ភ្នំពេញ ៖ លោក ឃួង ស្រេង អភិបាល នៃគណៈអភិបាលអភិបាលរាជធានីភ្នំពេញបានណែនាំដល់ម្ចាស់គម្រោងទាំងអស់រាល់ការជីកផ្លូវកប់ ឬតភ្ជាប់បណ្ដាញក្រោមដីត្រូវតែជូនដំណឹងមកអាជ្ញាធរ ហើយពេលស្ថាបនាធ្វើផ្លូវឡើងវិញ ត្រូវតែធានាឲ្យបានទាំងបច្ចេកទេស និងគុណភាពផ្លូវ។
ក្នុងឱកាសអញ្ជើញជាអធិបតីក្នុងអង្គប្រជុំពិភាក្សាស្ដីពីការជីកកប់ដាក់បណ្ដាញក្រោមគ្រប់ប្រភេទក្នុងរាជធានីភ្នំពេញ នារសៀលថ្ងៃពុធ ០២កើត ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៣ ខែកក្កដា ឆ្នាំ២០១៩ម្សិលមិញនេះលោក ឃួង ស្រេង ក៏បានស្នើឲ្យភាគីពាក់ព័ន្ធ ពិសេសអាជ្ញាធរអគ្គិសនីកម្ពុជា (EDC) ត្រូវបន្តសហការគ្នាឲ្យកាន់តែស្អិតរមួតថែមទៀត ដោយស្នើនូវរាល់ការជីកផ្លូវកប់បណ្ដាញ ខ្សែកាបអគ្គិសនី តភ្ជាប់ខ្សែកាបអគ្គិសនី ឬបណ្តាញក្រោមដី ត្រូវតែជូនដំណឹង មកអាជ្ញាធររាធានីនូវគ្រប់ដំណាក់កាល ដើម្បីអាជ្ញាធរជូនដំណឹង និងសុំការយោគយល់ពីប្រជាពលរដ្ឋ។
លោកអភិបាលបានបញ្ជាក់ថា ដោយមើលឃើញពីការតភ្ជាប់ខ្សែបណ្តាញអគ្គិសនី កន្លងមក មិនមានលក្ខណៈបច្ចេកទេស ធ្លាក់រយីងរយោងធ្វើឲ្យប៉ះពាល់ សោភណ្ឌភាព ឬបង្កបញ្ហាជាយថាហេតុក្នុងរាជធានី ទើបអាជ្ញាធររាជធានីភ្នំពេញ និងEDC ក៏ដូចជាភាគីពាក់ព័ន្ធបានតភ្ជាប់បណ្តាញមួយចំនួននៅក្រោមដីរួចមកហើយ ដោយទទួលបានការគាំទ្រពីប្រជាពលរដ្ឋក្នុងរាជធានីភ្នំពេញ។ សម្រាប់ការជីកតបណ្តាញក្រោមដីនេះ អាជ្ញាធររាជធានី មិនអនុញ្ញាឲ្យជីកកាយលើផ្លូវទាំងឡាយណា ដែលបានជីកដាក់រួចមកហើយនោះទៀតទេ៕
