(ខេត្តបាត់ដំបង)៖ រយៈពេល២ថ្ងៃ ពោលគឺនៅថ្ងៃទី៣១ ខែកក្កដា ឆ្នាំ២០១៦នេះ និងថ្ងៃទី៣០ ខែកក្កដាម្សិលមិញ លោកឧត្តមសេនីយ៍ឯក រុន រ័ត្នវាសនា អនុប្រធាន ក្រុមការងារគណបក្សប្រជាជន ចុះជួយស្រុកសង្កែ និងជាប្រធានក្រុមការងារគណបក្សប្រជាជន ចុះជួយឃុំ អន្លង់វិល ឃុំរកា និងឃុំអូរដំបង១ ស្រុកសង្កែ ខេត្តបាត់ដំបង និងក្រុមការងារបានយកអំណោយដែលជា មូលនិធិរបស់ សម្តេចក្រឡាហោម ស ខេង ប្រធានក្រុមការងារគណបក្សប្រជាជនចុះជួយខេត្តបាត់ដំបង ដល់តាមផ្ទះប្រជាពលរដ្ឋ ដែលក្នុងគ្រួសារមានសមាជិកសម្រាលកូន និង គ្រួសារដែលមានសមាជិកស្លាប់ ស្ថិតនៅក្នុងឃុំ អូរដំបង១ ឃុំរកា និងឃុំអន្លង់វិល១៤២គ្រួសារសរុបថវិកា ៣៧,០០០,០០០រៀល។
ក្នុងឱកាសនោះ ឧត្តមសេនីយ៍ រុន រ័ត្នវាសនា អមដំណើរដោយលោកវរសេនីយ៍ឯក ស៊ុយ វុឌ្ឍី ព្រមទាំងសហការី បានចុះសួរសុខទុក និងបាននាំយកថវិកា និងសម្ភារៈមួយចំនួនជូនដល់ លោក កាន សម្បត្តិ ជាប្រធានក្រុមប្រឹក្សាឃុំរកា និង យ័ន រតនា ជាសកម្មជន គណបក្សប្រជាជនកម្ពុជា ក្នុងឃុំរកា ដែលកំពុងមានជំងឺផងដែរ។
បន្ទាប់មក លោកឧត្តមសេនីយ៍ បានដឹកនាំក្រុមការងារបន្តចុះត្រួតពិនិត្យ ការសាងសង់ទីស្នាក់ការ គណបក្សប្រជាជនឃុំរកា ដែលកំពុងដំណើរការសាងសងជិតរួចរាល់ ជាអំណោយរបស់សម្តេច ក្រឡាហោម ស ខេង និងលោកជំទាវ ស្ថិតនៅក្នុងឃុំរកា ស្រុកសង្កែ ខេត្តបាត់ដំបង។ ជានិច្ចជាកាលសម្ដេច ក្រឡាហោម និងលោកជំទាវ តែងតែយកចិត្តទុកដាក់ និងគិតគូរពីសុខទុក្ខរបស់បងប្អូន ប្រជាពលរដ្ឋយើងគ្រប់រូប៕