ភ្នំពេញ៖ ឧត្តមសេនីយ៍ទោ ម៉ុក ប៊ុនឈាង អត្តលេខ០២១៧ និងឧត្តមសេនីយ៍ត្រី គង់ ណារិទ្ធ អត្ដលេខ៣៨១៤៥ ឋានៈអនុប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ត្រុវបាននាយឧត្តមសេនីយ៍ គៀត ច័ន្ធថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍សម្រេចចេញលិខិតបង្គាប់ការផ្អាកការងារជាបណ្តោះអាសន្ន ដើម្បីធ្វើការស្រាវជ្រាវ ពាក់ព័ន្ធភាពមិនប្រក្រតី ក្នុងពេលចុះប្រតិបត្តិការ កាលពីថ្ងៃទី២២ ខែឧសភា ឆ្នាំ២០១៩។
នៅក្នុងលិខិតបង្គាប់ការចុះហត្ថលេខាដោយ នាយឧត្តមសេនីយ៍ គៀត ច័ន្ធថារិទ្ធបាន បង្គាប់ឱ្យសាមីខ្លួនបង្ហាញខ្លួននៅនាយកដ្ឋានរដ្ឋបាលសរុប (ការិយាល័យបុគ្គលិក) រៀងរាល់ថ្ងៃធ្វើការ។
សូមបញ្ជាក់ដែរថាការចេញលិខិតបង្គាប់ការបញ្ឈរជើងអនុប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍គឺបានកើតឡើងបន្ទាប់ពីលោកឧត្តមសេនីយ៍ឯក អ៊ុក ហៃសីឡា ដែលជាប្រធាននាយកដ្ឋានស៊ើបអង្កេត និងអនុវត្តនីតិវិធី ត្រូវបានសម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា បានចេញអនុក្រឹត្យតែងតាំងជាអគ្គនាយករងនៃអគ្គនាយកដ្ឋានអន្ដោប្រវេសន៍ ។ សម្ដេចតេជោ ហ៊ុន សែន ក៏បានតែងតាំងលោកឧត្តមសេនីយ៍ទោ វឌ្ឍនៈ មង្គល ជាប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្ដោប្រវេសន៍ជំនួសវិញផងដែរ៕
