(ភ្នំពេញ)៖ រូបថត របស់លោក លី ដារិទ្ធ មេបញ្ជាការរងកងរាជអាវុធហត្ថខេត្តឧត្តរមានជ័យ ផឹកស្រា អោបស្រីក្នុងខារ៉ាអូខេ រហូតសន្លប់ស្តូកស្តឹង ត្រូវគេបង្ហោះ ចែកចាយ និងរិះគន់យ៉ាងចាស់ដៃ លើបណ្តាញសង្គមហ្វេសប៊ុកកាលពីពេលថ្មីៗនេះ។
ការបែកធ្លាយរូបភាពអោបថើប ស្រើបស្រាល ជាមួយស្រីក្មេងក្នុងបន្ទប់ខារ៉ាអូខេ របស់លោក លី ដារិទ្ធ គឺបន្ទាប់ពីលោកត្រូវគេរាយការណ៍បានដើរអួតអាងពេញ ខេត្តឧត្តរមានជ័យថាៈ រូបលោកនេះហើយជាបេក្ខជនមេបញ្ជាការកងរាជអាវុធហត្ថខេត្តនេះនាពេលខាងមុខដ៏ខ្លី។
សូមជម្រាបជូនថា លោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ធ្លាប់បានណែនាំឲ្យមន្ត្រីក្រោមឱវាទទាំងអស់ចៀសវាងឲ្យបាននូវរាល់ទង្វើទាំងឡាយណាដែលនាំឲ្យមហាជនតិះដៀល រិះគន់ ឬនាំភាពក្តៅក្រហាយដល់ពួកគាត់។
មហាជននឹងរងចាំមើលថាតើលោក លី ដារិទ្ធ ដែលចូលចិត្តផឹកស៊ីស្រីញីអូនបងបង្ហាញពីសីលធមិ៍មិនល្អក្នុងនាមជាមន្ត្រីបែបនេះ ពិតជាអាចក្លាយជាថ្នាក់ដឹកនាំដូចការអួតអាងរបស់លោកមែនឬយ៉ាងណា? ។
បើគេនៅមិនទាន់ភ្លេច លោក សរ ថាវី អតីតអភិបាលខេត្តឧត្តរមានជ័យនេះ ក៏ត្រូវបានដកតំណែងក៏ព្រោះតែរឿងស្រីញីជាធំនេះដែរ។ចំណែក លោក សួន បវរ អតីតអភិបាលខេត្តបន្ទាយមានជ័យ ទើបតែត្រូវដកចេញពីតំណែងថ្មីៗក៏ព្រោះតែរឿងស្រីញី។ លោក ឡាយ វណ្ណៈ អតីតអភិបាលខេត្តតាកែវក៏កំពុងជាប់គុកព្រោះរឿងសម្លាប់ស្រីស្នេហ៍ខ្លួនឯងដែរ។ មហាជនលើកជាសំនួរថា តើគួរទេដែលឲ្យមន្ត្រីល្មោភស្រា វក់នឹងស្រី ឲ្យទៅដឹកនាំគេ? បើអ្នកមន្ត្រីគ្រាក់ៗ ដែលយកស្រីស្រាជាធំត្រូវសម្តេច តេជោ ដកចោលពីតំណែងអស់ហើយនោះ ៕
