ខេត្តកោះកុង៖ ប្រជានេសាទម្នាក់ ដែលធ្លាក់ពីលើទូក មាន់ចែ ចូលទៅក្នុងទឹកសមុទ្រ នៅខាងត្បូងកោះមូល កាលពីព្រឹកម៉ោង ៩ និង៣០នាទី ព្រឹកថ្ងៃទី១៥ ខែកក្កដា ឆ្នាំ២០១៩នេះត្រូវបានកម្លាំងទីបញ្ជាការជួរមុខប្រចាំការ នៅទីស្នាក់ការសង្កេតការណ៍ទ្បាំដាំ និងកម្លាំងកងការពារកោះកុងក្រៅ លេខ២ ជួយសង្គ្រោះបានទាន់ពេល។សំណាងហើយជនរងគ្រោះរូបនេះ មិនមានពាក់អាវពោងសុវត្ថិភាពជាប់ខ្លួន នោះទេ ហើយថា កម្លាំងជំនាញបានជួយសង្គ្រោះទាន់ពេល និងដោយសុវត្ថិភាព។
ក្រោយការជួយសង្គ្រោះជនរងគ្រោះនោះរួច ប្រជានេសាទរូបនេះ បានថ្លែងអំណរគុណ ដល់កងកម្លាំង ដែលបានជួយសង្គ្រោះគាត់បានទាន់ពេល និងបញ្ជូនទៅទីទួលមានសុវត្ថិភាព។ផ្តើមពីបញ្ហានេះ លោកឧត្តមនាវីឯក ទៀ សុខា មេបញ្ជាការរងកងទ័ពជើងទឹក និងជាមេបញ្ជាការទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្របញ្ជាការជួរមុខ គណៈកម្មាធិការជាតិសន្តិសុខលម្ហសមុទ្រ បានក្រើនរំលឹកដល់ប្រជានេសាទសមុទ្រទាំងអស់ មុននឹងធ្វើដំណើរទៅនេសាទសមុទ្រ ត្រូវឲ្យប្រាកដថា មានឧបករណ៍ការពារគ្រោះថ្នាក់ ដូចជាអាវពោងជាដើម ឱ្យបានទាំងអស់គ្នា ដើម្បីការពារសុវត្ថិភាពតាមគ្រួសារនីមួយៗ៕ប្រភពកម្ពុជាថ្ងៃនេះ
