ខេត្តព្រះសីហនុ ៖ អ្នកកាសែត២នាក់ ដែលកម្លាំងកងរាជអាវុធហត្ថខេត្តសីហនុឃាត់ខ្លួន ជាមួយប្រជាពលរដ្ឋចំនួន ៥នាក់ទៀត កាលពីថ្ងៃទី១៩ ខែកក្កដា ឆ្នាំ២០១៩ពេលចុះយកពត៍មាន ត្រូវបានចៅក្រមសើបសួរសម្រេចដោះលែងអ្នកកាសែត២នាក់ ឲ្យមានសេរីភាពវិញ ប៉ុន្តែបានដាក់ឲ្យស្ថិតក្រោមការត្រួតពិនិត្យតាមផ្លូវតុលាការ។
ដោយឡែកប្រជាពលរដ្ឋចំនួន ៥នាក់ដែលតវ៉ារឿងដីធ្លីរបស់ពួកគាត់ពាក់ព័ន្ធករណីវិវាទដីធ្លី ជាមួយលោកឧកញ៉ា ខូវ សម្បត្តិមានទីតាំងនៅចំណុច ភូមិ១ សង្កាត់លេខ៣ ក្រុង-ខេត្តព្រះសីហនុ ត្រូវបានសាលាដំបូងខេត្តព្រះសីហនុ សម្រេចឃុំខ្លួនដាក់ពន្ធនាគារជាបណ្តោះអាសន្ន។
អ្នកនាំពាក្យសាលាដំបូងខេត្តព្រះសីហនុ លោកលឹម ប៊ុនហេង បានឲ្យដឹងថាសំណុំរឿងដីធ្លីខាងលើនេះ លោក កៀង សុន្ទរោ ព្រះរាជអាជ្ញារងអមសាលាដំបូងខេត្តព្រះសីហនុ បានសម្រេចចោទប្រកាន់ ឈ្មោះ កែរ រតនា ចាងហ្វាងកាសែត TN និង ឈ្មោះ ហ៊ុន សុខា ប្រធានក្លឹបអ្នកកាសែតឯករាជ្យ ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍, ញុះញង់ឲ្យប្រព្រឹត្តតាមផ្លូវសារព័ត៌មាន និងសមគំនិត ក្នុងអំពើហិង្សាលើអ្នកកាន់កាប់អចលនវត្ថុដោយសុចរិត តាមមាត្រា៤៩៥ មាត្រា៤៩៧ និង មាត្រា២៩ នៃក្រមព្រហ្មទណ្ឌ និង មាត្រា២៥៣ នៃច្បាប់ភូមិបាល(មិនប្រើច្បាប់សារពត៍មានដូចរដ្ឋមន្ត្រីក្រសួងពត៍និយាយទេដែលធ្វើឲ្យមានការសង្ស័យពីសេរីភាពសារពតិ៍ត្រុវបានគេប្រើប្រពន្ធតុលាការដើម្បីរឹតត្បិត)។
ប្រជាពលរដ្ឋចំនួន ៥នាក់ដែលត្រូវគេឃុំខ្លួនមានឈ្មោះ ហង្ស សុភា ភេទស្រី អាយុ៤៩ឆ្នាំ , ឈ្មោះ ហង្ស ចិន្តា ភេទស្រី អាយុ៥១ឆ្នាំ , ឈ្មោះ សែន លក្ខិណា ភេទស្រី អាយុ៣២ឆ្នាំ , ឈ្មោះ ប៉ែន ស៊ីណាត ភេទស្រី អាយុ៥៧ឆ្នាំ និង ឈ្មោះ ហេង យោង ភេទប្រុស អាយុ៥០ឆ្នាំ ដោយចោទប្រកាន់ពីបទ ប្រើអំពើហិង្សាលើអ្នកកាន់កាប់អចលនវត្ថុដោយសុចរិត , បទញុះញង់ឲ្យប្រព្រឹត្តបទឧក្រិដ្ឋជាអាទិ៍ , និង កំហែងយក តាមមាត្រា២៥៣ នៃច្បាប់ភូមិបាល , មាត្រា៣៦៣ និង មាត្រា៣៦៤ នៃក្រមព្រហ្មទណ្ឌ។
