ខេត្តព្រៃវែង ៖ កាលពីវេលាម៉ោង ៣ រសៀលថ្ងៃទី ៨ ឧសភា គូស្នេហ៍មួយបានមកជួលបន្ទប់ផ្ទះសំណាក់សំណាក់រំចង់ ស្ថិតក្នុងភូមិ៥ ឃុំព្រែកខ្សាយ(ខ) ស្រុកពាមរក៍ ដោយប្រាប់ថា ជួលមួយម៉ោងដើម្បីឡើងឋានសួគ៌ ។ បានមួយម៉ោង ឃើញបុរសជាសង្សារចេញមកវិញតែម្នាក់ឯង យ៉ាងប្រញាប់ប្រញាល់ ទៅមុនបាត់ទៅ។
ម្ចាស់ផ្ទះសំណាក់សង្ស័យ បានចូលទៅមើលក្នុងបន្ទប់ដែលអ្នកទាំង២ដេក ក៏ប្រទះឃើញនារីជាដៃគូបាត់បង់ជីវិតទៅហើយ ទើបមានការភ្ញាក់ផ្អើលឡើង និងរាយការណ៍ប្រាប់សមត្ថកិច្ចឲ្យជួយអន្តរាគមន៍តែម្តង។
ក្រោយមកនារីរងគ្រោះដែលត្រូវប្រុសស្នេហ៍នាំមករឹតកនៅក្នុងផ្ទះសំណាក់នោះត្រូវបានស្គាល់អត្តសញ្ញាណថាជាស្រីមានប្តីហើយ។នារីរងគ្រោះមានឈ្មោះផៃ ស្រីម៉ាក់ ភេទស្រី អាយុ២៥ឆ្នាំ (មានប្ដី) ស្នាក់នៅភូមិព្រែបាក់ ឃុំព្រែកទម្លាប់ ស្រុកលើកដែក ខេត្តកណ្តាល ។ ចំណែក ជនសង្ស័យ ជាប្រុសសាហាយគេមិនទាន់ស្គាល់អត្តសញ្ញាណនៅឡើយទេ។
សមត្ថកិច្ច បានឲ្យដឹងថា ក្រោយពីទទួលបានសេចក្តីរាយការណ៍ខាងលើ កម្លាំងសមត្ថកិច្ចបានចុះទៅដល់កន្លែងកើតហេតុ ធ្វើការពិនិត្យឃើញថា សពនារីរងគ្រោះ នៅត្រង់ចំណុចត្រង់កមានស្លាកស្នាមត្រូវបានរឹតនឹងខ្សែតាមការសន្និដ្ឋានថា ប្រុសស្នេហ៍របស់នារីរងគ្រោះគឺជាអ្នកបង្កខណៈមកជួលបន្ទប់ជាដើម្បីឡើងឋានសួគ៍ជាមួយគ្នា ។
ពេលនេះ សមត្ថកិច្ចកំពុងតែធ្វើការស្រាវជ្រាវយ៉ាងយកចិត្តទុកដាក់ តាមចាប់សង្ស័យជាប្រុសស្នេហ៍ នាំមកសាកសួរ និងកសាងសំណុំរឿងបញ្ជូនទៅតុលាការ ចាត់ការតាមច្បាប់៕
