ខេត្តប៉ៃលិន៖ ព្រឹកថ្ងៃទី៤ ខែសីហា ឆ្នាំ២០១៦ នៅសាលប្រជុំធំសាលាខេត្ត មានរៀបចំពិធីបើកវគ្គបណ្តុះបណ្តាលស្តីពីបដិសណ្ឋារកិច្ច ផ្នែកសេវាកម្មភ្ញៀវទេសចរណ៍ ជូនដល់មន្ត្រីអន្តោរប្រវេសន៍ ប្រចាំច្រទ្វារអន្តរជាតិព្រំ ខេត្តប៉ៃលិន ក្រោមអធិបតីភាព លោក ហោ សារុន អនុរដ្ឋលេខាធិកាក្រសួងទេសចរណ៍ តំណាងដ៏ខ្ពង់ខ្ពស់របស់លោកបណ្ទិត ថោង ខុន រដ្ឋមន្ត្រីក្រសួងទេសចរណ៍ ,លោក អៀង វុធ អភិបាលរងខេត្តប៉ៃលិន ព្រមទាំងមានការចូលរួមពីប្រធាន អនុប្រធានមន្ទីរជំនាញ ,មន្ត្រីអន្តោរប្រវេសន៍ ,មន្ត្រីនៃបញ្ជាការដ្ឋានកងរាជអាវុធហត្ថខេត្ត ,មន្ត្រីនៃស្នងការនគរបាលខេត្ត សរុប៨៥នាក់។
លោក ហុង ឌុល ប្រធានមន្ទីរទេសចរណ៍ខេត្តប៉ៃលិន បានឲ្យដឹងថា៖ រយៈពេល០៦ខែ ដើមឆ្នាំ២០១៦នេះ ភ្ញៀវទេសចរណ៍ជាតិ អន្តរជាតិ មានការកើនឡើង២០.៥៨% បើប្រៀបធៀបរយៈពេលដូចគ្នា ក្នុងឆ្នាំ២០១៥ ។ ក្នុងនោះដែរភ្ញៀវទេសចរណ៍ ដែលមកកំសាន្តលេងនៅខេត្តប៉ៃលិន ពួកគាត់មានចំណាប់អារម្មណ៍ទៅលើរមណីយដ្ឋានបែបប្រវត្តិសាស្ត្រ និងជំនឿ ដូចជា រមណីយដ្ឋានភ្នំយ៉ាត ,រមណីយដ្ឋានទឹកធ្លាក់ក្បាលអូរតាវ៉ៅ ,ទឹកធ្លាក់៧ជាន់ លើកំពូលភ្នំខៀវ ជាដើម ។
លោកប្រធានមន្ទីរ បានបន្តឲ្យដឹងថា៖ វិស័យទេសចរណ៍ខេត្តប៉ៃលិន មានចំណុចគោលដៅជាច្រើន មានសណ្ឋាគារដ៏ល្អប្រណិត មិនចាញ់ផ្កាយទេ ផ្ទះសំណាក់ស្នាក់នៅ មានសេវាល្អស្អាត ភោជនីយដ្ឋាន អាហារដ្ឋានតូចធំស្នាដៃចម្អិនឆ្ងាញ់ពិសា ព្រមទាំងតំលៃសមរម្យ ។ ជាងនេះទៅទៀតខេត្តប៉ៃលិន មានសក្តានុពលកសិដ្ឋានយ៉ាងធំល្វឹងល្វើយ ដោយប្រជាពលរដ្ឋដាំដុះដំឡូង ពោត មៀនប៉ៃលិន ទូរ៉េន សាវម៉ាវ និងដំណាំផ្សេងៗទៀត ដែលធ្វើខេត្តប៉ៃលិនក្លាយជាតំបន់កសិទេសចរណ៍ អាចឲ្យភ្ញៀទេសចរណ៍ទស្សនាបានដោយសប្បាយរីករាយផងដែរ ។
លោក អៀង វុធ អភិបាលរងនៃគណៈអភិបាលខេត្តប៉ៃលិន តំណាងដ៏ខ្ពង់ខ្ពស់លោក កើត សុធា អភិបាលខេត្តប៉ៃលិន បានឲ្យដឹងថាៈ ថ្ងៃនេះ អាជ្ញាធរខេត្តប៉ៃលិន មានសេចក្តីសោមនស្សក្រៃលែង ដែលថ្នាក់ដឹកនាំក្រសួងទេសចរណ៍ បានផ្តល់នូវជំនាញចំណេះដឹងបដិសណ្ឋារកិច្ច ផ្នែកសេវាកម្មភ្ញៀវទេសចរណ៍ ដល់សមត្ថកិច្ចពាក់ព័ន្ធ និងដល់ម្ចាស់ បុគ្គលិកមូលដ្ឋានអាជីវកម្មសេវាកម្មទេសចរណ៍ក្នុងខេត្តប៉ៃលិនយើង ហើយនេះក៏ជាចលនាជម្រុញលើកកំពស់ ការអភិវឌ្ឍន៍ជំនាញទេសចរណ៍ ព្រមទាំងពង្រឹងគុណភាពសេវាកម្មឲ្យកាន់តែប្រសើរឡើងថែមទៀត ។
លោកអភិបាលរងខេត្ត បន្តឲ្យដឹងដែរថា៖ ក្នុងរយៈពេលជាងមួយទសវត្សរ៍នេះ ខេត្តប៉ៃលិន បានប្រែក្លាយខ្លួនយ៉ាងឆាប់រហ័ស ពីខេត្តដែលញ៉ុំញ៉ីដោយសង្គ្រាមស៊ីវិល ទៅជាខេត្តមានសន្តិភាព ស្ថេរភាព សន្តិសុខ សណ្តាប់ធ្នាប់សង្គម ប្រជាធិបតេយ្យ មាសិទ្ធិសេរីភាព មានកំណើនសេដ្ឋកិច្ច ជីវភាពក្រីក្រត្រូវបានកាត់បន្ថយជាបន្តបន្ទាប់ ក្រោមនយោបាយ ឈ្នះ ៗរបស់សម្តេចអគ្គមហាសេនាបតី តេជោ ហ៊ុន សែន ប្រមុខរាជរដ្ឋាភិបាលកម្ពុជា ។
ថ្លែងក្នុងពិធីបើកវគ្គបណ្តុះបណ្តាលជំនាញបដិសណ្ឋារកិច្ច ជូនមន្ត្រីពាក់ព័ន្ធលោក ហោ សារុន អនុរដ្ឋលេខាធិកាក្រសួងទេសចរណ៍ បានឲ្យដឹងថា៖ ក្នុងឆ្នាំ២០១៥ កន្លងទៅ កម្ពុជាទទូលបានភ្ញៀវទេសចរណ៍អន្តរជាតិចំនួន ៤,៨លាននាក់ កើនឡើង៦,១% បើធៀប និងឆ្នាំ២០១៤ ជាមួយចំណូលប្រមាណ៣.០១២លានដុល្លា ។ ហើយក្នុងរយៈពេល៥ខែ ដើមឆ្នាំ២០១៦នេះ កម្ពុជាទទូលបានភ្ញៀវទេសចរណ៏អន្តរជាតិចំនួន ២.០៣០.៧៦២នាក់ កើនឡើងចំនួន២,៦% បើប្រៀបធៀបទៅនិងរយៈពលដួចគ្នាក្នុងឆ្នាំ២០១៥ ។ លោកអនុរដ្ឋលេខាធិកាក្រសួងទេសរចណ៍ បានបន្តឲ្យដឹងទៀតថា៖ ក្នុងបរិបទនេះ ប្រទេសកម្ពុជាក្រោមការដឹកនាំ ដ៏ត្រឹមត្រួវ និងឈ្លាសវៃប្រកបដោយគតិបណ្ទិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងវិស័យទេសចរណ៍ ដែលជាវិស័យអទិភាពដ៏សំខាន់មួយ ក្នុងការកសាងសេដ្ឋកិច្ចសង្គម ដោយបាននាំមកនូវចំណូលជូនជាតិ ផ្តល់ឪកាសការងារ និងចូលរួមចំណែកការកាត់បន្ថយភាពក្រីក្រ របស់ប្រជាពលរដ្ឋ ប្រកបដោយប្រសិទ្ធភាព។
ការរីកចំរើននៃវិស័យទេសចរណ៏កម្ពុជា បានឆ្លុះបញ្ចាំអំពីសារៈសំខាន់ កត្តាសន្តិសុខ សុវត្ថិភាព ស្ថេរភាពនយោបាយ ដែលជាកក្តាកំណត់ និងជាមូលដ្ឋានសម្រាប់ធានាចីរភាពនៃកំណើនវិស័យទេសចរណ៍ផងដែរ ៕
អត្ថបទ ទូច សុខន ប៉ៃលិន