ភ្នំពេញ ៖ លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌កាលពីថ្ងៃទី២៥ ខែកក្កដា ឆ្នាំ២០១៩ បានចេញប្រកាសសម្រេចផ្អាកមុខងារ លោក ជា ពេជ្រពីតួនាទី ព្រះរាជអាជ្ញា នៃអយ្យការអមសាលាដំបូងខេត្តរតនគិរី ជាបណ្តោះអាសន្ន ក្រោយតំណាងអយ្យការ អមសាលាដំបូងរាជធានីភ្នំពេញ ចោទប្រកាន់ពីបទ “ផិត”។
យោងតាមលិខិតលេខ១៤០២ ចុះថ្ងៃទី២៥ ខែកក្កដា ឆ្នាំ២០១៩ បានបញ្ជាក់ថា កាលពីថ្ងៃទី២៤ ខែកក្កដា ឆ្នាំ២០១៩ ក្រសួងយុត្តិធម៌ បានទទួលលិខិតជូនដំណឹងលេខ៦៥១ អយប របស់អយ្យការអមសាលាដំបូងរាជធានីភ្នំពេញ ស្តីពីការចោទប្រកាន់ លើលោក ជា ពេជ្រ ព្រះរាជអាជ្ញា នៃអយ្យការអមសាលាដំបូងខេត្តរតនគិរី ពីបទ “ផិត” ប្រព្រឹត្តនៅខេត្តរតនគិរី និងរាជធានីភ្នំពេញ កាលពីអំឡុងឆ្នាំ២០១៧ រហូតដល់ឆ្នាំ២០១៩ យោងតាមមាត្រា១០ នៃច្បាប់ស្តីពី ឯកព័ន្ធភាព។
លោក ជិន ម៉ាលីន អ្នកនាំពាក្យក្រសួងយុត្តិធម៌ ប្រាប់កាសែតថា កាលណាលោក ជា ពេជ្រ ជាប់បណ្តឹងនៅតុលាការ គឺ ក្រសួងយុត្តិធម៌ ត្រូវផ្អាកការងារលោកជាបណ្តោះអាសន្ន សិន ដើម្បីដំណើរនីតិវិធីតុលាការ ។ ប៉ុន្តែប្រសិនបើរកឃើញថា លោក ជា ពេជ្រ មានទោសដូចការចោទប្រកាន់មែន គឺ លោក ជា ពេជ្រ អាចត្រូវលុបឈ្មោះចេញពីក្របខ័ណ្ឌ ។ ផ្ទុយទៅវិញ ប្រសិនបើរកឃើញថា លោក ជា ពេជ្រ មិនមានកំហុសទេ គឺ លោកអាចចូលបំពេញការងារជាធម្មតា វិញ ។
លោកស្រី ហ៊ាន លក្ខិណា ជាភរិយាដើម របស់លោក ជា ពេជ្រ ព្រះរាជអាជ្ញា នៃអយ្យការអមសាលាដំបូងខេត្តរតនគិរី កាលពីថ្ងៃទី២៥ ខែកុម្ភៈ ឆ្នាំ២០១៩ បានប្តឹងលោក ជា ពេជ្រ ចូលស្ថាប័នអយ្យការអមសាលាដំបូងរាជធានីភ្នំពេញ ពីបទ “ផិត” បន្ទាប់ពីលោកស្រីរកឃើញថា លោក ជា ពេជ្រ បានលួចលាក់មានប្រពន្ធចុងរហូតមានកូនប្រុសម្នាក់ក្នុងពេលដែលបានដាក់ពាក្យលះលែងប្រពន្ធដើម!។
លោកងិនពេជ្ររាជអាជ្ញារងតុលាការរាជធានីទទួលបានវាសនាតម្លើងតួនាទីជំនួនកន្លែងលោកជាពេជ្រ!។សូមបញ្ជាក់ដែរថាលោករាជអាជ្ញារងតុលារការខេត្តកោះកុងឈ្មោះអ៊ងរីក៏ទើបត្រូវបានដកបញ្ឈរជើងផងដែរព្រោះតែរឿងប្រពន្ធតាមទាន់ពេលដេកជាមួយស្រីនៅផ្ទះសំណាក់៕
