កោះកុងៈក្រុមហ៊ុន ឆាយណា ហ័រទៀន ដែលជាក្រុមហ៊ុនវិនិយោគដ៏ធំមួយ លើវិស័យអគ្គីសនីនៅស្ទឹងឬស្សីជ្រុំក្រោម ស្ថិតក្នុងឃុំប៉ាក់ខ្លង ស្រុកមណ្ឌលសីមា ខេត្តកោះកុង កាលពីថ្ងៃទី20ខែឧសភាឆ្នាំ2019 បានបើកឲ្យមន្ត្រីរាជការសាលាខេត្តកោះកុង អ្នកសារព័ត៌មាន លោកគ្រូអ្នកគ្រូនិងសិស្សានុសិស្សចំនួន22នាក់ ចូលទស្សនាសិក្សាស្វែងយល់ជាលើកទីបីពីសកម្មភាពការងារនិង ការផលិតឋាមពលអគ្គិសនីរបស់ខ្លន។
លោក ហ៊ុ យ៉ាវហ្វិង(He yaofeng)អគ្គនាយកក្រុមហ៊ុនឆាយណា ហ័រទៀន បានមានប្រសាសន៍ឲ្យដឹងថា ស្ថានីយ៍វារីអគ្គីសនីឬស្សីជ្រុំក្រោម បានចាប់ផ្តើមដំណើរការសាងសង់ឡើងនៅថ្ងៃទី02ខែមេសាឆ្នាំ2010រួចដាក់ឲ្យផលិតឋាមពលជាផ្លូវការនៅថ្ងៃទី28ខែធ្នូឆ្នាំ2013។
បើតាមលោកអគ្គនាយក ស្ថានីយ៍វារីអគ្គីសនីខាងលើ ចែកចេញជាពីរ គឺស្ថានីយឬស្សីជ្រុំលើនិងឬស្សីជ្រុំក្រោមដែលមានសមត្ថភាពតម្លើងម៉ាស៊ីនទួរប៊ីនចំនួនបួនគ្រឿងនិងមានអនុភាពសរុបរហូតដល់338មេហ្គាវ៉ាត់។
លោកអគ្គនាយកបានបន្តថា ក្រៅពីការងារផលិតឋាមពល បន្ធូរបន្ថយនូវបញ្ហាកង្វះខាតអគ្គិសនីនៅកម្ពុជា ក្រុមហ៊ុនក៏មានតួនាទីសំខាន់ផងដែរ ក្នុងការចូលរួមជំរុញការអភិវឌ្ឃន៍សេដ្ឋកិច្ចសង្គមកែលម្អរជីវភាពប្រជាជននៅក្នុងតំបន់ឲ្យបានប្រសើរឡើង តាមរយៈនៃការប្រើប្រាស់អគ្គិសនូវតម្លៃថោកសមរម្យ ។
កន្លងមកក្រុមហ៊ុនក៏បានចូលរួមធ្វើកិច្ចការសង្គមជាច្រើនផងដែរ ដូចជា ការងារកាកបាទក្រហម ការងារសប្បុរសធម៌ផ្សេងៗ ការងារអប់រំនិងកីឡា ការស្ថាបនាផ្លូវថ្នល់ ស្ពាន ការណ្តុះបណ្តាលធនធានមនុស្សនិងផ្តល់ការងារជូនពលរដ្ឋនៅក្នុងតំបន់ជាដើម៕