ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋម ន្ដ្រី ក្រសួងមហាផ្ទៃនាព្រឹកថ្ងៃទី២៩ មិថុនា បានលើកឡើង ពីបញ្ហាប្រឈមចំនួន ៥ចំណុចនៅក្នុងអាណាចក្រខេត្តព្រះសីហនុ ទាម ទា រឲ្យដោះស្រាយជាបន្ទាន់ ដើម្បីសម្រេចបាននូវការអភិវឌ្ឍ និងទាក់ទាញភ្ញៀវទេសចរ ព្រមទាំងវិនិយោគិន ។
ថ្លែងក្នុងពិធីប្រកាសឲ្យលោកគួចចំរើនចូលកាន់ មុខតំណែងជា អភិបាលខេត្តព្រះសីហនុ សម្តេច ស ខេង បានបញ្ជាក់ថា «បញ្ហាប្រឈមទាំង ៥ចំណុចនោះរួមមាន៖ ទំនាស់ដីធ្លី ការគ្រប់គ្រងដីធ្លី, គុណភាពសំណង់, សន្ដិសុខនៅកោះរ៉ុង និងបណ្ដាកោះដែល ចំណុះក្រុងព្រះសីហនុ, ហេដ្ឋារចនាសម្ព័ន្ធផ្លូវគមនាគមន៍, រួមគ្នាដោះស្រាយបញ្ហាលូ ទឹកកខ្វក់ ទឹកភ្លៀង» ។
បញ្ហាទំនាស់ដីធ្លី និងការគ្រប់គ្រងដីធ្លី សម្ដេច បានមានប្រសាសន៍ថា កាលពីពេលដែលខេត្តព្រះសីហនុ មិនទាន់មានការវិនិយោគច្រើន បញ្ហាដីធ្លីនេះហាក់មានការស្ងប់ស្ងាត់ មិនសាហាវដូចបច្ចុប្បន្ន ប៉ុន្តែពេលមានការវិនិយោគ អ្នកវិនិយោគរកទិញដី រឿងកាន់តែស្មុគស្មាញ ដែលនាំឲ្យកើតមានជា ទំនាស់ដីធ្លីច្រើន ។ សម្ដេចត្រូវរួមគ្នា ដោះស្រាយបញ្ហានេះ ដោយឈរលើមូលដ្ឋានច្បាប់ និងចៀសវាងការប្រើប្រាស់អំពើហិង្សា ។
ចំពោះបញ្ហាគុណភាពសំណង់ សម្ដេចថ្លែងថា ត្រូវត្រួតពិនិត្យសំណង់កំពុងសាងសង់ សំណង់ដែលសាងសង់រួចហើយ និងកំពុងធ្វើអាជីវកម្ម ថាតើគ្រប់លក្ខណៈបច្ចេកទេស នៃការសាងសង់ហើយឬនៅ ដើម្បីចៀសវាងកុំឲ្យមាន ករណីរលំអគារតទៅទៀត ។ លើសពីនេះអគារនីមួយៗ ត្រូវមានប្រព័ន្ធគ្រប់គ្រង អគ្គិភ័យ ។ គ្រប់សំណង់នីមួយៗ ដាច់ខាតត្រូវតែមានច្បាប់អនុញ្ញាត មានគុណភាពខ្ពស់ និងមានសុវត្ថិភាព ។
សម្តេច ស ខេង បញ្ជាក់យ៉ាដូច្នេះថា «ការអភិវឌ្ឍក្នុងខេត្តព្រះសីហនុ ត្រូវរក្សាឱ្យបានដាច់ខាត អត្តសញ្ញាណជាតិ ដើម្បីឱ្យអ្នកទេសចរ ចូលមកលេងកម្សាន្ត និងវិនិយោគបានដូចគ្នា។ ខ្ញុំគាំទ្រកន្លងទៅផ្លាកសញ្ញានានា យើងបានកែសម្រួល តែសុំឱ្យបន្តទៅទៀត។ យើងដើរមើលប្រទេសណា គេដាក់អក្សរប្រទេសគេណុងហើយ អក្សរបរទេសគេដាក់ខាងក្រោម»។
ចំណែកបញ្ហាសន្ដិសុខនៅកោះរ៉ុង និងបណ្ដាកោះដែលចំណុះក្រុងព្រះសីហនុ សម្ដេចគូបញ្ជាក់ថា ត្រូវពង្រឹង និងធានាសន្តិសុខសុវត្ថិភាព នៅតាមបណ្ដាកោះនានា ស្របពេលដែលភ្ញៀវទេសចរ កំពុងតែមានការកើនឡើងជាបន្តបន្ទាប់ ។ សម្ដេចថា ត្រូវដាក់កម្លាំងក្នុងមួយកោះយ៉ាងហោច ៣នាក់ ដើម្បីការពារសុវត្ថិភាព ហើយក៏ត្រូវមានកម្លាំងជំនួយ ដើម្បីចេញអន្ដរាគមន៍ទាន់ពេលវេលា ពេលមានហេតុការណ៍អ្វីមួយកើតឡើង។
បញ្ហាហេដ្ឋា រចនាសម្ព័ន្ធផ្លូវគមនាគមន៍ សម្ដេចលើកឡើងថា ហេដ្ឋរចនាសម្ព័ន្ធដែលមានបច្ចុប្បន្ននេះ ទ្រលែងបានហើយ បញ្ហានេះរាជរដ្ឋាភិបាល បានគិតគូរួចរាល់អស់ហើយ ប៉ុន្តែត្រូវចំណាយពេលក្នុងការសាងសង់ ។បើតាមអនុសាសន៍នេះលោកគួចចំរើនបើទោះបីជាខ្លាំងប៉ុនណា(មានឯកឧត្តមជាសុផារ៉ាជាបង្អែក)ក៏មិនអាចដោះស្រាយបានដែរព្រោះអាណាចក្រខេត្តព្រះសីហនុជាសម្បុកខ្លាចំការនាគដែលសូម្បីតែព្រះឥន្ទពេលខ្លះដោះមិនចេញសុខចិត្តបិទភ្នែកធើមិនដឹងដែរ)ក៏ដោះស្រាយម្នាក់ឯងមិនបានដែរវានឹងធ្លាក់ចូលក្នុងស្ថានភាពលោកយន្តមីនជាមិនខាន!។
ទោះជាយ៉ាងណា សម្ដេច ស ខេង លើកឡើងដែរថា មានក្រសួងចំនួន៤ ដែលពាក់ព័ន្ធបញ្ហានេះ គឺក្រសួងរៀបចំដែនដី នគរូបនីយកម្ម និងសំណង់, ក្រសួងសាធារណការ និងដឹកញ្ជូន, ក្រសួងបរិស្ថាន, ក្រសួងធនធានទឹក និងឧតុនិយម ត្រូវរួមគ្នាដោះស្រាយ ដើម្បីកុំឲ្យមានការកកស្ទះលូភ្លើងលិចទឹកសម្អុយ និងឲ្យខូចសោភ័ណភាពទីក្រុង ។
