ភ្នំពេញ ៖ កម្លាំងសមត្ថកិច្ចនៃប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញនៅថ្ងៃទី២៩ ខែឧសភា ឆ្នាំ២០១៩ បានធ្វើការឃាត់ខ្លួនជនជាតិចិនម្នាក់ទៀត ដែលនាំលុយជិត១លានដុល្លារ ពីទីក្រុងហុងកុង ប្រទេសចិនចូលមកស្រុកខ្មែរតាមវ៉ាលី។
ប្រភពពីអគ្គនាយកដ្ឋានអន្តោប្រវេសន៍ បានឱ្យដឹងថា៖ ជនជាតិចិនម្នាក់ ដែលនាំលុយចូលស្រុកខ្មែរឆៅៗមានឈ្មោះថាលាវជិងគិង( LIAO JINGQING) កើតថ្ងៃទី១៦ ខែវិច្ឆិកា ឆ្នា១៩៧១ កាន់លិខិតឆ្លងដែនលេខ EG0115690 ពាក់ព័ន្ធករណីនាំប្រាក់ចំនួន ៨៥៥,០០០ដុល្លារអាមេរិក ពីទីក្រុងហុងកុង ចូលមកប្រទេសកម្ពុជា”។
ជនសង្ស័យបានសារភាពថា៖”ខ្លួនបានចូលមកកម្ពុជាចំនួន០២លើក ក្នុងនោះលើកទី១ កាលពីថ្ងៃទី២៦ ខែឧសភា ឆ្នាំ២០១៩ និងលើកចុងក្រោយ ថ្ងៃទី២៩ ខែឧសភា ឆ្នាំ២០១៩នេះ ក៏ត្រូវសមត្ថកិច្ចឃាត់ខ្លួនតែម្តង។ ជនសង្ស័យ មានមុខរបរនៅចិន ជាអ្នកធ្វើការផ្នែកដេគ័រ នៅសណ្ឋាគារ”។ជនសង្ស័យបានបន្ដទៀតថា៖”គោលបំណងនាំប្រាក់មកកម្ពុជា ដើម្បីវិនិយោគលើផ្នែកដេគ័រ ជាមួយប្អូនជីដូនមួយឈ្មោះ LIAO YUPENG (ប៉ុន្តែមិនស្គាល់ឈ្មោះក្រុមហ៊ុន)។
ប្រាក់ខាងលើ បានបើកពីធនាគារឈ្មោះឡុង យៀក ក្នុងទីក្រុងហុងកុង នាំយកមកកម្ពុជា”។សមត្ថកិច្ច បានឲ្យដឹងថា៖”ភស្តុតាងដែលត្រូវបានដកហូតរួមមាន៖ លិខិតឆ្លងដែនចិនចំនួន១ក្បាល, ប្រាក់ចំនួន៨៥៥,០០០ដុល្លារអាមេរិក (៧២ដុំ), ទូរស័ព្ទដៃចំនួន០១គ្រឿង និងកាបូបធំចំនួន០២។ បច្ចុប្បន្ន ជនសង្ស័យត្រូវបានឃាត់ខ្លួន ដើម្បីសាកសួរ និងអនុវត្តនីតិវិធីបន្ត”។
គូសបញ្ជាក់ផងដែរថា ការចាប់ខ្លួនជនជាតិចិនរូបនេះ ដោយសារតែលុយទាំងនោះមានការសង្ស័យថា ជាលុយដែលមានប្រភពមិនច្បាស់លាស់។សូមរំលឹកដែរថា កាលពីថ្ងៃទី២៣ ខែមេសាកន្លងទៅនេះ កម្លាំងនគរបាលអន្ដោប្រវេសន៍ និងអគ្គនាយកដ្ឋានគយ និងរដ្ឋាករ ប្រចាំនៅអាកាសយានដ្ឋានអន្ដរជាតិភ្នំពេញ បានធ្វើការឃាត់ខ្លួនជនជាតិចិនចំនួន៣នាក់ ដែលបាននាំលុយមកកាន់ប្រទេសកម្ពុជាចំនួន ៣,៥២០,០០០ដុល្លារអាមេរិក ដោយពុំមានការបញ្ជាក់ពីប្រភពហរិញ្ញវត្ថុច្បាស់លាស់ដែរ។
សូមបញ្ជាក់ថាបើតាមប្រភពពីកាសែតបរទេសស្ថាបន័ហិរញ្ញវត្ថុអន្តរជាតិបាននិងកំពុងជម្រុញឲ្យធនាគារជាតិកម្ពុជាជួយរឹតបន្តឹងការទប់ស្កាត់សកម្មភាពលាងលុយកខ្វក់ដែលអាចកើតឡើងក្នុងស្រុកខ្មែរដោយសារប្រពន្ធ័ត្រួតពិនិត្យនៅមិនទាន់រឹងមាំ។