ភ្នំពេញ៖ អតីតអនុប្រធានគណបក្ស សង្គ្រោះជាតិលោក អេង ឆៃអ៊ាង បានលើកឡើងតាមហ្វេសប៊ុកនៅថ្ងៃទី៣ ខែមិថុនា ឆ្នាំ២០១៩ថា ប្រសិនបើសម្ដេចតេជោ ហ៊ុន សែន និងលោក សម រង្ស៊ី អង្គុយទទួលទាននំបញ្ចុកជាមួយគ្នា នោះទិវានំបញ្ចុកនឹងក្លាយជាទិវាផ្សះផ្សា និងបង្រួបបង្រួមជាតិ?!។
ឮលោក អេង ឆៃអ៊ាង “ប្រសិនបើសម្តេច ហ៊ុន សែន និងលោក សម រង្ស៊ី អង្គុយទទួលទាននំបញ្ចុកជាមួយគ្នា នោះទិវានំបញ្ចុកនឹងក្លាយជាទិវាផ្សះផ្សា និងបង្រួបបង្រួមជាតិ ។ អ្នកនយោបាយគ្មានសត្រូវ ឬមិត្ត នឹងគ្នា មួយជីវិតឡើយ”។
សូមរំលឹកថា ក្នុងពិធីប្រគល់សញ្ញាបត្រ ដល់និស្សិតសាកលវិទ្យាល័យភូមិន្ទភ្នំពេញ (RUPP) កាលថ្ងៃទី៣ ខែមិថុនា ឆ្នាំ២០១៩ សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា និងជាប្រធានគណបក្សប្រជាជនកម្ពុជា បានឲ្យសមាជិក សមាជិកា គណបក្សប្រជាជនទាំងអស់ នាំគ្នាហូបនំបញ្ចុក នៅថ្ងៃទី៩ មិថុនា ដើម្បីបង្រួបង្រួមជាតិ ។
ភ្លាមៗបន្ទាប់ពីសម្ដេច បានប្រកាសយ៉ាងដូច្នេះ លោក សម រង្ស៊ី អតីតមេបក្សប្រឆាំងក៏បានផ្ញើសារ ឲ្យបងប្អូនជនរួមជាតិទាំងអស់នៅកម្ពុជា ជួបជុំគ្នាពិសារនំបញ្ចុកជាមួយគ្នា យ៉ាងសប្បាយរីករាយដោយ គ្មានការភ័យខ្លាច និងអញ្ជើញអ្នកជិតខាង មកទទួលទានជាមួយផង ដោយនេះ ជាស្មារតីមហាគ្រួសារខ្មែរតែមួយដែរ។
តែប៉ុណ្ណេះអ្នកធ្វើនំបញ្ចុកលក់គ្រប់ទឹកហើយ ។ចាំមើលៗក្រែងមាន ក្រុម TV អនឡាញណារហ័សជាង គេចុះទៅសំភាសន៍អ្នកធ្វើនំបញ្ចុកខ្លះ ពិសេសអ្នកធ្វើនំបញ្ចុក នៅម្តុំវត្តគ្រោះ ថិតតាមមាត់ទន្លេសាប ក្នុងទឹកដីខណ្ឌព្រែកព្នៅ រាជធានីភ្នំពេញ ដើម្បីចង់ដឹងថា តើអារម្មណ៍ពួកគាត់សប្បាយ ចិត្ត រីករាយប៉ុនណា នៅពេលបានឮប្រសាសន៍សម្តេចតេជោ ប្រកាសអោយសមាជិក សមាជិការ គណបក្សប្រជាជនកម្ពុជារាប់លាននាក់នៅទូទាំងប្រទេស ជួបជុំគ្នាហូបនំបញ្ចុកខ្មែរ នៅ ថ្ងៃទី ០៩ មិថុនា ២០១៩ ខាងមុខនេះ ខណ:ដែលលោក សម រង្ស៊ី ទណ្ឌិតរត់គេចខ្លួនពីគុកព្រៃស ទៅនៅស្រុកគេអំពាវនាវ អោយប្រជាពលរដ្ឋចូលរួមហូបនំបញ្ចុកនៅថ្ងៃនោះដែរ ។
អត់ មានអីខុសទាស់ទេ មេៗដឹកនាំនយោបាយធ្វើពិធីបែបនេះ គឺជាការល្អ ប្រសើរខ្លាំងណាស់ ព្រោះ គឺបានបង្ហាញពីទឹកចិត្តគោរពស្រលាញ់ ប្រជាពលរដ្ឋដូចគ្នា ឈប់ឈរគប់ដុំថ្ម និងបាញ់ ប្រហារដាក់ពលរដ្ឋ និងម្យ៉ាងក៏ជាការលើកស្ទួយ ជីវភាពអ្នកធ្វើនំបញ្ចុកផងដែរ គឺអាចជូយពួកគាត់សប្បាយ ចិត្តខ្លាំងហើយត្រូវត្រៀមបង្កើនការធ្វើនំបញ្ចុកឡើងទ្វេដង ព្រោះថ្ងៃទី ៩ មិថុនា ២០១៩ មិនដឹងជាមេៗដឹកនាំបក្សនយោ បាយ១ៗ ត្រូវចំណាយលុយប៉ុន្មានលានរៀល នឹង ទិញនំបញ្ចុកប៉ុន្មានតោននោះទេ ដើម្បីធ្វើពិធីដ៏សប្បាយរីករាយនេះ ។
សូមជូនពរដល់ពុក ម៉ែ មីង ពូ អ៊ុំ បងប្អូនប្រជាពលរដ្ឋខ្មែរ ជាអ្នកធ្វើនំបញ្ចុកលក់ អោយទទួលបានប្រាក់ច្រើន និងជួប សំណាងហេងៗ ចឹងរហូតរាល់ថ្ងៃ ។ តែសូមតែម្យ៉ាងបានហើយ កុំឆក់ឱកាសនេះតម្លើងថ្លៃនំបញ្ចុកអោយសោះ ព្រោះ ថ្ងៃធម្មតាខ្ញុំញាំនំបញ្ចុក១ចានតម្លៃតែ៣០០០រៀលទេ បើឡើងថ្លៃខ្ញុំច្បាស់ជាខានញាំនំបញ្ចុកហើយមើលទៅ ៕