម្តេចបង្ហើបថា គឺមានតែកូនរបស់លោក អ៊ិត ប្រាង រដ្ឋលេខាធិការក្រសួងរ៉ែ និងថាមពល ប៉ុណ្ណោះ ដែលមានចំការទំពាំងបាយជូនៅអាមេរិក។
ថ្លែងនៅក្នុងពិធីពិនិត្យការដ្ឋានសាងសង់ពហុកីឡដ្ឋានជាតិថ្មីនៅ សង្កាត់ព្រែកតាសេក ខណ្ឌជ្រាយចង្វារ រាជធានីភ្នំពេញ សម្តេច ហ៊ុន សែន បានជំរុញឲ្យអាមេរិកពន្លឿនការរឹបអូសប្រាក់របស់កូនៗលោក និងប្រាក់របស់មន្ត្រីរដ្ឋាភិបាលកម្ពុជាមួយចំនួនទៀត ប្រសិនបើពួកគេមានលុយចាយមិនអស់ ហើយយកទៅផ្ញើទុកនៅក្រៅប្រទេសមែននោះ។
សូមរំឭកថា សភាតំណាងរាស្ត្រសហរដ្ឋអាមេរិក ឬសភាជាន់ទាប កាលពីថ្ងៃទី១៦កក្កដា បានអនុម័តជាឯកច្ឆ័ន្ទលើសេចក្តីស្នើច្បាប់ស្តីពីលទ្ធិប្រជាធិបតេយ្យកម្ពុជា ឬH.R. 526។
ខ្លឹមសារនៃច្បាប់នេះ នឹងដាក់ទណ្ឌកម្មលើមន្ត្រីជាន់ខ្ពស់នៅកម្ពុជាដែលស្និទនឹងលោកនាយករដ្ឋមន្ត្រី ហ៊ុន សែន ជាប់ពាក់ព័ន្ធនឹងការរំលោភសិទ្ធិមនុស្ស ដែលគេសំដៅដល់ការរំលាយគណបក្សសង្គ្រោះជាតិ។
សម្តេចនាយករដ្ឋមន្ត្រីកម្ពុជា បានថ្លែងថា បើទោះបីជាគ្មានប្រាក់ចំណូលបន្ថែម ក៏កម្ពុជាមានលទ្ធភាពបើកប្រាក់ខែឲ្យ មន្ត្រីរាជការ ឬកម្លាំងប្រដាប់អាវុធលើសពីមួយឆ្នាំដែរ។
ដោយមិនគិតប្រាក់បម្រុងអន្តរជាតិប្រមាណ១៥ពាន់លានដុល្លារ សម្តេច បញ្ជាក់ថា កម្ពុជាមានសាច់ប្រាក់សុទ្ធ ដែលតម្កល់នៅរតនាគារជាតិ និងផ្ញើនៅធនាគារជាតិឡើងជិត១៤លានលានរៀល (១លានលានរៀលស្មើ២៥០លានដុល្លារ) ហើយមួយខែចំណាយប្រមាណ៣០០លានដុល្លារប៉ុណ្ណោះ ខណៈប្រាក់ចំណូលរបស់កម្ពុជាមានលើសពី៤០០លានដុល្លារក្នុងមួយខែ។ លោកបន្ថែមថា កម្ពុជាអាចដំឡើងប្រាក់ខែឲ្យមន្ត្រីរាជការ ហើយបើកប្រាក់ទាំងនោះ២សប្តាហ៍ម្តងថែមទៀតក៏បាន។
សូមជម្រាបជូនថាសម្រាប់រយៈពេល១ឆមាសឆ្នាំ២០១៩នេះ ធនាគារជាតិកម្ពុជាបានបង្កើនទុនបម្រុងអន្តរជាតិដុលកើនដល់ប្រមាណ១១,១ពាន់លានដុល្លារ។ នេះបើតាមការលើកឡើងរបស់លោកស្រី ជា សិរី អគ្គនាយិកាបច្ចេកទេសនៃធនាគារជាតិ ដែលដកស្រង់សំដីដោយសារព័ត៌មានអនឡាញថ្មីៗ កាលពីថ្ងៃទី ២៨ ខែកក្កដា។
លោកស្រី ជា សិរី អះអាងថា ប្រសិនបើមានការហ៊ុមព័ទ្ធសេដ្ឋកិច្ចណាមួយ កម្ពុជានឹងមានលទ្ធភាពទប់ទល់បញ្ហាទាំងនោះបានរយៈពេល ៥ខែ តាមរយៈទុនបម្រុងអន្តរជាតិ ដែលកម្ពុជាមានស្រាប់។ ទោះជាយ៉ាងណាគេមិនឮការនិយាយថាក្រោយពី៥ខែឬ១ឆ្នាំក្រោយបានអីចាយនោះឡើយ។
ទោះជាបែបនេះក្តី សម្តេចនាយករដ្ឋមន្ត្រី ហ៊ុន សែន ជឿថា ច្បាប់នេះនឹងមិនអាចចេញរួចឡើយ ដោយលោកអះអាងថា ប្រធានាធិបតីអាមេរិក លោក ដូណាល់ ត្រាំ នឹងមិនល្ងង់រុញកម្ពុជាចេញទំនាក់ទំនងរបស់ខ្លួនទេ។
សូមបញ្ជាក់ថា សេចក្តីស្នើច្បាប់នេះ ត្រូវបានខកខានអនុម័តម្តងហើយ កាលពីចុងឆ្នាំ២០១៨ ដោយសារតែសភាអាមេរិកឈប់សម្រាក។ យ៉ាងណាក៏ដោយ សេចក្តីស្នើច្បាប់ដែលមានខ្លឹមសារដាក់ទណ្ឌកម្មលើមន្ត្រីរដ្ឋាភិបាលកម្ពុជានៅពេលនេះ គឺត្រូវឆ្លងកាត់សភាជាន់ខ្ពស់ឬព្រឹទ្ធសភាអាមេរិកមួយជំហានទៀត មុននឹងបញ្ជូនទៅលោកប្រធានាធិបតី ដូណាល់ ត្រាំ ធ្វើការចុះហត្ថលេខាដាក់ឲ្យប្រើជាផ្លូវការ។
សូមបញ្ជាក់ថាពហុកីឡដ្ឋានជាតិ មរតកតេជោ ដែលបាន និងកំពុងដំណើរការសាងសង់ នៅលើផ្ទៃដី ទំហំជាង ៨៥ ហិកតា ក្នុងតំបន់អភិវឌ្ឍន៍របស់លោកឧកញ៉ា លី យ៉ុងផាត់មានតម្លៃជាង១៥០លានដុល្លារអាមេរិកលុយចិនឲ្យ ។ សំណង់ពហុកីឡដ្ឋានជាតិ សាងសង់ជា ៣ ដំណាក់កាល ដោយមានរចនាសម្ព័ន្ធកីឡាសំខាន់ៗដូចជា មណ្ឌលកីឡាក្នុងសាលមណ្ឌលកីឡាហែលទឹក, សាលហាត់កីឡាប្រយុទ្ធ, អគារស្នាក់នៅ ,អាហារដ្ឋាន ,ទីលានហ្វឹកហាត់ក្រៅអគារ , សាលវេជ្ជសាស្ត្រ វិទ្យាសាស្ត្រកីឡា ,សាលហាត់សាច់ដុំ ,សាលកាយសម្ព័ន្ធ, សាលកីឡាបាញ់កាំភ្លើង,មជ្ឈមណ្ឌលកីឡាហុកគី និងសាលកីឡាប្រពៃណីផងដែរ។
ការសម្រេចចិត្តសាងសង់ពហុកីឡដ្ឋានជាតិថ្មីនេះ ដើម្បីលើកស្ទួយវិស័យកីឡា និងមួយផ្នែកទៀត សម្រាប់កម្ពុជាឈានឆ្ពោះ ទៅធ្វើជាម្ចាស់ផ្ទះរៀបចំការប្រកួតកីឡាតំបន់អាស៊ាន ហៅថា Sea Grame នៅឆ្នាំ២០២៣ ៕
