ភ្នំពេញ៖ បុរសម្នាក់ ដែលរួចជីវិតពីការចាប់ដុតទាំងស្រស់ពីសំណាក់លោក លី ស្រេង និងបក្ខពួកកាលពីព្រឹកថ្ងៃទី២១ ខែមករា ឆ្នាំ២០១៩ បានសម្រេចដាក់ពាក្យប្តឹងសុំឲ្យឯកឧត្តម អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ និង អគ្គព្រះរាជអាជ្ញា នៃមហាអយ្យការអមសាលាឧទ្ធរណ៍ ឲ្យជួយរកយុត្តិធម៌ក្រោយពីលោក សៀង សុខ ព្រះរាជអាជ្ញា នៃអយ្យការអមសាលាដំបូងខេត្តព្រះសីហនុទុកសំណុំរឿងមានចាត់ការ?។
ជនរងគ្រោះឈ្មោះ ស៊ុយ ប៊ុនថាន អាយុ៣៦ឆ្នាំ ភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ បានឲ្យដឹងតាមរយៈពាក្យបណ្តឹងថា កាលពីព្រឹកថ្ងៃទី២១ ខែមករា ឆ្នាំ២០១៩ ខ្លួនបានស៊ីឈ្នួលបើកអេស្កាវ៉ាទ័រ ឈូសសម្អាតដីឲ្យឈ្មោះ ស៊ិន វិសាល ជាម្ចាស់ដី ដែលត្រូវតុលាការអនុវត្តដីកាសម្រេចប្រគល់ឲ្យ នៅចំណុចផ្លូវលេខ៨២២ ភូមិទី៥ សង្កាត់លេខ៤ ក្រុងព្រះសីហនុ ខេត្តព្រះសីហនុ ហើយពេលនោះ ឈ្មោះ លី ស្រេង និងមនុស្សមួយក្រុមទៀត បានចាក់សាំងដុត នៅចំពោះសមត្ថកិច្ចចម្រុះ មននគរបាល និងកងរាជអាវុធហត្ថខេត្តព្រះសីហនុ។
លោក ស៊ុយ ប៊ុនថាន បានបញ្ជាក់ ថា «អំពើរបស់ឈ្មោះ លី ស្រេង គឺជាបទល្មើសឧក្រិដ្ឋដ៏សាហាវ ឃោរឃៅ និងព្រៃផ្សៃបំផុត ដោយមានបំណងចង់សម្លាប់ខ្ញុំបាទ ដែលជាអ្នកស៊ីឈ្នួលបើកបរអស្កាវ៉ាទ័រ»។ ឈ្មោះ លី ស្រេង និងបក្ខពួក នាំគ្នាគប់ដុំថ្មលើអេស្កាវិទ័រ និងយកសាំងដុតជនរងគ្រោះ រួមទាំងអេស្កាវ៉ាទ័រតែម្តង ភ្លាមៗនោះ សមត្ថកិច្ចបានជួយអន្តរាគមន៍ជួយសង្គ្រោះជនរងគ្រោះ ដោយបញ្ជូនទៅមន្ទីរពេទ្យ និងឃាត់ខ្លួនឈ្មោះ លី ស្រេង និងបក្ខពួកផងដែរ។
ប៉ុន្តែក្រោយមក ក្រុមជនសង្ស័យ ដែលប្រព្រឹត្តអំពើដ៏សាហាវ ក្នុងបំណងសម្លាប់ជនរងគ្រោះទាំងរស់បែបនេះ ក៏ត្រូវបានដោះលែងឲ្យមានសេរីភាពវិញ រហូតមកដល់ពេលនេះ មិនត្រូវបានលោក សៀង សុខ ព្រះរាជអាជ្ញាអមសាលាដំបូងខេត្តព្រះសីហនុ ចោទប្រកាន់ នៅឡើយទេ។
ពាក្យបណ្តឹងឲ្យដឹងថា «នៅថ្ងៃទី២៤ ខែមករា ឆ្នាំ២០១៩ ជនរងគ្រោះឈ្មោះ ស៊ុយ ប៊ុនថាន ក៏បានដាក់ពាក្យប្តឹងឈ្មោះ លី ស្រេង និងបក្ខពួក ចូលស្ថាប័នអយ្យការអមសាលាដំបូងខេត្តព្រះសីហនុ ប៉ុន្តែតាំងពីដាក់ពាក្យប្តឹង រហូតមកដល់ពេលនេះ លោក សៀង សុខ ដែលជាព្រះរាជអាជ្ញា ទទួលបន្ទុកចាត់ការសំណុំរឿងនេះ ហាក់មិនទាន់មានចំណាត់ការអ្វីទាំងអស់ចំពោះ ក្រុមជនល្មើស»។
ពាក់ព័ន្ធករណីខាងលើនេះភ្នាក់ងារសារព័ត៌មាន បានព្យាយាមសុំការបញ្ជាក់ពីលោក សៀង សុខ តាម Telegram តែលោកមិនឆ្លើយតបឡើយ៕
