រតនគិរី៖ លោក រ៉ា បូរ៉ាន់ឌី ព្រះរាជអាជ្ញារងអមសាលាដំបូងខេត្តរតនគិរី នៅព្រឹកថ្ងៃទី២២ខែកក្កដា ឆ្នាំ២០១៩នេះបានដឹកនាំកម្លាំងសមត្ថកិច្ចចម្រុះ រួមមានកម្លាំងអាវុធហត្ថខេត្តរតនគិរីកម្លាំងនគរបាលប្រឆាំងបទល្មើសនៃស្នងការនគរបាលខេត្តកម្លាំងរដ្ឋបាលព្រៃឈើផ្នែកលំផាត់កម្លាំងអាវុធហត្ថមូលដ្ឋានក្រុងបានលុង, កម្លាំងនគរបាលអធិការដ្ឋានក្រុងបានលុងនិងអាជ្ញាធរមូលដ្ឋានចុះត្រួតពិត្យដេប៉ូលក់ឈើអារចំនួន៣កន្លែងនៅក្រុងបានលុង ខេត្តរតនគិរី។
លោក ជា កុណារ៉ា នាយផ្នែករដ្ឋបាលព្រៃឈើលំផាត់ បានឲ្យដឹងថាដេប៉ូទាំង ៣កន្លែងនេះរួមមានទី១៖ មានម្ចាស់ឈ្មោះ យិន ថាវី មានទីតាំងនៅភូមិភ្នំស្វាយ សង្កាត់បឹងកន្សែង, ទី២៖ ឈ្មោះ ឌុច ស្រីពៅ មានទីតាំងនៅភូមិជ័យជំនះ សង្កាត់ឡាបានសៀក និងទី៣៖ ឈ្មោះ ភេន ណាវីមានទីតាំងនៅភូមិអូរកន្សែង សង្កាត់បឹងកន្សែង ក្រុងបានលុង ខេត្តរនគិរី។
ក្រោយធ្វើការត្រួតពិនិត្យដេប៉ូលក់ឈើអារទាំង៣ខាងលើនេះរួចលោក រ៉ា បូរ៉ាន់ឌី បានឱ្យដឹងថា ដេប៉ូលក់ឈើអារនីមួយៗ មានច្បាប់អាជីវកម្ម ដែលចេញដោយខណ្ឌរដ្ឋបាលព្រៃឈើដោយក្នុងដេប៉ូនីមួយៗមានចំនួនឈើគ្រប់ទៅនឹងលិខិតធ្វើអាជីវកម្មដូច្នេះពួកគាត់អាចបន្តអាជីវកម្មទៀតបាន។
លោក រ៉ា បូរ៉ាន់ឌី បានបញ្ជាក់ឲ្យដឹងទៀតថាសុំឲ្យខាងម្ចាស់ដេប៉ូលក់ឈើអារខាងលើ បើសិនហួសលិខិតធ្វើអាជីវកម្មត្រូវទៅសុំបន្តនៅខណ្ឌរដ្ឋបាលព្រៃឈើ។
គួរបញ្ជាក់ផងដែរថា សមត្ថកិច្ចចម្រុះចុះត្រួតពិនិត្យតាមដេប៉ូលក់ឈើអារខាងលើនេះ ក្រោយពីមានបទបញ្ជាយ៉ាងម៉ឹងម៉ាត់ពីនាយឧត្តមសេនីយ៍ សៅ សុខា មេបញ្ជាការអាវុធហត្ថលើផ្ទៃប្រទេសនិងជាប្រធានគណៈកម្មាការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិឲ្យសមត្ថកិច្ចគ្រប់លំដាប់ថ្នាក់ ធ្វើការបង្ក្រាបការលួចដឹកជញ្ជូនផលអនុផលព្រៃឈើមិនថាអ្នកតូច អ្នកធំ អ្នកមាន អ្នកក្រនោះទេ គឺមានទោសចំពោះមុខច្បាប់ទាំងអស់គ្នា៕
ដោយ ៖ ចាប សំអាន