បារាំង៖ ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅព្រឹកថ្ងៃទី២៣ ខែឧសភា ឆ្នាំ២០១៩ បានស្ដេចយាងតាមព្រះរាជទីនាំងយន្តហោះពិសេស ទៅកាន់សាធារណរដ្ឋបារាំង ដើម្បីចូលរួមពិធីអបអរសាទរ២៥ឆ្នាំនៃការចូលរួមរបស់កម្ពុជា-បារាំង និងសហគមន៍អន្ដរជាតិ លើកិច្ចការអភិរក្សនិងអភិវឌ្ឍន៍រមណីយដ្ឋានអង្គរ តាមការអញ្ជើញរបស់បណ្ឌិតសភាបារាំងខាងសិលាចារឹកនិងអក្សរផ្ចង់។
ពិធីអបអរសាទរ២៥ឆ្នាំ នៃការចូលរួមរបស់ កម្ពុជា-បារាំង និងសហគមន៍អន្ដរជាតិលើកិច្ចការអភិរក្សនិងអភិវឌ្ឍន៍រមណីយដ្ឋានអង្គរ ដែលនឹងប្រព្រឹត្តិទៅនៅនៅបណ្ឌិតសភាបារាំងខាងសិលាចារឹកនិងអក្សរផ្ចង់នៃ វិទ្យាស្ថានបារាំង។
សម្រាប់កម្វិធីថ្ងៃទី២៤ ខែឧសភា ឆ្នាំ២០១៩ នាវេលាម៉ោង ១៥៖៣០នាទី ព្រះមហាក្សត្រនៃ ព្រះរាជាណា ចក្រកម្ពុជា ព្រះអង្គនឹងយាងថ្លែងព្រះរាជសន្ទរកថាទៅកាន់រាជបណ្ឌិតសភាបារាំងខាងសិលាចារឹកនិងអក្សរផ្ចង់ អំពីជោគជ័យនិងការចូលរួមរបស់កម្ពុជាក្នុងកិច្ចការអភិរក្សនិងអភិវឌ្ឍន៍រមណីយដ្ឋានអង្គរ។
អគ្គនាយកអាជ្ញាធរជាតិអប្សរាឯកឧត្តម ហង់ ពៅ ក៏នឹងធ្វើបទបង្ហាញស្ដីពីការរកឃើញទូកបុរាណនៅ រមណីយដ្ឋានអង្គរ រីឯលោកសាស្ដ្រាចារ្យ Azedine BESCHAOUCH និងលោកជំទាវ ចៅ ស៊ុនកិរិយា ទីប្រឹក្សាក្រសួងវប្បធម៌ និងវិចិត្រសិល្បៈ នឹងធ្វើបទបង្ហាញលើប្រធានបទការងារ២៥ឆ្នាំនៅរមណីយដ្ឋានអង្គររបស់គណៈកម្មាធិការអន្ដរជាតិ អាយស៊ីស៊ី-អង្គរដែលមានប្រទេសបារាំងនិងជប៉ុនជាំសហប្រធានផងដែរ៕
