បន្ទាយមានជ័យ៖ នៅភូមិចំការគ ឃុំស្វាយចេក ស្រុកស្វាយចេក ខេត្តបន្ទាយមានជ័យ មានច្រករបៀងមួយដែលមានប៉ុស្តិ៍យោធាការពារព្រំដែន គ្រប់គ្រងដោយលោកឧត្តមសេនីយ៍ត្រី ឃួន ជឿន មេបញ្ជាការការពារព្រំ ដែនលេខ៥០៣ ចំណុះបញ្ជាការដ្ឋានយោធភូមិភាគ៥នោះត្រូវបានគេរាយការណ៍មកថាបាននិង បើកឲ្យមានបទល្មើសឆ្លងដែន ដោយមិនខ្វល់ពីច្បាប់ឡើយ។
តាមប្រជាពលរដ្ឋឲ្យដឹងថាច្រករបៀងចំការគរ ក្រៅនាំកម្មករខុសច្បាប់ចូលទៅធ្វើការដោយខុសច្បាប់ក្នុងទឹកដីថៃ ក៏នាំចេញពីកម្ពុជាផងដែរ គឺមានដូចអង្កាម ស្រូវ និងដំឡូង ជាដើម។ ប៉ុន្តែសម្រាប់ទំនិញខុសច្បាប់នាំចូលពីថៃមកវិញ ត្រូវបានគេលាក់ជិត និងលួចធ្វើតែនៅពេលស្ងាត់ប៉ុណ្ណោះ។
ចំពោះបទល្មើសឆ្លងដែនតាមច្រករបៀងចម្ការគនេះវិញ មានដូចជា នាំចូលម៉ូតូគេចពន្ធ, រថយន្តចង្កូតស្ដាំ, គ្រឿងអេឡិចត្រីនិច្ច សត្វមាន់ ទា គោ ក្របី នាំចូលមកពីទឹកដីថៃដោយគ្មានច្បាប់អនុញ្ញាត និងបង់ពន្ធត្រឹមត្រូវនោះទេ។ប្រភពដដែលបានបន្តទៀតថា លោកឧត្តមសេនីយ៍ត្រី ឃួន ជឿន មេបញ្ជាការការពារព្រំដែនលេខ៥០៣ បានដាក់មនុស្សជំនិតរបស់ខ្លួននៅប៉ុស្តិ៍ចម្ការគ ដើម្បីប្រមូលប្រាក់ចែកគ្នាធ្វើមានបាន។
ប្រជាពលរដ្ឋរស់នៅតាមបន្ទាត់ព្រំដែនចម្ការគ បានឲ្យដឹងថា «ក្រៅពីបទល្មើសសេដ្ឋឆ្លងដែនដោយខុសច្បាប់នាំចូលពីប្រទេសថៃ មន្ត្រីយោធាប្រចាំការប៉ុស្តិ៍ព្រំដែនចម្ការគ បានបើកឲ្យពលករខ្មែរធ្វើចំណាកស្រុកឆ្លងដែនដោយខុសច្បាប់ទៅធ្វើការងារនៅប្រទេសថៃ តាមរយៈមេខ្សល់ផងដែរ»។
លោកឧត្តមសេនីយ៍ត្រី ឃួន ជឿន មេបញ្ជាការការពារព្រំដែន៥០៣ ធ្លាប់បានប្រកាសបិទច្រករបៀងទាំងអស់បន្ទាប់ពីរងការរិះគន់ថា កាងទំនិញល្មើសច្បាប់ពីប្រទេសថៃចូលតាមច្រកអូរបីជាន់ ច្រកចម្ការគ និងច្រកមួយចំនួនទៀត។ ប៉ុន្តែក្រោយពីការប្រកាសនេះ ហាក់គ្មានប្រសិទ្ធភាពទាល់តែសោះ រីឯបទល្មើសនៅបន្តកើតមានដដែលជាដដែលបើទោះជាមេបញ្ជាកការភូមិភាគ៥លោកឧត្តមសេនីយ៍ប៊ុនសេងដែលជាមេលោកឧត្តមសេនីយ៍ឃួនជឿនត្រូវបានដូរចេញដាក់លោកឧត្តមសេនីយ៍ឯកសំអូនជាមេភូមិភាគ៥ជំនួសវិញក៏ដោយ។
សូមរម្លឹកដែរថា ច្រករបៀងចម្ការគ កាលពីមុនមានលោក នាង រិទ្ធិឆ័យ ជាប្រធានប៉ុស្តិ៍នេះ ប៉ន្តែក្រោយមកត្រូវលោកឧត្តមសេនីយ៍ ឃួន ជឿន ដកចេញពីប៉ុស្តិ៍ ដែលមានសេដ្ឋកិច្ចនេះ រួចដាក់ជំនួសមកវិញ ដោយកូនប្រុសរបស់ខ្លួន រហូតដល់បច្ចុប្បន្នដើម្បីគ្រប់គ្រងកន្លែងនេះ។
