រតនគិរី ៖ នៅក្នុងអាណាចក្រខេត្តរតនគិរី មេឈ្មួញរកស៊ីឈើខុសច្បាប់ម្នាក់ទៀត ដែលគេស្គាល់ឈ្មោះថា នី កាចាញ បាននិងកំពុងនាំគ្រឿងចក្រនិងកៀងគរបក្ខពួក ចូលទៅក្នុងតំបន់ ព្រៃសហគមន៍ពីរកន្លែងស្ថិតនៅក្នុង ស្រុកអណ្ដូងមាស ខេត្តរតនគិរី ដើម្បីប្រមូលយកឈើ ដឹកជញ្ជូនទៅលក់ឲ្យឈ្មួញវៀតណាម។
សេចក្តីរាយការណ៏ពីស្រុកអណ្តូងមាសបានឲ្យដឹងថា កាលពីយប់ថ្ងៃទី២២ ឧសភា ២០១៩ នៅច្រកហ្វាសាវ ឃុំញ៉ាង មានរថយន្តនឹងម៉ូតូដឹកឈើប្រមាណជិត១០០គ្រឿង បានសម្រុកដឹកចេញតំបន់ឧទ្យានជាតិវីរៈជ័យ ឆ្លងដែនទៅប្រទេសវៀតណាម..ក្រោមចំណាត់ការរបស់លោក នី កាចាញដែលកន្លងមកជាឈ្មួញល្បីឈ្មោះខាងរត់ពន្ឋឈើខុសច្បាប់ទៅក្រៅប្រទេស។
មេឈ្មួញឈើខុសច្បាប់ឈ្មោះ នីកាចាញ បានធ្វើសកម្មភាពដឹកជញ្ជូនឈើប្រណីតជាទ្រង់ទ្រាយធំ ចេញពីស្រុកអូរជុំ ឆ្លងកាត់ ក្រុងបាលុង ឆ្ពោះទៅកាន់ច្រកទ្វារព្រំដែនអន្តរជាតិអូរយ៉ាដាវ ដោយដឹកតាមរថយន្តយីឌុបភ្លៅ៦ ប៉ុន្តែ ជាបន្តបន្ទាប់ទៀតរហូតសព្វថ្ងៃ ឈ្មួញរូបនេះ បានប្តូររូបភាពដឹកជញ្ជូនឈើប្រណីតដោយខុសច្បាប់តាមរថយន្តប្រភេទទេសចរណ៍វិញ ចូលទៅលក់ក្នុងទឹកដីវៀតណាម តាមច្រកទ្វារព្រំដែនអន្តរជាតិអូរយ៉ាដាវ ដោយមានការឃុបឃិតពីសមត្ថិកិច្ច និងអាជ្ញាធរខេត្តរតនគិរី។
ប្រជាសហគមន៍ការពារព្រៃឈើ បានបញ្ជាក់យ៉ាងច្បាស់ថា សកម្មភាពកាប់ឈើដោយខុសច្បាប់នេះ គឺស្ថិតនៅក្បែរ ភូមិបាដល ឃុំញ៉ាង ស្រុកអណ្តូងមាស ខេត្តរតនគិរី ដោយប្រើរថយន្តបង្កុងដឹកឈើហុបមូល ទើបតែកាប់បានថ្មីៗស្រស់ៗ ពីដែនព្រៃឈើសហគមន៍។
មេឈ្មួញឈើដ៏សកម្មឈ្មោះ នី កាចាញ ម្នាក់នេះប្រជាពលរដ្ឋនិយាយថា គឺជាក្រុមធ្លាប់រកស៊ីជាមួយលោក គឹម រស្មី អតីតមេបញ្ជាការកងរាជអាវុធហត្ថខេត្តរតនគិរីនេះតែម្ដង អ៊ីចឹងហើយបានជាគេជាប់ដានរកស៊ីឈើ ដោយមានការឃុបឃិតជាមួយសមត្ថកិច្ចពាក់ព័ន្ធ និងមន្ត្រីអាជ្ញាធរយ៉ាងស្ទាត់ជំនាញ ព្រមទាំងរលូនបែបនេះ។
ទាក់ទិននឹងការកាប់ឈើនៅព្រៃសហគមន៍ ក្នុងស្រុកអណ្តូងមាស ខេត្តរតនគិរីប្រជាពលរដ្ឋថាលោក នី កាចាញ បានឱ្យឈ្មោះ ប៉ិច ជាអ្នកផ្ដល់លុយរាប់ម៉ឺនដុល្លារ ទៅឲ្យប្រធានសហគមន៍ ឈ្មោះ រចំ ស្មើល ដើម្បីបើកដៃឲ្យមេឈ្មួញឈើទុច្ចរិតទាំងនេះ អាចនាំគ្រឿងចក្រ និងកម្មករចូលទៅកាប់បំផ្លាញព្រៃឈើសហគមន៍ទាំងបំពានច្បាប់ រួចហើយដឹកចេញទៅកាន់ប្រទេសវៀតណាម។
សូមបញ្ជាក់ថា មេឈ្មួញឈើ ឈ្មោះ នី កាចាញ នេះ គឺល្បីឈ្មោះមិនចាញ់ឈ្មួញឈើ ណុបណាក់ហៅណាក់ក្បាលធំរម្សៀហូជីវ៉ៃ នោះទេ ព្រោះជននេះ ជាអតីតមេភូមិ ដឹងចិត្តមនុស្សក្នុងមូលដ្ឋានដែលគេធ្លាប់រស់នៅ ដូច្នេះមានលទ្ធភាព កាប់និងដឹកជញ្ជូនឈើនច្រើន។ មេឈ្មួញឈើ នី កាចាញ ធ្លាប់បានជួលកម្មករសំរុកលួចកាប់ឈើយ៉ាងកក្រើក នៅក្បែរភូមិភិ ឃុំសេសាន ស្រុកអូរយ៉ាដាវ រហូតដល់បង្គោល១៤ និង១៥ ក្នុងឃុំញ៉ាង ស្រុកអណ្តូងមាស ដោយអូសឈើហុបមូលតាមរថយន្តកែច្នៃ ចូលក្នុងទឹកទន្លេសេសាន រួចបណ្តែតជាក្បូន ឆ្លងដែនចូលទៅក្នុងទឹកដីវៀតណាម ដូចហែកឋិន ប៉ុន្តែគ្មានមន្ត្រី និងសមត្ថកិច្ចណាហ៊ានក្អកជាមួយមេឈ្មួញរូបនេះឡើយ។
មហាជននិយាយថា ករណីរត់ពន្ឋឈើឆ្លងដែនចេញទៅក្រៅប្រទេសបែបនេះ បើមិនមានការអនុញ្ញាតពីមេដឹកនាំខេត្តរតនគិរី ជាពិសេសប៉ូលិសព្រំដែន ទាហានព្រំដែនទេ ច្បាស់ជាក្រុមឈ្មួញមិនហ៊ានថ្លើមធំឡើយ ៕
