ខេត្តកំពង់ស្ពឺ ៖ ប្រភពពីសមត្ថកិច្ចស្រុកភ្នំស្រួចបានអោយដឹងថាលោក ភីរីណា ជាមេបញ្ជាការរងមូលដ្ឋានកងរាជអាវុធហត្ថស្រុកភ្នំស្រួចបានបញ្ជាអោយ កូនចៅមួយក្រុមទៅធ្វើកម្មភាពស្ទាក់រំដោះយករថយន្តដឹកដីមួយគ្រឿង(មិនប្រក្រតីអត់ពន្ធ) សមត្ថកិច្ចនគរបាល បន្ទាប់ពីគណៈបញ្ជាការឯកភាពស្រុកឃាត់បានហើយ និងបានបញ្ជូនទៅកាន់មន្ទីរសាធារណការ និងដឹកជញ្ជូនខេត្តកំពង់ស្ពឺ ដើម្បីមានវិធានការ និងផាកពិន័យតាមច្បាប់។
ប្រភពខាងលើបានបង្ហើបប្រាប់ឲ្យដឹងទៀតថា មានមនុស្សមួយក្រុមដែលជាបក្ខពួករបស់លោកមេបញ្ជាការរងប៉េអឹមស្រុកភ្នំស្រួចបាននាំគ្នាស្ទាក់រំដោះយករថយន្តបែនដឹកដីនៅ ចំណុចវត្តគ្រួស ឃុំកាហែង ស្រុកសំរោងទង ។ រថយន្តបែនដឹកដីត្រូវបានគេដឹងថារបស់លោកម៉ែន ភីរីណា មានតួនាទីជាមេបញ្ជាការរងប៉េអឹមស្រុកភ្នំស្រួច ដែលធ្វើសកម្មភាពចាក់អាចម៍ដីនិងលុបទាំងប្រឡាយរបស់រដ្ឋ(ដែលប្រជាពលរដ្ឋប្រើប្រាស់) ជិតស្ពានថ្មក្នុងឃុំមហាសាំង ស្រុកភ្នំស្រួចខុសច្បាប់ ទើបគណៈបញ្ជាការឯកភាពស្រុកបញ្ជាកម្លាំងចុះឃាត់ និងបញ្ជូនបន្តទៅឲ្យមន្ទីរសាធារណការខេត្ត ចាត់ការតាមនីតិវិធី ប៉ុន្តែត្រូវបក្ខពួកលោកមេបញ្ជាការរងប៉េអឹម ស្ទាក់រំដោះយកទៅបាត់ដោយមិនខ្លាចញញើតគណបញ្ជាការឯកភាពស្រុកបន្តិចឡើយ ។
ករណីយ៍បំពានច្បាប់ខាងលើនេះលោកហន ពិសិដ្ឋ អភិបាលស្រុកភ្នំស្រួចបានឲ្យដឹងតាមទូរសព្ទ័ថា «ក្រោយពីមានការលើកឡើងក្នុងវេទិកាសាធារណៈ ក្រុមការងារថ្នាក់ជាតិ គឺគេលើកចំណុចនេះតែម្តង។ ខ្ញុំបានដឹកនាំកម្លាំងឃាត់បានរថយន្តរបស់លោកម៉ែន ភីរីណា មួយគ្រឿង មករក្សាទុកត្រៀមបញ្ជូនទៅជំនាញមន្ទីរសាធារណការខេត្តចាត់ការតាមនីតិវិធី តែដល់ចំណុចវត្តគ្រួស ត្រូវមនុស្សមួយក្រុមតូចស្ទាក់យករថយន្ត ហើយគេចបាត់»ស្រមោលតែម្តង។
លោកអភិបាលស្រុកបានបញ្ជាក់ថា «ករណីនេះកើតឡើងពីថ្ងៃទី២៧ ខែមិថុនា ឆ្នាំ២០១៩ មានការអន្តរាគមន៍សុំដោះលែងដែរ តែស្រុកមិនឯកភាព»នោះឡើយ។ «ករណីលោកម៉ែន ភីរីណា មេបញ្ជាការរងកងរាជអាវុធហត្ថស្រុកភ្នំស្រួចចាក់ដីនេះ គឺអត់ច្បាប់ទាំងអស់។ ទោះឃាត់ ក៏នៅបំពានចាក់ដែរ»។
គួររំឭកផងដែរថា លោកម៉ែន ភីរីណា មេបញ្ជាការរងកងរាជអាវុធហត្ថស្រុកភ្នំស្រួចរងការរិះគន់យ៉ាងខ្លាំងពីការចាក់អាចម៍ដីខុសច្បាប់ និងរំលោភយកប្រឡាយអូររបស់រដ្ឋ ហើយអាជ្ញាធរមូលដ្ឋាន និងមន្ត្រីជំនាញ បានចុះទៅហាមឃាត់ និងធ្វើរបាយការណ៍ទៅអភិបាលខេត្តកំពង់ស្ពឺយ៉ាងណា ក៏លោកនៅតែមិនខ្លាចឡើយ។
ប្រជាពលរដ្ឋភូមិព្រៃស្តុក ឃុំមហាសាំង ស្រុកភ្នំស្រួច បានប្រាប់ថា លោកម៉ែន ភីរីណា ជាមន្ត្រីប៉េអឹមស្រុកភ្នំស្រួច មានឪពុកក្មេកជាប៉ូលិសស្រុកភ្នំស្រួច ដែលសកម្មខាងមើលផ្លូវនិងប្រមូលលុយបទល្មើសព្តៃឈើបានបន្តចាក់ដីលុបអូររបស់រដ្ឋយ៉ាងគឃ្លើន មិនគោរពច្បាប់នោះទេ។លោកញ៉ាញ់ ជាបហ៊ង ប្រធានមន្ទីរធនធានទឹក និងឧតុនិយមខេត្តកំពង់ស្ពឺ ធ្លាប់បានប្រាប់កាសែតថា «លោកបានឲ្យជំនាញចុះទៅជាមួយអាជ្ញាធរឃុំ ដើម្បីឲ្យផ្អាក និងបានរាយការណ៍ជូនទៅលោកអភិបាលខេត្តផងដែរ»។
បើទោះជាបែបនេះក្តីកន្លងមកអ្នកពត៌មានយើងធ្លាប់បានសំភាសន៍លោកម៉ែនភីរីណាដែរពាក់ព័ន្ឋនឹងការចាក់ដីលុបអូរនេះ ដោយលោកបាននិយាយថាលោកបានទាក់ទងជាមួយថ្នាកដឹកនាំខេត្អអស់ហើយ តែ«មិនដឹងថាតើថ្នាក់ដឹកនាំខេត្តរូបណានោះទេដែលជាខ្នងបង្អែករបស់លោកម៉ែនភីរីណាមន្តរីកងរាជអាវុធហត្ថរូបនេះ ទើបបានជាលោកនៅតែគឃ្លើនមិនខ្លាចរអារច្បប់បន្តិចណាទាល់តែសោះចឹង?»។ ពាក់ព័ន្ធករណីបក្ខពួកលោកមេបញ្ជាការរងប៉េអឹមស្រុកភ្នំស្រួចនាំគ្នាស្ទាក់រំដោះយករថយន្តបែនដឹកដីមួយគ្រឿងពីគណបញ្ជាការឯកភាពស្រុកភ្នំស្រួចនេះ មិនអាចទាក់ទងសុំការបកស្រាយពីសាមីខ្លួនបាននៅឡើយទេ៕
