ភ្នំពេញ ៖ នគរបាលប្រឆាំងបទល្មើសសេដ្ឋកិច្ច នៃក្រសួងមហាផ្ទៃ នៅថ្ងៃទី២០ ខែមិថុនា នេះ ចុះបង្ក្រាបទីតាំងក្រុមហ៊ុន ហុង ថន ខសបេធីក ឯ ក ស្ថិតនៅភូមិទ្រា១ សង្កាត់ស្ទឹងមានជ័យទី១ ខណ្ឌមានជ័យ ដែលផលិតនិងលក់គ្រឿងសំអាង គ្មានការទទួលស្គាល់ពីក្រសួងសុខាភិបាល ។
ប្រតិបត្តិការនេះ ដឹកនាំដោយលោកស្រី កែវ សុគន្ធា ព្រះរាជអាជ្ញារងអមសាលាដំបូងរាជធានីភ្នំពេញ និង មានការចូលរួមពីលោកឧត្តមសេនីយ៍ទោឡុង ស្រេង អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច លោកវរសេនីយ៍ ឯក ម៉ាត់ យូសុះ នាយការិយាល័យប្រឆាំងបទល្មើសកម្មសិទ្ធិបញ្ញា លោក ឱសថការី សោម សំណាង និងលោកវរសេនីយ៍ទោ មិញ ចន្ថា ។
សមត្តកិច្ចបានដកហូតបានគ្រឿងសម្អាង ២៥ មុខ ស្មើនិងជាង ១២ តោន និងនាំខ្លួនស្ត្រី ២ នាក់ ទៅនាយកដ្ឋានប្រឆាំងបទល្មើសសេដ្ឋកិច្ច ដើម្បីសាកសួរបន្ត ដោយឡែក ទីតាំងខាងលើរួមនិងវត្ថុតាងគ្រឿងសម្អាងខាងលើ ត្រូវបានសមត្ថកិច្ចឃ្លុំបេទុកនៅក្នុងក្រុមហ៊ុន ដើម្បីរង់ចាំចំណាត់ការពីតុលាការបន្តទៀត ។លោកឧត្តមសេនីយ៍ទោ ឡុង ស្រេង អនុប្រធាននាយកដ្ឋាន បានឲ្យដឹងថា ប្រតិបត្តិការនេះ ធ្វើឡើងកាលពីថ្ងៃទី១៩ ខែមិថុនា ឆ្នាំ២០១៩ និងកម្លាំងចម្រុះបានសម្រេចធ្វើការបិទទ្វារ ទីតាំងខាងលើជាបណ្តោះអាសន្ននៅថ្ងៃទី២០ ខែមិថុនានេះ។
