កំពង់ឆ្នាំង ៖ ប្រជាពលរដ្ឋឆ្ងល់ថា ៖ តើលោកប៉ក់ម្ចាស់គ្រឿងចក្រមានឥទ្ធិពលអ្វីបានជាថ្លើមធំហ៊ានអះអាងថាមានដីរាប់រយហិចតានៅខាងលិចទំនប់ចាក់ទឹម តាមជើងភ្នំចំណុចជួរភ្នំកញ្ជើបាយដែលជាដីដែនជម្រកសត្វព្រៃឱរាល់ ស្ថិតនៅក្នុងភូមិស្លែង ឃុំទួលខ្ពស់ស្រុកទឹកផុសខេត្តកំពង់ឆ្នាំងហើយ សុទ្ធតែមានផ្លង់រឹង ព្រមទាំងមានច្បាប់ឈូសឆាយហើយថែមទាំងបានឈូស ឆាយហើយជាស្រេចទៀតផង?។
ប្រជាពលរដ្ឋនៅភូមិស្លែងបានអោយដឹងថា៖ ដីព្រៃជាង៣ម៉ឺនហិចតានៅតំបន់ខាងលើជាដីព្រះរាជក្រឹត្យដីដែនជម្រកសត្វព្រៃឱរ៉ាល់ដែលគ្រប់គ្រងដោយមន្ត្រីបរិស្ថានខេត្តកំពង់ឆ្នាំង កំពុងតែរងនូវការរលាយហិនហោចដោយសារជនខិលខូចឃុបឃិតជាមួយអាជ្ញាធរនិងមន្ត្រីជំនាញលួចរំលោភធ្វើផ្លង់រឹងនិងឈូសឆាយយកធ្វើកម្មសឹទ្ធិជាយូមកហើយ (នេះបើតាមឈ្មួញឈ្មោះប៉ក់ដែលជាម្ចាស់គ្រឿងចក្រ)អះអាងថាមានប្លង់រឹង។
ប្រជាពលរដ្ឋបានអោយដឹងថា កន្លងមកមានឈ្មួញម្នាក់មកពីភ្នំពេញឈ្មោះតាទឹកត្រីបានមកទិញដីនៅចំណុចខាងលើនោះដែរតែមិនដឹងខាងណាជាអ្នកលក់អោយនោះទេ? ប៉ុន្តែករណីនេះក្រោយពីបានបែកធ្លាយដល់អ្នកសារព័ត៌មានធ្វើការចុះផ្សាយដឹងដល់ថ្នាក់លើ ទើបតាទឹកត្រីបានបង្វែរលក់ដីនោះទៅអោយឈ្មោះប៉ក់វិញអស់ទៅដោយលក់តែតម្លៃដើមវិញប៉ុណ្ណោះ?!។
ចំណែកឈ្មោះប៉ក់ដោយមានដីដែលខ្លួនលួចឈូសឆាយរំលោភយកដីនៅចំណុចខាងលើខ្លះផងនិងដីទិញគេផងនិងទន្ទ្រានបន្ថែមផងទើបមានដីច្រើនសន្ធឹកសន្ធាប់បែបនេះ។ប្រជាពលរដ្ឋបានសម្ដែងការសោកស្ដាយជាពន់ពេក ចំពោះមន្ត្រីជំនាញបរិស្ថាននិងមន្ត្រីជំនាញសុរិយោដីព្រមទាំង អាជ្ញាធរឃុបឃិតគ្នាបើកដៃអោយជនខិលខូចលួចឈូសឆាយបំផ្លាញដីព្រៃរបស់រដ្ឋយកធ្វើកម្មសិទ្ធបែបនេះ។អំណឹះតទៅដីព្រៃនៅស្រុកទឹកផុសនិងដីជម្រកសត្វព្រៃស្ថិតក្នុងព្រះរាជក្រឹត្យបើថ្នាក់លើក្រសួងនគរូបនីយ៍កម្មដែនដីរបស់លោកជាសុផារ៉ាមិនចាត់ការទេច្បាស់ជារលាយអស់ជាក់ជាមិនខាន ។
ប្រជាពលរដ្ឋថា ៖ សព្វថ្ងៃ ដីដែនជម្រកសត្វព្រៃដែលជាដីព្រះរាជក្រឹត្យនេះគ្រប់គ្រងដោយមន្ត្រីឧទ្យានុរក្ស(មន្ត្រីបរិស្ថាន)នៅស្រុកទឹកផុសកំពុងរលាយជាបណ្ដើរៗហើយ។ចំណែកមន្ត្រីជំនាញនិងអាជ្ញាពាក់ព័ន្ធដេកចាំតែទទួលលាភសការៈពីឈ្មួញទុចរិតមានលុយមានអំណាចតែប៉ុណ្ណោះ?។
ប្រជាពលរដ្ឋទទូចស្នើសុំអង្គភាពសារព័ត៌មានយើងស្រាវរកអ្នកពាក់ព័ន្ធយកមកផ្សាយជូនថ្នាក់ដឹកនាំពិសេសសម្ដេចតេជោហ៊ុនសែនបានដឹងនិងជ្រាបជាព័ត៌មាននិងមានវិធាការចំពោះជនខិលខូចខាងលើនិងបក្ខពួកដែលពូកែខាងឃុបឃិតគ្នារំលោភឈូសឆាយដីព្រៃរបស់រដ្ឋយកធ្វើកម្មសិទ្ធិនិងលក់អោយឈ្មួញផង។មិនអាចទាក់ទងសុំការបកស្រាយពី អាជ្ញាធរឃុំ ទួលខ្ពស់ អាជ្ញាធរស្រុកទឹកផុស និងអាជ្ញាធរខេត្តកំពង់ឆ្នាំងអំពីសេចក្តីរាយការណ៍ខាងលើនេះបានទេ៕