ថ្មីៗកន្លងមកនេះ ប្រជាពលរដ្ឋមួយចំនួនក៏ដូចជា មន្ត្រីរាជការខ្លះនៅខេត្តកំពង់ឆ្នាំង បានទម្លាយព័ត៌មានស្តីពី ការចុះបង្ក្រាបបទល្មើសព្រៃឈើមួយករណី ដែលដឹកនាំដោយ លោក ជិន សុផាត ប្រធានការិយាល័យនគរបាល ប្រឆាំងបទល្មើសសេដ្ឋកិច្ចខេត្តកំពង់ឆ្នាំង ។ ប៉ុន្តែប្រការដែលគួរឱ្យភ្ញាក់ផ្អើលដល់អ្នកសារព័ត៌មានក្នុងស្រុកមួយចំនួន ផង ដែលបានចុះទៅដល់កន្លែងកើតហេតុនោះ គឺលោក ជិន សុផាត បានឃុបឃិតជាមួយឈ្មួញជូញដូរឈើប្រណីត នោះ ដោះលែងជនសង្ស័យពីរនាក់ ដែលជាអ្នកបើករថយន្តដឹកជញ្ជូនឈើនេះឱ្យរត់គេចខ្លួនបាត់ ដែលអ្នកឃើញ ហេតុការណ៍បានដាក់ការសង្ស័យថា ទំនងជាមានការស៊ិះស៊ុះត្រូវដងត្រូវផ្លែគាជាមួយសមត្ថកិច្ច ដោយថ្នូរនឹងលាភ សក្ការៈទើបឈ្មូញទាំងពីរនាក់នោះ អាចមានឱកាសរត់គេចខ្លួនបានដោយងាយៗបែបនេះ ។
ប្រភពព័ត៌មានបានបញ្ជាក់ថា ករណីខាងលើនេះ បានកើតឡើងកាលពីរសៀលថ្ងៃទី ២០ ខែមករា ឆ្នាំ២០១៤ កម្លាំងនគរបាលប្រឆាំងបទល្មើសសេដ្ឋកិច្ចខេត្តកំពង់ឆ្នាំង ដឹកនាំដោយលោក ជិន សុផាត បានចុះបង្ក្រាបរថយន្តប្រភេទមួយបាំងកន្លះមួយគ្រឿង ដែលផ្ទុកឈើប្រណីតប្រភេទធ្នង់ និងដើមម្រះព្រៅភ្នំ ចំនួន ២៩ដុំ ក្នុងនោះក៏ចាប់បានជនល្មើស ៣នាក់ ផងដែរ នៅចំណុចឃុំទឹកហូត ។ ប៉ុន្តែក្រោយមកទំនងជាមានការ និយាយចរចាត្រូវគ្នាជាមួយឈ្មួញតាមទូរស័ព្ទគេឃើញលោក ជិន សុផាត ធ្វើសញ្ញាឱ្យជនល្មើសចំនួន ២នាក់ រត់គេចខ្លួនភ្លាម ដោយនៅសល់តែម្នាក់ ។
យោងតាមប្រភពពីអ្នកសារព័ត៌មានក្នុងស្រុកដែលបានឃើញហេតុការណ៍នេះបានឱ្យដឹងថា លោកចៅហ្វាយ ខេត្តកំពង់ឆ្នាំង ពុំទាន់ទទួលបានរបាយការណ៍លំអិតណាមួយពីមន្ត្រីសមត្ថកិច្ចពាក់ព័ន្ធនឹងករណីចាប់ឈើនេះនៅ ឡើយទេ។
ដោយលោកអភិបាលខេត្តកំពង់ឆ្នាំង បានសង្កត់ធ្ងន់ថា ប្រសិនបើមានករណីដោះលែងជនល្មើសព្រៃឈើឱ្យ រត់មែននេះ គឺមន្ត្រីដឹកនាំការបង្ក្រាបករណីនេះ នឹងត្រូវទទួលទោសទៅតាមផ្លូវច្បាប់ ។ ដោយឡែកលោក អាត់ ខែម ស្នងការនគរបាលខេត្តកំពង់ឆ្នាំង ក៏បានឱ្យអ្នកកាសែតដឹងថា បើករណីចាប់ឈើប្រណីតនេះ ហើយសមត្ថកិច្ចប៉ូលិសដឹកនាំការបង្ក្រាបហ៊ានដោះលែងជនប្រព្រឹត្តបទល្មើសឱ្យរត់គេចខ្លួន ជាការពិតមែននោះ លោកនឹងចាត់វិធានការដាក់ពិន័យតាមច្បាប់ ចំពោះមន្ត្រីរូបនោះដោយមិនលើកលែងឡើយ ។
ជុំវិញសេចក្តីរាយការណ៍ចោទប្រកាន់ខាងលើនេះ សារព័ត៌មានដំណឹងភ្នំពេញបានព្យាយាមសាកសួរសុំការបំភ្លឺ ពីលោក ជិន សុផាត អំពីករណីនេះដែរ ប៉ុន្តែពុំមានការឆ្លើយតបទេ ព្រោះទូរស័ព្ទហៅចូល គឺជាប់រវល់រហូត ៕
