ភ្នំពេញ ៖ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីការពារជាតិ បានចាត់ទុកការផ្សាយរបស់កាសែតអាមេរិកដែលថា កម្ពុជា-ចិន បានចុះហត្ថលេខា ដោយសម្ងាត់ ដើម្បីបោះមូលដ្ឋានកងទ័ពចិន នៅកម្ពុជា គ្រាន់តែជាការមួលបង្គាច់ និយាយបំផ្លើសការពិត ជាពិសេសជាលេស ដើម្បីដាក់ទណ្ឌកម្ម លើកម្ពុជា និងដើម្បីបម្រើមហិច្ឆតា នយោបាយឲ្យក្រុមប្រឆាំងតែប៉ុណ្ណោះ ។ប្រតិមកម្មនេះបានកើតឡើងបន្ទាប់ពីសម្តេចតេជោនាយករដ្ឋមន្ត្រីបានបដិសេធហើយត្រូវបានក្រសួងការបរទេសរំលឹកបន្ថែម!។
ថ្លែងប្រាប់ក្រុមអ្នកសារព័ត៌មាន ក្រោយពិធីបិទវគ្គហ្វឹកហ្វឺនគ្រូបង្គោល វាស់ស្ទង់ សម្រាប់ប្រតិបត្តិការសន្តិភាព អង្គសហប្រជាជាតិ ដើម្បីបង្កើនសមត្ថភាព និងសិក្សាស្រាវជ្រាវជំនាញ TOPO នៅថ្ងៃទី២២ ខែកក្កដា ឆ្នាំ២០១៩នេះ សម្ដេច ទៀ បាញ់ បានមានប្រសាសន៍ថា រឿងនេះពុំមានអ្វីដែលត្រូវឆ្ងល់ទេ ព្រោះអាមេរិករកវិធីគ្រប់បែបយ៉ាង ធ្វើម៉េចរារាំង កុំឲ្យកម្ពុជាមានការអភិវឌ្ឍន៍បាន ហើយក៏រារាំងកម្ពុជា មិនឲ្យមានសមត្ថភាពខ្លាំងក្លាផងដែរ ។
“គេកំពុងគិតថា កម្ពុជាមិនមែននៅក្នុង សេចក្ដីត្រូវការដែលគេចង់បាននោះទេ នេះគឺរឿងពិតវាអីចឹង ដូច្នេះគេចង់និយាយយ៉ាងម៉េច ក៏យើងមិនអាចទៅ ហាមឃាត់គេបានទេ ទោះជាយើងមាន ឬមិនមានក៏ដោយ គេអាចរៀបរាប់ទៅតាមអ្វីដែល គេចង់រៀបរាប់តែប៉ណ្ណោះទេ ។ ដូច្នេះ គឺរឿងពិតគឺអីចឹង ជាក់ស្តែងនៅកម្ពុជា មិនត្រឹមតែរឿងនៅសមុទ្ររាមនោះទេ កន្លែងដទៃក៏ដូចគ្នាហ្នឹងដែរ គឺគ្មានអីការពិតទេ គេរៀបរាប់ឲ្យវាទៅជារឿងផ្សេងទាំងអស់ ហើយខុសពីការពិតទាំងអស់ ដូច្នេះ គឺរឿងហ្នឹង បំណងរបស់គេចង់ធ្វើយ៉ាងណា បម្រើមហិច្ឆតាខាងនយោបាយឲ្យ ក្រុមមួយចំនួនតែប៉ុណ្ណោះ ដូច្នេះគេមិនអើពើមិនគោរពស្អីទាំងអស់” ។
សម្ដេចពិជ័យសេនា បានលើកជាឧទាហរណ៍ថា ប្រសិនបើកម្ពុជា មានកិច្ចសហប្រតិបត្តិការ ជាមួយបណ្តាប្រទេសណាក៏ដោយ មិនថាតែចិនទេ គឺរដ្ឋធម្មនុញ្ញកម្ពុជា បានចែងយ៉ាងច្បាស់ថា កម្ពុជាមិនអនុញ្ញាតឲ្យ មានមូលដ្ឋានយោធាបរទេស នៅលើទឹកដីរបស់ខ្លួនឡើយ ។
