ក្រចេះ៖ហេតុការដ៏គួរឲ្យភ្ញាក់ផ្អើលមួយបានកើតឡើង គឺសត្វគោចំនួន ១៤ក្បាល ក្នុងចំណោមសត្វគោរជាង ៥០ក្បាល បានងាប់ និងមួយចំនួនផ្សេងទៀតឋិតក្នុងការតាមដានអាការៈ ដោយសារបាតុភូតធម្មជាតិ គឺរន្ទះបាញ់គ្រោលគោមួយកន្លែង កាលពីវេលាម៉ោង៧និង៥០នាទីយប់ថ្ងៃទី០២ ខែសីហា ឆ្នាំ២០១៦ នៅភូមិអូរតាណឹងឃុំក្បាលដំរី ស្រុកសំបូរ ខេត្តក្រចេះ។
លោក ជិក បូរ៉ា នាយរងប៉ុស្តិ៍រដ្ឋបាលឃុំក្បាលដំរី បានឲ្យដឹងថា នៅយប់កើតហេតុ នៅក្នុងមូលដ្ឋានរបស់លោក គឺមានភ្លៀងធ្លាក់លាយឡំជាមួយខ្យល់កន្ត្រាក់ ប្រហែងជាង១ម៉ោង ហើយមួយសន្ទុះក្រោយមក ក៏មានដំណឹងថា មានគោក្របីប្រជាពលរដ្ឋចំនួន ១៤ក្បាល បានងាប់ និងខ្លះទៀតរងបួសក្នុងស្ថានភាពងីងើ ដោយសារបាតុភូតរន្ទះបាញ់ ដែលពុំធ្លាប់ជួបនាពេលកន្លងមក។
លោក បានបន្តថា ម្ចាស់គោមានឈ្មោះ ប៉ក់ ប៉ឿង ភេទប្រុស អាយុ៥១ឆ្នាំ និងប្រពន្ធឈ្មោះ ផេន សារី អាយុ ៤៨ឆ្នាំ រស់នៅភូមិឃុំកើតហេតុខាងលើ និងមានសត្វគោចំនួនប្រមាណជា ៥០ក្បាល ដោយគោទាំងនោះ ត្រូវបានម្ចាស់ចងទុកនៅក្នុងគ្រោលតែមួយនៅឯវាលស្រែ ។
លោនាយរងប៉ុស្តិ៍ បន្តទៀតថា ក្រោយកើតហេតុអាជ្ញាធរឃុំ និងប៉ុស្តិ៍រដ្ឋបាល បានចុះទៅពិនិត្យមើលឃើញថា ការងាប់របស់សត្វគោទាំងនោះ គឺពិតជាងាប់ដោយសារបាតុភូតរន្ទះបាញ់ពិតប្រាកដមែន៕
កិះ ខន
