រតនគិរី ៖ តាមបទបញ្ជារបស់របស់លោកថងសាវុនអភិបាលខេត្តរតនគិរីដល់សមត្ថកិច្ចជំនាញនិងស្ថាប័នពាក់ព័ន្ធឲ្យធ្វើការទប់ស្កាត់ការដឹកជញ្ជូនផល-អនុផលព្រៃឈើដោយខុសច្បាប់គ្រប់រូបភាពនោះកម្លាំងអាវុធហត្ថមូលដ្ឋានស្រុកអូរយ៉ាដាវនៅវេលាម៉ោង៩៖៣០នាទីព្រឹកថ្ងៃទី១១ខែកក្កដាឆ្នាំ២០១៩បានស្ទាក់ចាប់រថយន្តឡង់គ្រីស័រច្នៃ១គ្រឿងព៌ណសគ្មានស្លាកលេខលួចដឹកឈើត្រង់ចំណុចនិយាមការ០៧-៦៩២២០,១៥-២២១៣៧ស្ថិតក្នុងភូមិប៉ក់តូចឃុំប៉ក់ញ៉ៃស្រុកអូរយ៉ាដាវ។
លោកវរសេនីយ៍ត្រីសុខ មីនមេបញ្ជាការអាវុធហត្ថមូលដ្ឋានស្រុកអូរយ៉ាដាវប្រាប់ឲ្យដឹងថាបន្ទាប់ពីកម្លាំងលោកចាប់រថយន្តឡង់គ្រីស័រច្នៃលួចដឹកខាងលើត្រួតពិនិត្យមានឈើលេខ១(ពពូលថ្ម)ចំនួន៩ដុំស្មើនឹង១,២៩៦ម៉ែត្រគូប។លោកវរសេនីយ៍ត្រីបន្តថាវត្ថុតាងឈើល្មើសខាងលើប្រគល់ឲ្យសង្កាត់រដ្ឋបាលព្រៃឈើអូរយ៉ាដាវចាត់ចែងបន្តរីឯមធ្យោបាយដឹកបទល្មើសរងចាំបទបញ្ជាថ្នាក់លើជនល្មើសរត់គេចខ្លួនបាត់។ចំណែកឯរថយន្តឡង់គ្រីស័រច្នៃ១គ្រឿងទៀតព៌ណខ្មៅគ្មានស្លាកលេខលួចដឹកឈើត្រូវបានកម្លាំងអាវុធហត្ថខេត្តសហការជាមួយកម្លាំងនគរបាលអន្តោប្រវេសន៍ច្រកទ្វារអន្តរជាតិអូរយ៉ាវ,កម្លាំងអាវុធហត្ថមូលដ្ឋានស្រុកអូរយ៉ាដាវ,ខណ្ឌរដ្ឋបាលព្រៃឈើនិងមានការសម្របសម្រួលពីលោកលាងអ៊ូព្រះរាជអាជ្ញារងអមសាលាដំបូងខេត្តរតនគិរីស្ទាក់ចាប់នៅវេលាម៉ោង១០៖៣០នាទីថ្ងៃដដែល(ថ្ងៃទី១១)ក្នុងភូមិសាស្ត្រភូមិប៉ក់ធំឃុំប៉ក់ញ៉ៃស្រុកអូរយ៉ាដាវ។
លោកឧត្តមសេនីយ៍ត្រីថាវ យ៉េនមេបញ្ជាការអាវុធហត្ថខេត្តរតនគិរីបានប្រាប់សារព័ត៌មាននៅរសៀលថ្ងៃទី១១ខែកក្កដាឆ្នាំ២០១៩នេះថាវត្ថុតាងឈើសុក្រំចំនួន២៦ដុំស្មើនឹង៤,៧៤៣ម៉ែត្រគូបប្រគល់ឲ្យរដ្ឋបាលព្រៃឈើចាត់ចែងបន្ត។មេបញ្ជាការអាវុធហត្ថខេត្តរតនគិរីប្រាប់បន្តថាតាមបទបញ្ជារបស់នាយឧត្តមសេនីយ៍សៅសុខាមេបញ្ជាការអាវុធហត្ថលើផ្ទៃប្រទេសនិងជាប្រធានគណៈកម្មាការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិនោះក្រុមការងារដឹកនាំដោយរូបលោកនិងលោកលាងអ៊ូព្រះរាជអាជ្ញារងអមសាលាដំបូងខេត្តរនគិរីបានបញ្ជាកម្លាំងយករថយន្តឡង់គ្រីស័រច្នៃទាំង២គ្រឿងនេះដុតបំផ្លាញចោលនៅព្រលប់ថ្ងៃទី១១ខែកក្កដាឆ្នាំ២០១៩ដោយមានការសាទរពីប្រជាពលរដ្ឋក្នុងមូលដ្ឋានស្រុកអូរយ៉ាដាវផងដែរ៕
ដោយ៖ចាបសំអាន