រុស្ស៊ី៖ ក្រុមហ៊ុន Huawei បានចែករំលែកពីផែនការស្តីពី កិច្ចសហប្រតិបត្តិការជាមួយប្រទេសរុស្ស៊ី ក្នុងកំឡុងជំនួបរបស់លោកប្រធានាធិបតីរុស្ស៊ី វ្ល៉ាឌីមៀ ពូទីន ជាមួយសហគ្រិនអន្តរជាតិ នៅឯវេទិកាសេដ្ឋកិច្ចទីក្រុង សេនភឺធើស៍ប៊ឺក (Saint Petersburg) ហៅកាត់ SPIEF។
សារព័ត៌មានរុស្ស៊ី Sputnik នៅព្រឹកថ្ងៃសៅរ៍ ទី០៨ ខែមិថុនា ឆ្នាំ២០១៩បានឲ្យដឹងថា៖លោក ឃើរីល ឌីមីទ្រីវ (Kirill Dmitriev) ដែលជានាយកប្រតិបត្តិ នៃក្រុមហ៊ុនគ្រប់គ្រងការវិនិយោគរបស់ប្រទេសរុស្ស៊ី កំឡុងជំនួបខាងលើនេះ គឺមានការពិភាក្សាជាច្រើន ប៉ុន្តែអ្វីដែលអាចចាត់ទុកថាជារឿងសំខាន់ជាងគេ នោះគឺការចែករំលែកផែនការសម្រាប់កិច្ចសហប្រតិបត្តិការ ជាមួយប្រទេសរុស្ស៊ី ពីសំណាក់តំណាងក្រុមហ៊ុនបច្ចេកវិទ្យារបស់ចិន Huawei។
ឱកាសនៃដំណើរបំពេញទស្សនកិច្ចរបស់ប្រធានាធិបតីចិន លោក ស៊ី ជិនពីង នៅប្រទេសរុស្ស៊ី ក្រុមហ៊ុន Huawei បានចុះហត្ថលេខាលើកិច្ចព្រមព្រៀង ជាមួយក្រុមហ៊ុនទូរគមនាគមន៍រុស្ស៊ី MTS ដើម្បីអភិវឌ្ឍន៍ប្រព័ន្ធ 5G នៅក្នុងប្រទេសរុស្ស៊ីនៅឆ្នាំក្រោយនេះដើម្បីទប់ទល់ពីការព្យាយាមធ្វើទុក្ខបុកម្នេញពីសំណាក់អាមេរិក និងប្រទេសម្ព័ន្ធមិត្តអាមេរិកមួយចំនួន។
យោងតាមសារព័ត៌មាន Sputnik ចេញផ្សាយនៅថ្ងៃទី៧ ខែមិថុនា ឆ្នាំ២០១៩ បានឱ្យដឹងថា៖ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានចាត់ទុកវិធានការ របស់សហរដ្ឋអាមេរិក ជាការចាប់ផ្តើម នៃសង្គ្រាមបច្ចេកវិទ្យាថ្មីមួយ។
នៅក្នុងវេទិកាសេដ្ឋកិច្ចអន្តរជាតិ St. Petersburgលោក ពូទីន ថា “ឧទាហរណ៍ស្ថានភាពនៅជុំវិញក្រុមហ៊ុន Huawei មានការប៉ុនប៉ង ដែលមិនថែមទាំង ការប្រកួតប្រជែងនោះទេ តែដើម្បីបង្ខំវា (Huawei) ឱ្យចេញពីទីផ្សារពិភពលោក ហើយនៅក្នុងរង្វង់នៃពិភពលោកមួយចំនួនវាថែមទាំងមានលក្ខណៈសម្បត្តិគ្រប់គ្រាន់ជាសង្គ្រាមបច្ចេកវិជ្ជាដំបូង នៃសម័យឌីជីថល។
លោកពូទីនបានបន្ថែមថា ការប៉ុនប៉ងផ្តាច់មុខលើរលកបច្ចេកវិទ្យាថ្មី និងកំណត់លទ្ធភាពប្រើប្រាស់ផលិតផលរបស់ខ្លួនគឺជាប្រភពដ៏សំខាន់នៃអស្ថិរភាពសកល។
សូមជម្រាបថា សហរដ្ឋអាមេរិកបានដាក់បម្រាមលើក្រុមហ៊ុន Huawei កាលពីខែឧសភា ហើយបានដាក់សម្ពាធដល់សម្ព័ន្ធមិត្តបរទេសរបស់ខ្លួនឱ្យឈប់ប្រើឧបករណ៍របស់ក្រុមហ៊ុនចិន ដោយលើកឡើងពីការព្រួយបារម្ភផ្នែកសន្តិសុខ ។ រដ្ឋាភិបាលក្រុងវ៉ាស៊ីនតោនអះអាងថា ក្រុមហ៊ុន Huawei បានដំឡើងកម្មវិធីទ្វារក្រោយនៅលើឧបករណ៍ និងសូហ្វវែររបស់ខ្លួនដើម្បីជួយទីក្រុងប៉េកាំង ត្រូវបានចោទប្រកាន់ថា បានអនុវត្តការចារកម្ម និងការវាយប្រហារតាមអ៊ីនធឺណិត៕
