ភ្នំពេញ ៖ តាំងពីយប់រំលងអាធ្រាត្រ ឈានចូលថ្ងៃទី០២ ខែកក្កដា ឆ្នាំ២០១៩ រហូតមកដល់ព្រឹកថ្ងៃដដែលនេះ ឡានទឹកចំនួន៤០គ្រឿង ដោយគិតជាជើងនៃការដឹកជញ្ជូនទឹក អស់ប្រមាណ២៥០ជើង ត្រូវបានប្រើសម្រាប់ការបង្ក្រាបអគ្គិភ័យបំផ្លាញ ផ្ទះប្រជាពលរដ្ឋបោះដុំអាវជជុះស្ថិត នៅតាមបណ្ដោយផ្លូវលេខ១៧៣ ផ្ទះលេខ៣៥ ក្រុមទី២៣ ភូមិ០៣ សង្កាត់អូរឡាំពិក ខណ្ឌបឹងកេងកង រាជធានីភ្នំពេញ កម្លាំងសមត្ថកិច្ចគ្រប់គ្រងបានទាំងស្រុងហើយ។
សមត្តកិច្ច បានឲ្យដឹងថា ផ្ទះដែលកើតគ្រោះអគ្គិភ័យនេះ មានម្ចាស់ឈ្មោះ អ៊ុង ដាវី ភេទស្រី អាយុ៥៤ឆ្នាំ ផ្ទះឆេះអស់ទាំងស្រុងទំហំ៨ម៉ែត្រ គុណ១៤ម៉ែត្រ មិនបានបណ្តោយឲ្យឆេះរាលដាលដល់ផ្ទះអ្នកជិតខាងឡើយ។បើតាមសមត្ថកិច្ចសម្រាប់គ្រោះអគ្គិភ័យនេះផ្ទះជិត១០ល្វែងបានរងការខូចខាត និងប៉ះពាល់។
នៅព្រឹកថ្ងៃទី០២ ខែកក្កដា ឆ្នាំ២០១៩នេះ គេសង្កេតឃើញវត្តមានរបស់លោក ឃួង ស្រេង អភិបាលរាជធានីភ្នំពេញ អភិបាលខណ្ឌថ្មីបឹងកេងកង បានចុះពិនិត្យកន្លែងកើតហេតុ ក៏ដូចជាសួរសុខទុក្ខដល់ក្រុមគ្រួសារអ្នករងគ្រោះដោយសារគ្រោះអគ្គិភ័យនេះផងដែរ។
សូមបញ្ជាក់ថាក្នុងប្រតិបត្តិការណ៍មានការចូលរួមពីរថយន្តការិយាល័យអគ្គិភ័យ ចំនួន២០គ្រឿង, រថយន្ដរបស់កងពលតូចលេខ៧០ ចំនួន៤គ្រឿង, រថយន្តក្រុមហ៊ុនស្រាបៀរកម្ពុជា ចំនួន១គ្រឿង, រថយន្តក្រសួងមហាផ្ទៃ ចំនួន៣គ្រឿង, រថយន្តក្រុមហ៊ុន OCIC ទីក្រុងកោះពេជ្រ ចំនួន២គ្រឿង, រថយន្តក្រុមហ៊ុន OCIC ទីក្រុងជ្រោយចង្វារ ចំនួន៦គ្រឿង រថយន្តកងរាជអាវុធហត្ថជាតិ ចំនួន៤គ្រឿង៕