កម្ពុជា៖ អង្គការអ្នកប្រជាធិបតេយ្យនិយមកណ្តាលអន្តរជាតិ (CDI) នៅថ្ងៃទី២០ ខែមិថុនា ឆ្នាំ២០១៩នេះបានសម្តែងការព្រួយបារម្ភរឿងEBAរបសសហគមន៍អឺរ៉ុបដោយបានរំលឹកពីសេចក្តីសម្រេចចិត្តរបស់ខ្លួនកាលពីខែមេសាឆ្នាំ២០១៩ ដែលទាមទារឱ្យសហភាពអឺរ៉ុប ផ្តល់យុត្តិធម៌ចំពោះកម្ពុជា ពាក់ព័ន្ធទៅនឹងក្របខណ្ឌ រាល់មុខទំនិញទាំងអស់លើកលែងតែអាវុធ (EBA)។
ក្នុងកិច្ចប្រជុំលើកទី២នៃក្រុមការងារបង្កើតវិទ្យាស្ថានស្រាវជ្រាវរបស់អង្គការអ្នកប្រជាធិបតេយ្យនិយមកណ្តាលអន្តរជាតិ CDI ដែលបានធ្វើឡើងនៅរាជធានីភ្នំពេញ នាថ្ងៃទី២០ ខែមិថុនា ឆ្នាំ២០១៩នេះCDI បានគូសបញ្ជាក់យ៉ាងដូច្នេះថា៖ «យើងសូមទាមទារឲ្យសហភាពអឺរ៉ុបមានទស្សនៈទន់ភ្លន់ជាងនេះចំពោះកម្ពុជា ដោយធ្វើការគិតគូរទៅដល់ជីវភាពប្រជាជនរាប់លាននាក់ ដែលពឹងពាក់ទៅលើឧស្សាហកម្មនាំចេញទៅកាន់ទីផ្សារអឺរ៉ុប។
ការដក EBA ពីកម្ពុជា នឹងមិនត្រឹមតែធ្វើឲ្យប៉ះពាល់ដោយផ្ទាល់ ឬដោយប្រយោលទៅដល់ជីវភាពប្រជាជនប្រមាណជិត ៣លាននាក់ វាថែមទាំងធ្វើឲ្យប៉ះពាល់ទៅដល់លទ្ធិប្រជាធិបតេយ្យ ដែលសហគមន៍អន្តជាតិបានធ្វើការវិនិយោគអស់ជាច្រើន ចាប់តាំងពីឆ្នាំ១៩៩៣ នៅពេលដែលកម្ពុជាបានអនុម័តរដ្ឋធម្មនុញ្ញថ្មី»។
កាលពីខែកុម្ភៈ ឆ្នាំ២០១៩ កន្លងទៅ សហភាពអឺរ៉ុបបានប្រកាសអំពីការចាប់ផ្តើមដំណើរការនីតិវិធី ដែលអាចនាំឱ្យមានការផ្អាកជាបណ្តោះអាសន្ន នូវប្រព័ន្ធអនុគ្រោះពន្ធនេះ។ ប្រព័ន្ធ EBA អាចនឹងលុបចោល ប្រសិនបើរកឃើញថាប្រទេសទទួលផលនេះ មិនគោរពសិទិ្ធមនុស្ស និងសិទ្ធិការងារសំខាន់ៗ។ នេះបើយោងតាមសេចក្តីជូនដំណឹង របស់គណៈកម្មការអឺរ៉ុប ចេញផ្សាយនៅថ្ងៃទី១១ ខែកុម្ភៈ ឆ្នាំ២០១៩។
ការសម្រេចព្យួរប្រព័ន្ធអនុគ្រោះពន្ធ គឺត្រូវប្រើរយៈពេលចំនួន១៨ខែ គិតចាប់ពីថ្ងៃចាប់ផ្តើម (១២ កុម្ភៈ ២០១៩) រហូតដល់ការចូលជាធរមាន។ ពោលទំនិញរបស់កម្ពុជានៅតែបន្ត នាំចូលទៅកាន់សហភាពអឺរ៉ុប ដោយមិនជាប់ពន្ធរយៈពេលជាង ១ឆ្នាំទៀត មុននឹងមានការសម្រេចជាថ្មី។
រាជរដ្ឋាភិបាលកម្ពុជា ចាត់ទុកថា ការសម្រេចចិត្តអឺរ៉ុបនេះ ជារឿងភាពអយុត្តិធម៌បំផុត។
ថ្នាក់ដឹកនាំរាជរដ្ឋាភិបាលកម្ពុជា ក៏បានត្រៀមខ្លួនរួចជាស្រេច ព្រមទាំងដាក់ចេញនូវយន្តការផ្សេងៗទៀត ដើម្បីឆ្លើយតបនឹងការដកប្រព័ន្ធអនុគ្រោះពន្ធ EBA ផងដែរ។ប្រមុខរាជរដ្ឋាភិបាលខ្មែរសម្តេចតេជោហ៊ុនសែនធ្លាប់បានប្រកាសថាកម្ពុជាបើទោះជាអត់មានEBAក៏មិនស្លាប់ដែរ?!។
ទោះជាយ៉ាងណាកាលពីដើមខែមិថុនាកន្លងទៅនេះ តំណាងសហភាពអឺរ៉ុប ក្នុងជំនួបជាមួយ លោកឧបនាយករដ្ឋមន្ត្រី ប្រាក់ សុខុន កម្ពុជា-អឺរ៉ុប បានអះអាងថា នឹងប្តេជ្ញាបន្តធ្វើការងារមិនឱ្យកម្ពុជា បាត់បង់ EBA នោះឡើយ។
