ភ្នំពេញ ៖ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ លោក ទៀ បាញា់តាមរយៈហ្វេសប៊ុកថ្ងៃទី៣១ឧសភានេះ បានជំរុញឱ្យខ្មែរគ្រប់រូបត្រូវឈរនៅលើគោលការណ៍បង្រួបបង្រួម និងផ្សះផ្សាជាតិ ដោយថា ជាមាគ៌ាដ៏សំខាន់ឆ្ពោះទៅរកសន្តិភាពជូនសង្គមជាតិ។
លោកនាយឧត្តមសេនីយ៍ទៀបាញ់សរសេរថា៖«ការផ្សះផ្សានិងបង្រួបបង្រួមជាតិជាគោលការណ៍យ៉ាងសំខាន់ដែលនាំមកនូវសន្តិភាពជូនសង្គមជាតិ និងបន្តរក្សាសន្តិភាពដែលយើងទទួលបានយ៉ាងលំបាក បន្ទាប់ពីសង្គ្រាមស៊ីវិលអស់ជាង ៣ទសវត្សរ៍។ យើងត្រូវរួមគ្នារក្សាឱ្យបាននូវវប្បធម៌ផ្សះផ្សា និងបង្រួបបង្រួមជាតិនេះ»។
អ្នកនាំពាក្យក្រសួងការពារជាតិ លោក ឈុំ សុជាតិ ទទួលស្គាល់ថា សារដែលបង្ហោះនៅលើទំព័រហ្វេសប៊ុកជាសារនយោបាយរបស់លោករដ្ឋមន្ត្រី ប៉ុន្តែ លោក ឈុំ សុជាតិ មិនអាចបង្ហាញការយល់ឃើញអំពីសារនេះបានទេ។
អ្នកវិភាគ និងសង្គមស៊ីវិល មើលឃើញថា សារនយោបាយរបស់រដ្ឋមន្ត្រីក្រសួងការពារជាតិ ផ្ទុយគ្នាទាំងស្រុងទៅនឹងការលើកឡើងរបស់លោកនាយករដ្ឋមន្ត្រី ហ៊ុន សែន ពីប្រទេសជប៉ុន ។ ថ្លែងក្នុងវេទិកាអន្តរជាតិលើកទី២៥ ស្តីពីអនាគតអាស៊ី កាលពីថ្ងៃទី៣០ ខែឧសភា នៅទីក្រុងតូក្យូ សម្តេច ហ៊ុន សែន អះអាងថា លោកកំពុងរង់ចាំធ្វើសង្គ្រាមជាមួយអតីតប្រធានគណបក្សសង្គ្រោះជាតិ លោក សម រង្ស៊ី ហើយនឹងធ្វើដល់ទីបញ្ចប់ ដោយថា សង្គ្រាមនេះ លោកនឹងមិនអាចចាញ់បានឡើយ។
សម្តេចតេជោ បានថ្លែងបញ្ជាក់ដូច្នេះថា៖ «ខ្ញុំសូមប្រកាសថ្ងៃនេះថា វិធានការច្បាប់នឹងត្រូវតែបន្តចំពោះជនដែលត្រូវបានចោទប្រកាន់។ ទន្ទឹមនេះ ខ្ញុំក៏កំពុងរង់ចាំការធ្វើសង្គ្រាមមួយ ដែលគេបានប្រកាសថា នឹងចលនាឱ្យពលរដ្ឋខ្មែរខ្លះនៅជប៉ុន ខ្មែរខ្លះនៅកូរ៉េខាងត្បូង ខ្មែរខ្លះនៅថៃ ខ្មែរខ្លះនៅក្នុងប្រទេសកម្ពុជា ធ្វើសង្គ្រាម ដើម្បីមកចាប់ខ្ញុំ។ ដរាបគេមិនទាន់ធ្វើចប់ទេខ្ញុំក៏មិនទាន់ធ្វើអ្វីដែរ អ៊ីចឹងខ្ញុំសូមប្រកាសដោយចំហរពីទីនេះ ឱ្យពិភពលោកបានដឹងថា ខ្ញុំកំពុងរង់ចាំសង្គ្រាមមួយដែលវានឹងកើតឡើង តាមរយៈការប្រកាសរបស់ជនក្បត់ជាតិ គេហៅថា ឆ្កែមួយក្បាល ដែលស្រែកពីក្រៅប្រទេស។
ប្រកាសឱ្យប្រជាពលរដ្ឋចាប់ហ៊ុន សែន។ អ៊ីចឹងខ្ញុំមិនធ្វើអ្វីផ្សេងទៀត ក្រៅតែពីដំណើរការផ្លូវច្បាប់ ហើយទុកលទ្ធភាពឱ្យឆ្កែមួយក្បាល ដែលស្រែកពីបរទេសឱ្យកងទ័ពប៉ះបោរ ឱ្យប្រជាពលរដ្ឋប៉ះបោរ ហើយចាប់ ហ៊ុន សែន យកទៅផ្តន្ទាទោសខ្ញុំទុកពេលឱ្យគេធ្វើ។ ដរាបណាគេមិនទាន់ប្រកាសចុះចាញ់សង្គ្រាមនេះទេ ខ្ញុំក៏មិនទាន់ធ្វើអ្វីផ្សេងទៀតដែរ។ ហើយខ្ញុំដំណើរការទៅតាមអ្វីដែលខ្ញុំកំពុងធ្វើ ហើយនឹងដាក់ចេញនូវគោលដៅទាក់ទិនជាមួយដំណើរការសេដ្ឋកិច្ច ហើយឥឡូវនេះទើបនឹងដំណើរការការបោះឆ្នោតក្រុមប្រឹក្សា»។
អ្នកវិភាគនយោបាយ លោកបណ្ឌិត ឡៅ ម៉ុងហៃ បានចាត់ទុក ការប្រកាសរបស់លោក ទៀ បាញ់ ជាចំណុចវិជ្ជមាន ប៉ុន្តែ លោកចង់ឱ្យរដ្ឋាភិបាលយកគោលនយោបាយឈ្នះៗ មកដោះស្រាយវិបត្តិអ្នកនយោបាយខ្មែរបច្ចុប្បន្ន។លោកផ្តល់សម្ភាសន៍ថា «វិជ្ជមាន ប៉ុន្តែ គឺអនុវត្តគោលនយោបាយឈ្នះៗទៅ ដើម្បីដោះស្រាយបញ្ហាសព្វថ្ងៃ ឬក៏ជម្លោះរវាងខ្មែរ និងខ្មែរហ្នឹង។ កាលពីមុនបានអនុវត្តគោលនយោបាយឈ្នះៗហ្នឹងទៅ ឱ្យខាងខ្មែរក្រហមដែលជាបនប្រល័យពូជសាសន៍ឈ្នះដែរនោះ ដើម្បីបញ្ចប់សង្គ្រាមនោះ។ ចុះឥលូវ គួរយកគោលនយោបាយឈ្នះហ្នឹងមកអនុវត្តជាថ្មីទៀតទៅ» ។
