ក្រចេះ៖ ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រ នៃកម្ពុជា ជាទីគោរពសក្ការៈដ៏ខ្ពង់ខ្ពស់បំផុត បានមានព្រះបន្ទូលជំរុញឲ្យអាជ្ញាធរដែនដីនិងប្រជាពលរដ្ឋយកចិត្តទុកដាក់ដាំដើមឈើ ឲ្យបានគ្រប់ៗគ្នា នៅតាមទីប្រជុំជនស្រុក ក្រុង ឃុំ សង្កាត់ ភូមិដើម្បីបានម្លប់ជាជម្រកមនុស្សសត្វ បានជាឈើសំណង់ បង្កើនជីវជាតិដីកសិកម្ម ដើម្បីកាត់បន្ថយការប្រើប្រាស់ឈើធម្មជាតិ ជួយទប់កម្លាំងខ្យល់កន្ត្រាក់ និងបម្រែបម្រួលធាតុអាកាសផងដែរ ។
ក្នុងឱកាសដែលទ្រង់យាងជាព្រះរាជធិបតី ប្រារព្ធព្រះរាជពិធី «រុក្ខទិវា» ស្ថិតនៅភូមិស្រែត្រែង ឃុំក្បាលដំរី ស្រុកសំបូរ ខេត្តក្រចេះ នាព្រឹកថ្ងៃទី០៩ ខែកក្កដា ឆ្នាំ២០១៩នេះព្រះមហាក្សត្រ បានមានព្រះបន្ទូលថា «គួរយកចិត្តទុកដាក់រៀបចំ ដើម្បីឲ្យគូស្រករទើបរៀបអាពាហ៍ពិពាហ៍ ដាំដើមឈើទុកជាអនុស្សាវរីយ៍ នៅសួនអាពាហ៍ពិពាហ៍ ដែលបានបង្កើតឡើង ដោយរដ្ឋបាលព្រៃឈើឲ្យបានគ្រប់ៗគ្នា នៅតាមទីប្រជុំជនស្រុក ក្រុង ឃុំ សង្កាត់ ភូមិ»។
ព្រះមហាក្សត្រមានព្រះបន្ទូលបន្ដថា ការបាត់បង់ព្រៃឈើគ្រប់ប្រភេទ អាចបណ្តាលឲ្យមានទឹកជំនន់ខ្យល់កន្ត្រាក់ និងរន្ទះ និងការរាំងស្ងួតដែលបានធ្វើឲ្យទីតម្កល់ទឹកធានា សម្រាប់តម្រូវការ របស់មនុស្ស សត្វ ត្រូវរីងស្ងួត ឈានទៅរកការបាត់បង់ប្រាក់ចំណូល សត្វព្រៃ ធនធានមច្ឆជាតិគ្រប់ប្រភេទ ហើយអាចបង្កឲ្យមានភាពរហោស្ថាន និងការធ្លាក់ចុះគុណភាពដីផងដែរ។