ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានមានប្រសាសន៍ថា កម្ពុជាត្រូវតែបង្កើនទំនាក់ទំនងល្អថែមទៀត ជាមួយប្រទេសក្នុងពិភពលោក និងជាមួយបណ្តាដៃគូអង្គការពាណិជ្ជកម្ម ដើម្បីបើកទីផ្សារផលិតផលខ្មែរ នាំចេញទៅក្រៅ កាន់តែទូលំទូលាយថែមទៀត។
សម្ដេចតេជោបានលើកឡើង តាមបណ្ដាញសង្គមហ្វេសប៊ុក នៅរសៀលថ្ងៃទី៣០ ខែមិថុនា ឆ្មាំ២០១៩ថា សប្តាហ៍ក្រោយនេះ សម្តេចនឹងត្រូវទៅចូលរួមកិច្ចប្រជុំពិសេស មួយពាក់ព័ន្ធនឹងយុទ្ធសាស្ត្រ លើវិស័យពាណិជ្ជកម្មនៅទីក្រុងហ្សឺណែវ ប្រទេសស្វីស។សម្តេចនាយករដ្ឋមន្ត្រីបញ្ជាក់ថា “ដូច្នេះកម្ពុជាត្រូវតែបង្កើនទំនាក់ទំនង និងកិច្ចសហប្រតិបត្តិការល្អ កាន់តែច្រើនឡើងថែមទៀត ជាមួយប្រទេសក្នុងតំបន់ និងក្នុងពិភពលោក និងជាមួយបណ្តាដៃគូអង្គការពាណិជ្ជកម្មតូចធំ ដើម្បីបើកទីផ្សារផលិតផល ខ្មែរ”។សម្ដេច បង្ហាញការពេញចិត្តបម្រើប្រទេសជាតិ ដោយមិនគិតពីការនឿយហត់សូម្បី បន្តិឡើយ ដើម្បីសេដ្ឋកិច្ច ជាតិរឹងមាំ ហើយជីវភាពរស់នៅរបស់ពលរដ្ឋក៏កាន់តែធូរធារល្អប្រសើរឡើង។
សូមបញ្ជាក់ថាតបតាមការអញ្ជើញរបស់លោក រ៉ូបឺតូ អាហ្សេវេដូ អគ្គនាយកអង្គការពាណិជ្ជកម្មពិភពលោក (WTO) នាយករដ្ឋមន្ត្រីសម្តេចតេជោ ហ៊ុន សែន នឹងដឹកនាំគណៈប្រតិភូជាន់ខ្ពស់ អញ្ជើញទៅចូលរួមកិច្ចប្រជុំ «ត្រួតពិនិត្យឡើងវិញ ជាសកលលើជំនួយសម្រាប់ពាណិជ្ជកម្ម ឆ្នាំ២០១៩» ដែលនឹងប្រព្រឹត្តទៅ ពីថ្ងៃទី៣ ដល់ថ្ងៃទី៥ កក្កដា ឆ្នាំ២០១៩ នៅអង្គការពាណិជ្ជកម្មពិភពលោក ទីក្រុងហ្សឺណែវ ប្រទេសស្វីស ។
សេចក្តីប្រកាសព័ត៌មាន របស់ក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី២៨ មិថុនា ឱ្យដឹងថា លោកនាយករដ្ឋមន្ត្រី ហ៊ុន សែន ត្រូវបានអញ្ជើញថ្លែងសុន្ទរកថាគន្លឹះ នៅក្នុងពិធីបើកកិច្ចប្រជុំ ដែលក្នុងឱកាសនោះ សម្តេចនឹងគូសបញ្ជាក់ពីបទពិសោធន៍ កិច្ចប្រឹងប្រែង និងយុទ្ធសាស្ត្ររបស់កម្ពុជា ក្នុងការជម្នះឧបសគ្គនានា និងនាំមកនូវកំណើនសេដ្ឋកិច្ចគួរឱ្យកោតសរសើរដល់កម្ពុជា ។សម្តេចនាយករដ្ឋមន្ត្រី នឹងប្រកាសជាផ្លូវការនូវយុទ្ធសាស្ត្រសមាហរណកម្មពាណិជ្ជកម្មរបស់កម្ពុជា ឆ្នាំ២០១៩-២០២៣ ព្រមទាំងអញ្ជើញថ្លែងសុន្ទរកថា នៅក្នុងកម្មវិធីសង្គម ដែលរៀបចំដោយ អង្គការពាណិជ្ជកម្មពិភពលោក ផងដែរ ៕
