រុស្ស៊ីបារាំង៖ លោកប្រធានាធីបតីចិន ស៊ី ជីនពីង កាលពីថ្ងៃសៅរ៍សប្ដាហ៍មុននេះត្រូវបាន ប្រធានាធីបតីរុស្ស៊ី វ្លាឌីមៀរ ពូទីន (Vladimir Putin) ធ្វើពិធីខួបកំណើតអាយុ ៦៦ឆ្នាំមុនកិច្ចប្រជុំកំពូលស្តីពីកិច្ចសហប្រតិបត្តិការ និងការកសាងជំនឿទុកចិត្តនៅអាស៊ី (CICA) នៅក្នុងទីក្រុង Dushanbe ប្រទេសតាជីគីស្ថាន ដោយមានកាដូ និងនំខេកមួយ ដែលមានអក្សរជាភាសាចិនដែលបង្ហាញពីភាពស្ងិតល្មួតនៃចំណងទាក់ទងរវាងប្រទេសដែលរងការប្រឆាងពីអាមេរិកដូចគ្នា។ នេះបើតាមការចេញផ្សាយដោយសារព័ត៌មាន CGTN នៅថ្ងៃទី១៧ ខែមិថុនា ឆ្នាំ២០១៩។
ទូរទស្សន៍រដ្ឋចិន បានបង្ហាញរូបភាពរបស់លោក ស៊ី ជីនពីង និងលោក ពូទីន បានកាន់កែវស្រាសាំប៉ាញ ជល់កែវជាមួយគ្នា នៅឯសណ្ឋាគារស្នាក់នៅមួយកន្លែង ស្ថិតនៅទីក្រុង Dushanbe រដ្ឋធានីនៃប្រទេសតាជីគីស្ថានដែលជាកន្លែងមេដឹកនាំទាំងពីរចូលរួមកិច្ចប្រជុំ។ ភាពស្អិតល្មួតរវាងមេដឹកនាំប្រទេសទាំងពីបង្កឲ្យមានការព្រួយបារម្ភីសហគមន៍អឺរ៉ុប។
ប្រធានាធិបតីបារាំងលោក អ៊ែម៉ានុយអ៊ែល ម៉ាក្រុង (Emmanuel Macron) បានស្នើឲ្យអឺរ៉ុបគួរតែពិចារណាឡើងវិញ ហើយងាកទៅកសាងទំនុកចិត្តជាមួយរុស្ស៊ី ដោយមិនគួរ បណ្តោយឲ្យរុស្ស៊ីទៅស្អិតល្មួតជាមួយចិននោះឡើយ។ សារព័ត៌មានរុស្ស៊ី Sputnik កាលពីថ្ងៃពុធ ទី១២ ខែមិថុនា ឆ្នាំ២០១៩បានឲ្យដឹងថា៖លោក Macron បានអំពាវនាវ ថា «អឺរ៉ុបត្រូវតែគិតគូរឡើងវិញ អំពីការកសាងទំនុកចិត្ត និងទំនាក់ទំនងផ្នែកសន្តិសុខជាមួយរុស្ស៊ី និងមិនគួរយល់ស្របតែជាមួយគំនិតរបស់អង្គការ NATO ឡើយ»។
លោកប្រធានាធិបតីបារាំង បានទទូចឲ្យភាគីទាំងពីរ គួររក្សាកិច្ចពិភាក្សាបែបយុទ្ធសាស្ត្រជាមួយរុស្ស៊ី បើទោះបីជាមានភាពមិនត្រូវរ៉ូវគ្នាមួយចំនួនក្តី ខណៈវាមិនមែនជារឿងល្អនោះឡើយ ដែលបណ្តោយរុស្ស៊ីឲ្យទៅជិតស្និទ្ធចិន។ប្រធានាធិបតីបារាំង អ៊ីម៉ាន់នូអែល ម៉ាក្រុង បានអំពាវនាវដល់ទីក្រុងប្រ៊ុចសែលឱ្យបង្កើត “ច្បាប់ថ្មីនៃការទុកចិត្ត និងសន្តិសុខ” ជាមួយក្រុងម៉ូស្គូ របស់រុស្ស៊ីដោយនិយាយថា បើមិនដូច្នោះទេ “វាមិនល្អទេដែលទុកឱ្យរុស្ស៊ីនៅជាមួយចិន” ។
គួរជម្រាបថា លោក Macron បានថ្លែងដូចខាងលើនេះបន្ទាប់ពីប្រធានាធិបតីចិនលោក ស៊ី ជិនពីង និងប្រធានាធិបតីរុស្ស៊ីលោក វ្ល៉ាឌីមៀ ពូទីន បានជួបនិងពិភាក្សាគ្នាអំពីឱកាស នៃការពង្រឹងចំណងទាក់ទង ឲ្យកាន់តែរឹងមាំរវាងប្រទេសទាំងពីរ ចំពោះមុខការបង្កព្យុះភ្លៀង កាន់តែខ្លាំងឡើងៗពីសហរដ្ឋអាមេរិក។ ប្រទេសចិន និងរុស្ស៊ីបានចុះកិច្ចព្រមព្រៀង បង្កើតទំនាក់ទំនងយុទ្ធសាស្ត្រ ដែលមិនធ្លាប់មានពីមុនមកនោះឡើយ ដោយក្នុងនោះទំហំពាណិជ្ជកម្មរវាងប្រទេសទាំងពីរ នឹងត្រូវជម្រុញឲ្យដល់ជាង ២០០ពាន់លានដុល្លារ ខណៈវិស័យចម្បងៗផ្សេងទៀតរួមទាំងកិច្ចការពារសន្តិសុខរួមគ្នា ក៏នឹងត្រូវលើកកម្ពស់ឲ្យខ្លាំងជាងមុនផងដែរ។
