ភ្នំពេញ ៖ ព្រឹកថ្ងៃទី១០កក្កដាដែលជាឆ្នាំទី៣នៃខួបនៃការបាញ់សម្លាប់លោកបណ្ឌឹតកែមឡីអ្នកវិភាគ សកម្មជន៣នាក់ ត្រូវបានឃាត់ខ្លួននៅខាងក្រៅស្ថានីយប្រេងឥន្ធនៈកាល់តិចស្ដុបបូកគោក្នុងរាជធានីភ្នំពេញ បន្ទាប់ពីអ្នកទាំង៣បានចូលរួមជាមួយយុវជន មេដឹកនាំសហជីព និងសមាជិកសង្គមស៊ីវិលដទៃទៀត ដើម្បីធ្វើពិធីរំលឹកខួបនេះ។
យុរជនដែលត្រូវបានឃាត់ខ្លួនទាំង៣នាក់ក្នុងនោះក៏មាន សកម្មជនការពារបរិស្ថាន លោក ជុំ ហួត និងលោក ជុំ ហួរដែលជាអ្នកអង្គុយផឹកាហ្វេសចុងក្រោយមុនពេលលោកកែមឡីត្រូវបាញសម្លាប់ ។
កម្លាំងប្រដាប់អាវុធជាច្រើនបានធ្វើការហ៊ុមព័ទ្ធ មិនត្រូវបានអនុញ្ញាតឱ្យដាក់កម្រងផ្កានៅស្ថានីយប្រេងឥន្ធនៈនោះទេ ។ សកម្មជនបឹងកក់ លោកយាយ ង៉ែត ឃុន ត្រូវបានហ៊ុមព័ទ្ធភ្លាមៗពេលលោកយាយបានមកដល់ស្ថានីយ និងត្រូវបានកងសន្ដិសុខនាំខ្លួនចេញពីស្ថានីយដោយបង្ខំ ។នគរបាលបង្ខំឱ្យសកម្មជនម្នាក់ដោះអាវដែលមានរូបលោកបណ្ឌិត កែម ឡី ដែលត្រូវបានឃាតករបាញ់សម្លាប់។
កាលពីថ្ងៃទី៩កក្កដាលោក គង់ រ៉ៃយ៉ា អតីតនិស្សិតនិជាសកម្មជនការពារបរិស្ថាន និងសមាជិកក្រុមគ្រួសាររបស់លោក ៣នាក់ទៀតដែលលក់អាវយឺតមានបោះពុម្ពពាក្សសម្តីលោកែមឡី ត្រូវបាននគរបាលចាប់ខ្លួន ដោយចោទប្រកាន់ពីបទញុះញង់ឱ្យបង្កចលាចលក្នុងសង្គមត្រៀមបញ្ជូនទៅតុលាការ។
លោកគង់ រ៉ៃយ៉ា ត្រូវបានចាប់ខ្លួនម្ដងហើយកាលពីខែសីហា ឆ្នាំ២០១៥ និងត្រូវបានផ្ដន្ទាទោសដាក់ពន្ធនាគារពី “បទញុះញង់ឱ្យប្រព្រឹត្តបទឧក្រិដ្ឋជាអាទិ៍” ពាក់ព័ន្ធនឹងការបង្ហោះសារលើហ្វេសប៊ុក ដែលបានអំពាវនាវឱ្យធ្វើ “បដិវត្តន៍ពណ៌” ជាពាក្យដែលអាជ្ញាធរតែងតែប្រើដើម្បីចាត់ទុកចលនាសន្ដិវិធីថាជា សកម្មភាពបះបោរដោយហិង្សា។ដោយឡែកនៅព្រឹកថ្ងៃទី១០ ខែកក្កដា ឆ្នាំ២០១៩នេះដែរ លោក គង់ មុនីកា ប្រធានគណបក្សឆន្ទៈខ្មែរ បានថ្លែងតាមហ្វរសប៊ុកថា យុវជនទាំង៣នាក់ នឹងត្រូវដោះលែងឲ្យមានសេរីភាពឡើងវិញ បន្ទាប់ពីការជួបជុំគ្នា ការាស់សាំងកាល់តិច ជិតស្ដុបបូកគោ។
លោក គង់មុនីកា បានសរសេរថា “ខ្ញុំ និងលោក អ៊ី មុយលី ជាអគ្គលេខាធិការ ព្រមទាំងលោក ជុំ ហាក់ ជាប្រធានចលនាយុវជនគណបក្សឆន្ទៈខ្មែរ ដែលត្រូវជាប្អូនប្រុស បង្កើតរបស់សកម្មជនបរិស្ថានកូនភ្លោះ ជុំ ហួត – ជុំហួរ បានចូលជួបសួរសុខទុក្ខយុវជនទាំង៣រូប ដែលត្រូវបានឃាត់ខ្លួនកាលពីព្រឹកមិញ”។
លោកបញ្ជាក់ថា “តាមការឲ្យដឹងពីអាជ្ញាធរ យុវជនទាំង៣នឹងត្រូវដោះលែងឲ្យមានសេរីភាពឡើងវិញ បន្ទាប់ពីការជួបជុំនៅស្តាម៉ាត កាល់តិច ត្រូវបានរំសាយ”។
គួររំលឹកជូនថា លោក កែម ឡី អ្នកវិភាគនយោបាយនិងសង្គម ត្រូវបានឃាតករបាញ់សម្លាប់កាលពីព្រឹកថ្ងៃទី១០ កក្កដា ឆ្នាំ ២០១៦ នៅហាងស្តាម៉ាតកាល់តិច ស្តុបបូកគោ។ អាជ្ញាធរបានឃាត់ខ្លួនបុរសម្នាក់ឈ្មោះ អឿត អាង ហៅជួបសម្លាប់ និងបានផ្តន្ទាទោសឲ្យជាប់ពន្ធនាគារអស់មួយជីវិត។ អឿត អាង ហៅជួបសម្លាប់ បានសារភាពថា ខ្លួនគឺជាអ្នកសម្លាប់លោកបណ្ឌិត កែម ឡី ដោយសារជំពាក់ប្រាក់៣ពាន់ដុល្លារ។
ប៉ុន្តែទោះជាយ៉ាងនេះក្តី នៅមួយថ្ងៃមុនខួបបីឆ្នាំនៃការបាញ់សម្លាប់ លោកបណ្ឌិត កែម ឡី នេះ អង្គការជាតិនិងអន្តរជាតិចំនួន២៤ បានចេញសេចក្តីថ្លែងការណ៍រួមមួយ ដោយអំពាវនាវជាថ្មីឲ្យរដ្ឋាភិបាលកម្ពុជា បង្កើតគណៈកម្មាការស៊ើបអង្កេតលើករណីបាញ់សម្លាប់ លោក កែម ឡី ជាថ្មី។ ជាគណៈកម្មាការស៊ើបអង្កេតឯករាជ្យ និងមិនលម្អៀង ដើម្បីរកយុត្តិធម៌ ពេញលេញដល់លោក កែម ឡី។ ប៉ុន្តែអ្នកនាំពាក្យរដ្ឋាភិបាលលើកឡើងជាមួយកាសែតថា ការបង្កើតគណៈកម្មការណាមួយនោះ ជារឿងមិនអាចទៅរួចឡើយ?!។
