ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅយប់ថ្ងៃទី១៦ ខែឧសភានេះ បានប្រកាសបដិសេធនិងបញ្ជារឲ្យមានចំណាត់ការចំពោះក្រុមហ៊ុនជួញដូរលុយមួយដែលយករូបសម្តេចនិងធនាគាជាតិកម្ពុជាទៅពាក់ពន្ធ័ការរកស៊ី។
សម្តេចតេជោ ហ៊ុន សែន បានសរសេរក្នុង Facebook ថា៖ «ដំណឹងសន្តិសុខជាតិបន្ទាន់ ! កាលពីពេលថ្មីៗនេះ មានក្រុមហ៊ុន ឈ្មោះ GCG Asia Co., LTD បានយករូបថតខ្ញុំ និងឈ្មោះខ្ញុំ ទៅបង្ហោះនៅក្នុង Website របស់ក្រុមហ៊ុន http://gcgasiacoin.com/ ដែលនិយាយថា ខ្ញុំជាអ្នកគាំទ្រ និងចូលរួមសម្ពោធកាត់ខ្សែបូក្រុមហ៊ុន នៅក្នុងប្រទេសកម្ពុជានៅថ្ងៃទី ២០ ខែ ឧសភា ២០១៩។ ទន្ទឹមនឹងនោះ ក្រុមហ៊ុននេះ បានយកឈ្មោះធនាគារជាតិ និងធនាគារចិននៅកម្ពុជាថា ជាដៃគូទទួលខុសត្រូវក្នុងជំនួញដូរលុយ ក្នុងរូបភាពគ្រីបតូឃឺរិនស៊ី (Crypto Currency)។
តាមព័ត៌មានពីស្ថានទូតឥណ្ឌូណេស៊ីនៅកម្ពុជា គឺបញ្ជាក់ថា GCG Asia ជាក្រុមហ៊ុនរកស៊ីមិនត្រឹមត្រូវហើយ ត្រូវបានដាក់ចូលក្នុង Black List(បញ្ជីខ្មៅទៅហើយ)។
ក្នុងនាមខ្ញុំជានាយករដ្ឋមន្ត្រី នៃព្រះរាជាណាចក្រកម្ពុជា ខ្ញុំសូមបដិសេធព័ត៌មានដែលផ្សាយ ក្នុងវេបសាយរបស់ក្រុមហ៊ុនខាងលើនេះ គឺមិនពិតទេ។ សូមអាជ្ញាធរ និងសមត្ថកិច្ចពាក់ព័ន្ធទាំងអស់ពិនិត្យតាមដាននិងស្រាវជ្រាវរកមុខជនខិលខូចយកមកផ្តន្ទារទោសតាមច្បាប់ជាធរមានជាបន្ទាន់។ សូមបងប្អូនប្រជាពលរដ្ឋ និងពាណិជ្ជករទាំងក្នុងនិងក្រៅប្រទេសមានការប្រុងប្រយ័ត្នខ្ពស់ ចំពោះការទិញដូរប្រាក់ដែលគ្មានការអនុញ្ញាតពីរាជរដ្ឋាភិបាលកម្ពុជា»។
សូមបញ្ចាក់ដែរថាសម្រាប់ការជួញដូរហ៊ុននេះលោក ស៊ូ សុជាតិ អគ្គនាយកគណៈកម្មការមូលបត្រកម្ពុជា (SECC) បានឲ្យដឹងថា រាជរដ្ឋាភិបាលកម្ពុជា ដែលមានគណៈកម្មការមូលបត្រកម្ពុជាជាសេនាធិការនោះ បាននិងកំពុងរៀបចំបទបញ្ញត្តិ ដើម្បីអាចឈានទៅរកការដាក់ឲ្យជួញដូរទ្រព្យឌីជីថល ប្រភេទ Bitcoin ជាលើកដំបូង(មិនទាន់ដាក់ឲ្យដំណើរការទេ)។សម្រាប់ការជួញដូររទ្រព្យឌីជីថលនេះ លោក ស៊ូ សុជាតិ ក៏បានអំពាវនាវឲ្យសាធារណជនទាំងអស់ កុំយកការទ្រព្យឌីជីថល ទៅធ្វើជាមធ្យោបាយទូទាត់អី ព្រោះនាំឲ្យខាតបង់ដោយប្រការណាមួយ។
លោកបញ្ជាក់ថា «អាជ្ញាធរត្រូវតែច្បាស់សិន អ្នកបច្ចេកទេសត្រូវតែច្បាស់សិន មុននឹងដាក់ឲ្យដំណើរការលើវិស័យថ្មីមួយ ប្រព័ន្ធថ្មីមួយដែលជ្រកក្រោមការគ្រប់គ្រង របស់គណៈកម្មការមូលបត្រកម្ពុជា អីចឹងយើងត្រូវសិក្សាសិន មុននឹងយើងផ្ដល់ ឬក៏ដាក់ឲ្យសាធារណជនធ្វើការជួញដូរ»។
លោក ស៊ូ សុជាតិ បានបន្ថែមទៀតថា មកទល់ក្នុងពេលនេះគ្រាន់តែសេចក្ដីព្រាងទេ ដែលគណៈកម្មការមូលបត្រកម្ពុជាមាន ប៉ុន្ដែអ្វីដែលគណៈកម្មការមូលបត្រកម្ពុជា អនុវត្ដ គឺអនុវត្ដនូវសេចក្ដីថ្លែងការណ៍រួមមួយ ដែលបានធ្វើជាមួយធនាគារជាតិ និងអគ្គស្នងការនគរបាលជាតិ។«សេចក្ដីថ្លែងការណ៍នោះ ក្នុងគោលដៅតែមួយ គឺសូមមិនឲ្យសាធារណជន លោកប៉ះពាល់ទៅលើការជួញដូរទ្រព្យឌីជីថល ឬក៏យកការជួញដូរទ្រព្យឌីជីថលនេះ ជាមធ្យោបាយទូទាត់នោះទេ។ សូមឲ្យគាត់ កុំពាក់ព័ន្ធជាមួយនឹងប្រតិបត្ដិការទាំងអស់ រហូតទាល់តែអាជ្ញាធរពាក់ព័ន្ធ លោកផ្ដល់ជាអាជ្ញាប័ណ្ណ ស្របតាមបទបញ្ញត្ដិជាធរមាន ជូនដល់ក្រុមហ៊ុនត្រឹមត្រូវជាក់ស្ដែងណាមួយ»៕
