(ខេត្តកំពង់ឆ្នាំង) ៖ ប្រជាពលរដ្ឋ ២គ្រួសាររស់នៅក្នុងភូមិថ្មី ឃុំតាំងក្រសាំង ស្រុកទឹកផុស ខេត្តកំពង់ឆ្នាំងបានរងគ្រោះនិងចោទប្រកាន់ថា៖ មានមានឈ្មួញទិញដីបានប្រើគ្រឿងចក្រឈូសឆាយធ្វើផ្លូវរំលោភចូលដីរបស់ពួកគាត់ យ៉ាងអយុត្តិធម៌បំផុត ពួកគាត់បានសំណូមពរដល់អាជ្ញាធរស្រុក និងឯកឧត្តមអភិបាលខេត្តកំពង់ឆ្នាំងសីមមេត្តាជួយពួកគាត់ផង ។
ជួបជាមួយភ្នាក់ងារយើងនៅព្រឹកថ្ងៃទី ២១ ខែកក្កដា ឆ្នាំ២០១៩ ប្រជាពលរដ្ឋរងគ្រោះទាំងពីរគ្រួសារបាននិយាយថា៖ ពួកគាត់បានកាន់កាប់ដីនេះតាំងពីឆ្នាំ១៩៧៩ មកម្ល៉េះ ដោយបានកាប់ឆ្ការព្រៃនៅខាងក្រោយភូមិនិងមានដាំដំណាំដាំដុះទៀតផង ។ ស្រាប់តែពេលនេះមានឈ្មួញបានដាក់គ្រឿងចក្រមកឈូសឆាយធ្វើផ្លូវសម្រាប់ចូលដីរបស់គេ ធ្វើឲ្យប៉ះពាល់ចូលដល់កន្ទុយដីភូមិរបស់ពួកគាត់ ដោយគ្រួសារប៉ះ២៩ម៉ែត្រនិង គ្រួសារ១ទៀតប៉ះ៣១ ម៉ែត្រ ។
គាត់បានប្រាប់ទៅលោកមេភូមិហើយ និងបានឃើញលោកអនុប្រធានភូមិ ក៏បានមកជួយឃាត់ដែរតែ ប៉ុន្តែអ្នកឈូសឆាយទាំងនោះមិនព្រមស្ដាប់ឡើយ ហេតុនេះហើយគាត់មានតែសំណូមពរដល់អាជ្ញាធរខេត្តអាជ្ញាធរស្រុក និងអាជ្ញាធរខេត្ត សូមមេត្តាជួយរកយុត្តិធម៌ដល់គ្រួសារគាត់ផង ។ ជុំវិញបញ្ហាខាងលើនេះដែរ ស្ត្រីឈ្មោះ សំ គន្ធា ដែលអះអាងថាជាម្ចាស់ដីបាននិយាយប្រាប់ភ្នាក់ងារយើងដោយមិនអនុញ្ញាតឲ្យថតសម្ភាសន៍យករូបភាពនិងសំឡេងថា៖ គាត់បានទិញដីជាង ១២ហិកតា នៅខាងក្រោយភូមិពី ឈ្មោះ អ៊ុន ណាវី ហៅ ចែស្រី នៅឆ្នាំ២០០៧។
ស្ត្រីរូបនោះ បានអះអាងថា៖មានប្លង់ដឺម៉ាស់ត្រឹមត្រូវពីមន្ត្រីជំនាញតែមិនព្រមបង្ហាញ ។ បន្ទាប់មកក៏បានទិញដីជាប់ថ្នល់គ្រួសក្រហម ដើម្បីយកធ្វើផ្លូវចូលទៅកាន់ដី១២ហិកតា ដែលបានទិញពីឈ្មោះចែស្រី នោះ ដោយឈូកយកទំហំ៣០ ម៉ែត្រ គុណនឹង បណ្ដោយជាង២០០ម៉ែត្រ ។ ចំពោះការចោទប្រកាន់របស់ប្រជាពលរដ្ឋ ទាំង២គ្រួសារខាងលើ បើពួកគាត់មានប័ណ្ណកម្មសិទ្ធិត្រឹមត្រូវ សូមទៅប្តឹងដល់មេឃុំចុះ គាត់ធ្វើតាមតែប្លង់ដែលបានទិញពីឈ្មោះ អ៊ុន ណាវី ហៅស្រីតែប៉ុណ្ណោះ។
យ៉ាងនេះក្តីគេសង្កេតឃើញថាទាំងម្ចាស់គ្រឿងចក្រ ទាំងម្ចាស់ដីដែលអះអាងថាពេលទិញដីពីប្រជាពលរដ្ឋសុទ្ធ តែបានបំពានទាំងស្រុងលើអាជ្ញាធរភូមិផងខណៈដែលមានលោកអនុប្រធានភូមិបានហាមឃាត់យ៉ាងណា នៅតែមិនស្តាប់ ដោយលោកអនុប្រធានភូមិបានបញ្ជាក់ថាយើងបានគូសចំនុចដែលត្រូវធើ្វផ្លូវ 30 ម៉ែត្របណ្ដោយ 200 ម៉ែត្រហ្នឹងទៅហើយ ប៉ុន្តែបែរជារំលោភបំពានចូលមកកាន់ចំណែកដីរបស់ប្រជាពលរដ្ឋទៅវិញ៕
