ឧត្ដរមានជ័យ៖ កាលពីព្រឹកថ្ងៃសុក្រ ទី ១២ខែកក្កដា ឆ្នាំ ២០១៩ នៅភូមិតាសំ ឃុំអូរស្វាយ ស្រុកត្រពាំងប្រាសាទ ខេត្តឧត្ដរមានជ័យនារីរងគ្រោះទៅដាក់ពាក្យបណ្តឹងឲ្យនគរបាលស្រុក ជួយរកយុត្តិធម៌ក្រោយពីម្តាយចាប់ចងដាក់ច្រវ៉ាក់មិនឲ្យជួបសង្សា ។
សមត្ថកិច្ចបានឲ្យដឹងថា៖ នារីរងគ្រោះ ឈ្មោះ ស៊ុន ស្រីនិច អាយុ១៩ឆ្នាំ ត្រូវម្ដាយ បង្កើត ឈ្មោះ ហៀង មុំ អាយុជាង៤០ រស់នៅភូមិ តាសំ ឃុំអូរស្វាយស្រុកត្រពាំង ប្រាសាទ ខេត្តឧត្ដរមានជ័យបង្ខាំងមិនឲ្យយកប្រុសដែលនាងស្រលាញ់ ។ ។នៅថ្ងៃទី១០ ខែកក្កដា ឆ្នាំ២០១៩ ម្តាយបង្កើតនាងបានវ៉ៃបង្ខាំង ចងនិងដាក់ច្រវ៉ាក់ នៅក្នុងផ្ទះលោករ៉ាត់ (ឈ្មោះហៅក្រៅ)ជាមេប៉ុស្ដិ៍នគរបាលរដ្ឋបាល បាក់អន្លូង(ឃុំផ្សេង) ព្រោះតែចង់បំបែកចេញពីគូដណ្ដឹង របស់នាង ឲ្យទៅយកប្តីនៅក្រុង ភ្នំពេញ តាំងពី ម៉ោង៣រសៀលដល់ម៉ោង១០យប់ទើបដោះលែង ។
នាង ស៊ុន ស្រីនិច បានបញ្ជាក់ថា ម្តាយនាងបានធ្វើបែបនេះលើរូបនាងនេះព្រោះតែចង់បំបែកបំបាក់នាងពីគូដណ្ដឹងឈ្មោះ សួរ ណេត អាយុ២០ឆ្នាំ រស់នៅភូមិជាមួយគ្នាក្រោយពីនាងបានភ្ជាប់ពាក្យបានមួយថ្ងៃ ។ នាងបានប្រកែកមិនព្រមទទួលយកដាច់ខាតទោះ ស្លាប់ក៏មិនអាចបែកគ្នាជា មួយបុរសជាគូដណ្ដឹងរបស់នាងបានដែរ ព្រោះនាងបានទុំមុនស្រគាល រហូតដល់មាន ផ្ទៃពោះ ៣ ខែទៅហើយ។នាងរៀបរាប់ទៀតថា ពេលដែលម្ដាយរបស់នាងឃុំខ្លួននាងចងនិងច្រវ៉ាក់នៅលើផ្ទះ តារ៉ាត់ ជាមេប៉ុស្ដិ៍នគរបាលរដ្ឋបាលនោះ លោក តារ៉ាត់ បាននិយាយទៅកាន់ម្ដាយនាងតាមទូរស័ព្ទថា អ្នកធ្វើអ៊ីចឹងឃោឃៅ ពេកហើយ។
យ៉ាងណាតារ៉ាត់និយាយបែបនេះមែន តែគាត់មិនអាចជួយនាងបានទេព្រោះគាត់និងម្ដាយ របស់នាងជាដន្លងនឹងគ្នា។ទាក់ទិននឹងរឿងនេះដែរ លោកអ៊ិន កាយ អធិការនគរបាលស្រុកត្រពាំងប្រាសាទបាន ឲ្យដឹងថា រឿងនេះលោកបានជួយធ្វើអន្តរាគមន៍រួចហើយដែរនៅពេលម្ដាយនាង ស៊ុន ស្រីនិច តាមយាយីកូនស្រី រួចថែមទាំង បានឲ្យនាងសម្រាកនៅនឹងកន្លែងធ្វើការរបស់លោកអស់មួយ យប់ទៀតផង ដើម្បីការពារសុវត្ថិភាពកុំឲ្យម្តាយធ្វើបាប។លោកបន្តថារឿងនេះលោកក៏បានកោះអញ្ជើញម្ដាយនារីខាងលើមកបំភ្លឺក្នុងករណីបង្ខាំងកូនស្រីខុសច្បាប់ដែរតែពួកគាត់មិនបានចូលបំភ្លឺទេ។
លោកបានពន្យល់ដល់នាង ស៊ុន ស្រីនិច បើស្រលាញ់គ្នាប្តូរផ្តាច់ជាមួយគូដណ្តឹងយ៉ាងនេះ នាងអាចដឹកដៃគូដណ្តឹងទៅចុះ អេតាស៊ីវីល(លិខិតទទួលស្គាល់អាពាហ៍ពីពាហ៍) នៅសាលាឃុំបាន ។ចំណែកនាង ស៊ុន ស្រីនិច វិញប្រាប់ថា នាងធ្វើតាមការណែនាំរបស់លោកអធិការហើយ តែពេលទៅដល់សាលាឃុំគេមិនព្រមធ្វើឲ្យទេ។
ចំណែកលោកតា រ៉ាត់ជាមេប៉ុស្ដិ៍នគរ បាលបាក់ អន្លូងបានបដិសេធថានារីដែលត្រូវម្ដាយ ចាប់ចង និងច្រវ៉ាក់នៅផ្ទះរបស់លោក នោះលោកមិនបានដឹងទេ ព្រោះលោកជាប់រវល់ការងារ នៅប៉ុស្ដិ៍ឯណេះ ។ យ៉ាងណារឿងរ៉ាវនេះ ត្រូវបានលោកអធិការនគរបាលស្រុក ត្រពាំងប្រាសាទ អះអាងថា បើមានពាក្យបណ្តឹងពីកូនស្រីទៅហើយ ស្ត្រីជាម្តាយមិនរួចខ្លួនទេ សមត្ថកិច្ចរបស់លោកនឹង ចាត់ការតាមច្បាប់តែម្តង ។សូមបញ្ជាក់ថាបើតាមច្បាប់អាពាហ៍ពិពាហ៍សកម្មភាពរបស់ស្រីជាម្តាយនឹងត្រូវមានទោស!៕
