សៀមរាប ៖ កាលពីថ្ងៃទី២៥ ខែឧសភា ឆ្នាំ២០១៩ ចៅក្រមស៊ើបសួរសាលាដំបូងខេត្តសៀមរាបបានចេញដីកាឃុំខ្លួន លោកវរសេនីយ៍ទោ ប៊ុន លីវង្ស ជាមន្ត្រីនគរបាលខេត្ត ពាក់ព័ន្ធករណីជួញដូរគ្រឿងញៀនក្នុង ខេត្តសៀមរាប។
មន្ត្រីនគរបាលសក្តិ័៤កន្លះយកអំណាចជួញដូគ្រឿងញៀនម្នាក់នេះមានឈ្មោះថា ប៊ុន លីវង្ស អាយុ៣០ឆ្នាំពី ពាក់ព័ន្ធនឹងបទល្មើសរក្សាទុក និងជួញដូរដោយខុសច្បាប់នូវសារធាតុញៀន ប្រព្រឹត្តនៅភូមិទ្រាំង សង្កាត់ស្លក្រាម ក្រុងសៀមរាប ខេត្តសៀមរាប កាលពីថ្ងៃទី១៦ និងថ្ងៃទី១៧ ខែឧសភា ឆ្នាំ២០១៩យោងតាមបទល្មើសព្រហ្មទណ្ឌដែលមានចែងឲ្យដាក់ទោសតាមបញ្ញត្តិមាត្រា៤០ កថាខណ្ឌ១.៣ និងកថាខណ្ឌ៧ ចំណុច៤ នៃច្បាប់ស្តីពីការត្រួតពិនិត្យគ្រឿងញៀន។
សូមជម្រាបជូនថាថ្មីៗនេះនៅភ្នំពេញ លោកឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានប្រកាសថានឹងធ្វើតេស្ដទឹកនោមនគរបាលរាជធានីភ្នំពេញ រកសារធាតុញៀនឆាប់ៗនេះ។លោកសថេតបានក្រើនរំលឹកដល់មន្ត្រីនគរបាលទាំងអស់ ត្រូវស្អាតស្អំ មិនពាក់ព័ន្ធនឹងគ្រឿងញៀន ខណៈបច្ចុប្បន្នយើងកំពុងតែរកឧបករណ៍ពិនិត្យទឹកនោមឱ្យគ្រប់ចំនួន៕
