ភ្នំពេញ ៖ រូបភាពលោកជាពីសីអភិបាលខណ្ឌឬស្សីកែវរាជធានីភ្នំពេញដេកលក់ក្នុងអង្គប្រជុំមីទ្ទីងទិវាប្រយុទ្ធប្រឆាំងគ្រឿងញៀន កាលពីថ្ងៃ២៦ ខែមិថុនា ឆ្នាំ២០១៩ ទទួលបានការចាប់អារម្មណ៍ពីអ្នកលេងបណ្តាញសង្គមដោយរិះគន់ថាមន្ត្រីអត់ខ្លាចសម្តេចក្រឡាហោមអីតិច?!។ខ្លះថាមកពីផឹកយប់ជ្រៅពេក!។
តែ បន្ទាប់ពីមានការបង្ហោះនូវរូបភាព និងវីដេអូរបស់លោក ជា ពិសី បានគេងលក់នៅក្នុងពិធី លោក ជា ពិសី ក៏បានធ្វើការបកស្រាយតាមរយៈគណនីហ្វេកប៊ុក ថា កាលពីថ្ងៃ២៦ ខែមិថុនា ឆ្នាំ២០១៩ម្សិលមិញ Page Facebook មួយចំនួន បានបង្ហោះ រូបភាព និង វីឌីអូ អំពីខ្ញុំ គ្រាដែលខ្ញុំបាទបានបិទភ្នែភ សំងំ មួយសន្ទុះ ដោយសារភាពអស់កម្លាំង បូករួមទាំង បញ្ហាសុខភាពផ្ទាល់ខ្លួនផងនោះ ក្នុងទិវាប្រយុទ្ធប្រឆាំងគ្រឿងញៀនកាលម្សឹលមិញ នៅកោះពេជ្រ ដោយបានបង្ហោះចែកចាយក្នុងបណ្តាញសង្គម។
ខ្ញុំបាទសូមឆ្លើយតប និងបកស្រាយជូន សាធារណៈមតិ មេត្តាជ្រាបថា ៖ ប៉ុន្មានថ្ងៃមកនេះ ម្ដាយជរារបស់ខ្ញុំ អាយុ ៨០ ឆ្នាំ កំពុងមានជម្ងឺជាទម្ងន់ និងកំពុងសម្រាកព្យាបាល នៅឯមន្ទីរពេទ្យ។ កាតព្វកិច្ចដ៏ធំបំផុតរបស់ខ្ញុំ ក្នុងនាមជាកូនកត្តញ្ញូមួយរូប ខ្ញុំតែងតែទៅមើលថែរទាំ ម្ដាយរបស់ខ្ញុំ ស្ទើរតែរៀងរាល់ យប់ក្រោយបានសម្រាកពីការដឹកនាំការងាររដ្ឋបាលរួចមក។
លោកបន្តថា គាប់ជួននៅយប់ថ្ងៃទី២៥ ខែមិថុនាកន្លងមកនេះ ខ្ញុំបាទ បានទៅមើលថែរ ម្ដាយជរា ឈឺធ្ងន់ រហូតដល់ម៉ោងជាង២យប់ រំលោងអាធ្រាតថ្ងៃទី២៦ ខែមិថុនា ទើបនឹងបានសម្រាកប៉ុន្មានម៉ោងប៉ុណ្ណោះ នៅក្នុងថ្ងៃដដែលនោះ វេលាម៉ោង ៥ព្រឹក ខ្ញុំបាទត្រូវក្រោកពីព្រឹកព្រលឹម ដើម្បីទៅដឹកនាំកម្លាំងមហាជន ចូលរួម កម្មវិធី នៅឯកោះពេជ្រទៀត។
