ព្រះសីហនុ ៖ ជនជាតិចិនមួយក្រុម បានបង្ហោះវីដេអូស្រែកគំរាមថា ពួកគេមកពីខេត្តឆុងឈីង ចង់បង្កអសន្ដិសុខ នៅខេត្តព្រះសីហនុ? ។
ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ ថ្លែងប្រាប់អង្គភាពកាសែតក្នុងស្រុក ឲ្យដឹងនៅព្រឹកថ្ងៃទី១២ ខែឧសភា ឆ្នាំ២០១៩នេះថា បន្ទាប់ពីទទួលបានបទបញ្ជាយ៉ាងម៉ឺងម៉ាត់ ពីនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិនោះ លោកបានបញ្ជាកម្លាំងជំនាញបើកការស្រាវជ្រាវភ្លាមៗជាបន្ទាន់។ប៉ុន្ដែ មិនទាន់អាចបញ្ជាក់ច្បាស់ថា ជនជាតិចិនដែលបង្ហោះវីដេអូនោះ ស្នាក់នៅ ឬក៏ធ្វើការនៅខេត្តព្រះសីហនុនោះទេ ពោលស្ថិតនៅក្រោមការស្រាវជ្រាវនៅឡើយ។
យោងតាមមន្ដ្រីជាន់ខ្ពស់ នៃអគ្គស្នងការដ្ឋាននគរបាលជាតិ បានអះអាងថា តាមរយៈវីដេអូឃ្លឹបរបស់ជនជាតិចិនមួយក្រុមនេះ ដែលបកប្រែជាភាសាខ្មែរថា ពួកគេមកពីខេត្តឆុងឈីអ។ ពួកវាថា ខេត្តសីហនុ៣ឆ្នាំក្រោយវាចង់ឲ្យវឹកវរ គឺវឹកវរចង់ឲ្យសុវត្ថិភាព គឺសុវត្ថិភាព។ នាយឧត្តមសេនីយ៍ សន្ដិបណ្ដិត នេត សាវឿន អគ្គស្នងការនគរបាលជាតិ បានបញ្ជាឲ្យកម្លាំងនាយកដ្ឋានជំនាញ សហការជាមួយស្នងការដ្ឋាននគរបាលខេត្តព្រះសីហនុ ស្រាវជ្រាវភ្លាម បើរកឃើញត្រូវចាត់វិធានការច្បាប់ជាបន្ទាន់ ឬត្រូវបណ្ដេញចេញពីកម្ពុជាផងដែរ។
ស្ថានទូតចិនប្រចាំកម្ពុជា បានឲ្យដឹងតាមបណ្តាញសង្គមហ្វេសប៊ុក នៅរាត្រីថ្ងៃទី១២ ឧសភានេះថាស្ថានទូតចិនប្រចាំកម្ពុជា មានការយកចិត្តទុកដាក់ខ្ពស់ចំពោះបញ្ហានេះ និងបានជួយសម្របសម្រួលដល់សមត្ថកិច្ចនៃប្រទេសចិន និងកម្ពុជា ដើម្បីបើក ការស៊េីបអង្កេតអោយបានគ្រប់ជ្រុងជ្រោយលើបញ្ហាមួយនេះ។ ជឿជាក់ថាការពិតនៃបញ្ហានេះ នឹងត្រូវបានលាតត្រដាងក្នុងពេលឆាប់ៗ ករណីមានការវិវត្តន៍អ្វីថ្មី យេីងខ្ញុំនឹងធ្វើការប្រកាស ជូនដំណឹងបន្តទៀតអោយបានទាន់ពេល៕
