កំពង់ស្ពឺ ៖ លោក ឃួង ស្រេង អភិបាលរាជធានីភ្នំពេញបាន ស្នើឱ្យនាយទាហានជាសិក្ខាកាម ថ្មីទាំងអស់នៃសាលហ្វឹកហ្វឺនយោធាត្មាតពងត្រូវ ចេះគិតពិចារណា និងនិយាយការពិតនៅចំពោះមុខប្រវត្តិសាស្ត្រ ចំពោះមេដឹកនាំ របស់ខ្លួន និងបន្តការពារស្ថាបនិកសន្តិភាពរបស់កម្ពុជា គឺសម្តេចតេជោ ហ៊ុន សែន ឱ្យបានគង់វង្សយូរអង្វែង ដើម្បីបន្តដឹកនាំប្រទេសឱ្យកាន់តែរីកចម្រើនថែមទៀត។
ខណៈអញ្ជើញ ធ្វើបាឋកថា និងសំណេះសំណាល ជាមួយយោធាចារ្យ នាយទាហាន នាយទាហានរង ពលទាហាន និងនិស្សិតនាយទាហានសកម្មជិត១ពាន់នាក់ នៅសាលានាយ ទាហានសកម្ម (ត្មាតពង) ស្ថិតនៅឃុំដំណាក់វាំង ស្រុកឧដុង្គ ខេត្តកំពង់ស្ពឺ លោកឃួងស្រេងបានរម្លឹកពីវីរភាពដឹកនាំដ៏ឈ្លាសវៃ របស់ប្រមុខដឹកនាំកំពូល សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលបានធ្វើពលីកម្មគ្រប់បែបយ៉ាង ដើម្បីរំដោះប្រទេសជាតិ ចេញពីភ្លើងសង្គ្រាម និងដឹកនាំកសាងប្រទេសពីបាតដៃទទេ រហូតដល់សពថ្ងៃនេះ មានការអភិវឌ្ឍរីកចម្រើនលើគ្រប់វិស័យ។
លោកឃួង ស្រេង និងគណៈប្រតិភូសាលារាជធានីភ្នំពេញ បាននាំនូវអំណោយរបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិ ព្រឹទ្ធបណ្ឌិត ប៊ុន រ៉ានី ហ៊ុនសែន ទៅផ្តល់ជូននាយទាហានជាសិក្ខាកាម ព្រមទាំងបានផ្តល់នូវថវិកាសម្រាប់កសាងរបងប៉ែកខាងត្បូងសាលានាយ ទាហានសកម្ម និងទទួលយកសំណើ សុំកសាងអគាររបស់នាយកសាលា មកពិនិត្យនិងពិភាក្សា ដើម្បីពិនិត្យលទ្ធភាពដោះស្រាយជូនផងដែរ។
លោក ឧត្តមសេនីយ៍ឯក ប៊ុត សុភាព នាយកសាលានាយទាហានសកម្ម មានប្រសាសន៍ឱ្យដឹងថា ចាប់ពីឆ្នាំ១៩៩៥ ដល់២០១៩ សាលាបានបណ្តុះបណ្តាលនាយទាហានសកម្មបានចំនួន១៥វត្ត ដែលមាននាយទាហានចំនួន១៥៨២នាក់ (ស្រី១០៦នាក់)បានចេញ ពីសាលានាយទាហានសកម្ម ទៅបម្រើការងារ តាមបណ្តាកងឯកភាពនានា។
