ភ្នំពេញ ៖ជនជាតិចិន២ក្រុមកើតមានជម្លោះស៊ីសាច់ហុតឈាមបើកឡានប្រដេញបុកគ្នាដូចរឿងកុន រួចចុះវាយគ្នាផ្អើលពេញដងផ្លូវទាំងកណ្តាលរាត្រីនៅតាមបណ្តោយផ្លូវ៣៦០ កែងផ្លូវ៩៥ ស្ថិតក្នុងសង្កាត់ បឹងកេងកង២ខណ្ឌបឹងកេងកងកាលពីវេលាម៉ោងជាង១២យប់រំលងអធ្រាត្រ ឈានចូលថ្ងៃទី២៤ ខែឧសភា ឆ្នាំ២០១៩ ។
គេមិនស្គាល់ពីអត្តសញ្ញាណគូជម្លោះទាំង២ភាគី មិនត្រូវបាន នោះទេ គ្រាន់តែដឹងថា សុទ្ធតែជាជនជាតិចិនដូចគ្នា ដោយម្ខាងបើករថយន្តទំនើប១គ្រឿង ម៉ាក HYUNDAI H-1 ពណ៌ស ពាក់ស្លាកលេខភ្នំពេញ 2AZ-3693។ ចំណែកភាគីម្ខាងទៀត បើកបររថយន្តទំនើបដូចគ្នា ម៉ាក HYUNDAI Starex CVX ពណ៌ទឹកប្រាក់ ពាក់ស្លាកលេខភ្នំពេញ 2AQ-3376 ។
នៅមុនពេលកើតហេតុ គេឃើញរថយន្តទំនើប១គ្រឿង ម៉ាក HYUNDAI H-1 បើកបរដោយជនជាតិ១ក្រុម ធ្វើដំណើរតាមបណ្តោយផ្លូវ៩៥ ក្នុងល្បឿនយ៉ាងលឿន ប្រដេញតាមរថយន្តទំនើប១គ្រឿង ម៉ាក HYUNDAI Starex CVX ដែលបើកបរក្នុងល្បឿនលឿនដូចគ្នា លុះមកដលក់ចំណុចកើតហេតុ រថយន្ត HYUNDAI H-1 ក៏ជ្រុលទៅបុករថយន្ត HYUNDAI Starex CVX ចំចំហៀងខាងឆ្វេង បណ្តាលឱ្យរថយន្តរងការខូចខាតយ៉ាងដំណំ។
ប្រភពដដែលបន្តថា បន្ទាប់ពីរថយន្តទាំងពីរបើកបុកគ្នាហើយ ក៏ឈប់លែងទៅមុខទៀតខ្លួន លុះភ្លាមៗនោះភាគីរថយន្តទាំងពីរបានចុះ ពីលើរថយន្តប្រកែកគ្នាជាភាសាចិន ដោយមិនដឹងថា ឈ្លោះគ្នាពីរឿងអ្វីខ្លះទេ តែត្រូវអ្នកឃើញហេតុការណ៍សង្ស័យថា ភាគីទាំងពីរអាចនឹងឈ្លោះគ្នា រឿងដណ្តើមស្រីស្នេហ៍ ព្រោះម្ខាងៗសុទ្ធតែស្រវឹងដាបណាស់ទៅហើយ រហូតដល់បង្កជាករណីហិង្សាដេញវាយគ្នាពេញផ្លូវ បង្កឱ្យមានការភ្ញាក់ផ្អើលយ៉ាងខ្លាំងតែម្តង។
សមត្ថកិច្ចមូលដ្ឋានបានចុះមកដល់រួចធ្វើការទាក់ទងទៅសមត្ថកិច្ចជំនាញ ដើម្បីមកវាស់វែងយករថយន្តទាំងពីរ ទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីរង់ចាំដោះស្រាយគ្នាទៅតាមផ្លូវច្បាប់ នៅពេលក្រោយ៕
