ភ្នំពេញ ៖ ជនជាតិចិន៣នាក់ត្រូវបានចាប់ខ្លួនទៀតហើយនៅល្ងាចថ្ងៃទី០៩ ខែកក្កដា ឆ្នាំ២០១៩នេះនៅព្រលានយន្តហោះភ្នំពេញ ពីបទរត់ពន្ធលុយដុល្លារចំនួន៩០ម៉ឺនចូលមកប្រទេសកម្ពុជា ដោយមគ្មានប្រភពច្បាស់លាស់ ។
សមត្តកិច្ចនៅព្រលានឲ្យដឹងថា ជនជាតិចិនដែលសមត្ថកិច្ចចាប់ខ្លួននោះរួមមាន ទី១៖ឈ្មោះ Huang Canming អាយុ២៧ឆ្នាំ និងទី២៖ឈ្មោះ Yang Yongwei អាយុ២៦ឆ្នាំ ពួកគេធ្វើដំណើរចេញពីទីក្រុងហុងកុង ប្រទេសចិន មកអាកាសយានដ្ឋានអន្ដរជាតិភ្នំពេញ តាមជើងយន្ដហោះលេខ LQ971 និងទី៣៖ឈ្មោះ Zizheng Zheng អាយុ៣២ឆ្នាំ (ជាអ្នកមកចាំទទួលនៅភ្នំពេញ)។
ក្រោយធ្វើការត្រួតពិនិត្យ និងបានរកឃើញក្រដាសប្រាក់ដែលជនសង្ស័យ ដាក់ក្នុងកាបូបយួរដៃចំនួន៣ ដែលមានទឹកប្រាក់សរុប ៩០០,០០០ដុល្លារ ដោយអ្នកដំណើរមិនបានប្រកាសជូនដំណឹងដល់មន្ដ្រីគយ និងរដ្ឋាករ លើលិខិតរាយការណ៍គយនោះឡើយ។
សូមបញ្ជាក់ថា គ្រាន់តែរយៈពេល៣ថ្ងៃនេះ មន្ត្រីគយបង្ក្រាបបទល្មើសនាំលុយដុល្លារល្មើសច្បាប់ ចូលបាន២ករណីហើយ ដោយនៅថ្ងៃទី០៧ ខែកក្កដា ឆ្នាំ២០១៩ម្សិលម្ងៃ បង្ក្រាបនៅព្រលានយន្ដហោះអន្តរជាតិខេត្តសៀមរាប ដោយចាប់ខ្លួនជនជាតិកូរ៉េ២នាក់ រឹបអូសយកប្រាក់ដុល្លារបានជាង២លានដុល្លារ ។ បើសរុបលុយដែលចាប់បានកន្លងមកមានប្រហែល ៦ លានដុល្លារអាមេរិកហើយ ភាគច្រើនមកពីហុងកុង កន្លែងដែលមានកាស៊ីណូលំដាប់អន្តរជាតិ! ។
បញ្ហាចាប់បានជារឿងមួយ តែរឿងមួយទៀត វាក៏បង្ហាញដែរថា ស្រុកខ្មែរ កន្លងមកអាចមានការលាងលុយតាមរយៈវិនិយោគនានា? ៕
